ملتقى طلاب وطالبات جامعة الملك فيصل,جامعة الدمام - عرض مشاركة واحدة - لكل شاب ماعندهم شغاله ... تعال شوي .. لو أنت مهتم لأختك :)

senyorita · #1 2013- 1- 3

hello

>>>

زمان عنكم

...

المهم .. موضوعي ( شغل البيت )

ممكن البعض يشوفه موضوع تافه ... و الآخر يشوفه يخص البنت .. و الآخر يقول ايش خلاك تكتبين موضوع زي كذا ... ووو ومدري بعد وش تفكرون ...

لكن .. أنا بصفة مكانتي كفرد من أفراد سواء على مستوى ( بيت ) أو كمستوى أعلى وهو ( المجتمع ) أشوفها مشكله !!

مو مشكله بحد ذاتها .. ترا كلها شغل وانتهينا .. لكن اللي قاهرني بالموضوع ( عدم التقدير + ان البعض هداهم الله يشوفونها شغله تخص البنت فقط و بذلك يكون يحق له يوسخ و تجي البنت تنظف وراه فوق ذلك نظفي و رجلك فوق رقبتك !!! )

أخواني .. آبائي .. كل أحبتي .. المسأله مو كذا

القضية قضية( تقديـــــــــر) بنت أجلت وقفتها ع مرايتها أو مذاكرتها أو وقتها اللي تجلس فيه مع نفسها و جات تشتغل لأجل البيت يكون مريح للكل .... وهي شرعا مو مسؤوله عن هالشي
هل هاذا برايك مايستحق أكبر تقدير ؟؟ .. وأتوقع التقدير شي مو المفروض يستهان فيه

ع العموم .... الهدف من موضوعي أعرف وش نظرتكم لهالموضوع .. عشان يا أجلس معاكم معززه مكرمه ولا أهج من هالدنيا وافتك

<<< امزح امزح

نبدأ بالاسئله اللي تجيب عنها شخصيا وموجهه لأخوي هنا قبلكم و لكم أخواني

...<< بتنجلد

وأتمنى تكون بكللللللللل أمانه ...

1- هل أختك أو أمك اللي تنظف غرفتك ؟؟

2- هل أختك أو أمك تغسل ملابسك ؟؟

3- اذا انتو بالبيت نظامكم غسيل جماعي ..اذا تغسلت كل الملابس ... هل انت اللي تجي تاخذ ملابسك و ترتبها بدولابك ؟؟ أو أمك و اختك يسوون كذا ؟؟

4- اذا بالعصر صار نفسك بشاي أو عصير أو حلا .. تقول لأختك وأمك تسوي لك ؟؟واذا سوت لك .. هل تفكر تردها لها بشي أحلى ؟؟

5- احيانا تقول لأختك أو زوجتك وأنت جالس ع التلفزيون جيبي لي ماي .. هل انت تجيب لها ماي بعض الأحيان ؟؟

6- اذا أمك أو اختك أو زوجتك طلبت منك مشوار او شي من البقاله .. وكنت فاضي وقتها .. تطنقر عليها و تتلحطم و آخر شي تقرر تسويه لها أو لا ؟

أسئله عامه ... << استجواباتي خطيره انا

1- هل ترى أن من المفترض يكون كل فرد في البيت مسؤول عن نفسه وعن فوضته ؟

2- نظرية ( البنت لها شغل البيت و الولد له الشغل اللي برا ) هل ترى فيها عدل ؟

3- بموجب النظريه السابقه هل ترى أنه من الواجب على أختك أو أمك أن تنظف فوضتك اللتي احدثتها أنت و هي مجبره على ذلك ؟

4- هل تقترح شيء بخصوص هاذا الموضوع ككل ؟

بالختام .. مثلما لكم احترام و تقدير كشباب لنا تقدير أكبر و احترام كفتيات ... فنحن الأم و الأخت و الزوجه و وراء كل رجل عظيم أمرأه

نحن من وصى الرسول عليه السلام و قال رفقا بالقوارير
ونحن كتله من الاحساس تحتاج التقدير لذاتها و أن يكون لها اعتبار في هاذا المجتمع ، قبل الحب و الحنان و الحاجات الماديه

أتمنى أن لا يأخذ الموضوع منحى حقوق المرأه ، و أتمنى من الإداره ماتحذف الموضوع لأنه يخص الكل وليس المرأه فقط

هاذا لو كان المنتدى يعنيه صلاح المجتمع و يعنيه أن نقول آراءنا بحريه و كل اللي بخواطرنا مادمنا لم نتجاوز حدود الله و حدود الذوق العام

كل اللي ابيه ... عاملني بلطف : تلاقيني ألطف مخلوق على وجه الأرض

و عاملني باستفزاز و استحقار أعاملك بكل السخريه قدام الكل وعدم الإحترام

... وعاملني بحب و تقدير .. أكن لك كللل الاخلاص و الموده و أسوي لك اللي تبيه