ملتقى طلاب وطالبات جامعة الملك فيصل,جامعة الدمام - عرض مشاركة واحدة - دعوة عامة للجميع كل واحد يكتب تجربته مع الماجستير سواء تم القبول او لم يتم القبول ..

طموحاتي كبيرة · 2013- 1- 1

اقتباس:

المشاركة الأصلية كتبت بواسطة بوبديـــــْع

قصتي غير
واجهتني صعوبات دراسية وعقبات من بداية مرحلة الدراسه وهي الابتدائية ،،، كنت مهتم نوعا ما بالدراسة وكانت دراستي وااستيعابي متوسط او اقل من المتوسط بس كنت احب المدرسة اكثر من البيت لاسباب عديده من اهمها المنزل عشت في بيت جدي رحمةالله في منزل شعبي والله يعين في ايام الشتاء حيث ان المطر كان يخرر في البيت ويبغا لنا نغطي الكتب والدفاتر المدرسية بقراطيس و باكياس القمامه ،،، وفي عز الصيف نخبئ الكتب والدفاتر في شنط دبلوماسية بلاستيكية حفاظاً عليها من تخريب الفئران ،،، وبعد التعود على هذا الوضع شتاء وصيفاً دخلت المتوسطة وفي اول متوسط توفي جدي رحمة الله وبيع البيت للورثه (ماابغي افصل زود عن البيت عشان مااخرج عن الموضوع) وفي ثالث متوسط جات اكبر مشكلة وهي وفاة والدتي رحمها بمرض السرطان بعد معاناة مع هذا المرض 4 سنوات ،، وبعدها فصلت عن الدراسة لكثرة الغياب وجهل اهمية التعليم من والدي حيث انه فلاح امي لايقرأ ولا يكتب وماعنده ذاك الزود باهمية الدراسة (من شيبان الاول ههه ) الله يطول بعمره ،،، التحقت بالعسكرية بشهادة ثاني متوسط ،،، وعرفت بعدها واقولها بكل صراحة باهمية التعليم وخاصة الي عنده شهادة اووووو يصير كنق في العسكرية حتى لو بدون رتبة عنده شهادة شئ كبير هالشئ من واقع تجربة ،، تحمست للدراسة واكملت دراستي من ثاني سنة للخدمة وخلصت المتوسط ليلي ،، وتحمست للثانوية وبعد ليلي ،،، واخذت ابو الثانوية ،،، واتحمس وادرس كلية التقنية بالنظام الموازي واخدت دبلوم ادارة مكتبية من تقنية الاحساء ،،، وباقي باقي فيني عطاء ماشاء الله تبارك الرحمن ،،، واسجل على عماها انتساب بالنت وانقبل تربية خاصة وانا الحين طالب انتساب تربية خاصة مستوى سادس الحين في هذا الفصل ولله الحمد ،،، وبواصل بإذن الله حتى الدكتوراه ولاني بوقف للابد الي يبونه بسويه يبون توفل بدرس انجليزي وبنآخذ ام التوفل بعد ،، الي اخذوه مب احسن مني يبون دبلوم تربوي بناخذ دبلوم تربوي يبون فلوس بنآآخذ قروض ونعطيهم الي يبون بواصل وباآآخذ اعلى درجة علمية بأذن وبتوفيق من الباري عز وجل ان شاء الله لأني وبكل صراحة عشت حياة الفقر الحمد لله وعشت ايامي الي انا فيها الحين ولله الحمد وعرفت قيمة الشهادة ،،، انا تراني لاازال في الخدمة الحمد لله حالي مستور بيت ملك ربي لك الحمد وحياه طيبة ربي لك الحمد ،،، بس بواصل وبواصل وبواصل حتى لو اني مااسوي في هالشهادة أي شئ بواصل وفالي درجة استاذ مشارك الي هي دكتوراه مادري بروفوسور بحول الله وبقوته ،، كثرت كلام بس ان شاء الله تقوى العزيمه لكم ياشباب المستقبل ،،،
قال رسول الله (ص) اطلب العلم من المهد الى اللحد ..

ماشا الله تبارك الرحمن انت فعلا قدوة حسنة لكل شخص عانى من ظروف صعبه وتحداها
وكمل مشواره الدراسي اتمنى لك كلا التوفيق ومن كل قلبي الله ينولك الي ببالك جذبتني قصتك
انا لسا مستوى ثالث لكن طموحة مرة وحابه اكمل بعد مااخلص ان شا الله عشان كذا جيت على هالقسم اتمنى للجميع التوفيق والمزيد من التقدم..