اقتباس:
المشاركة الأصلية كتبت بواسطة دنيا الغموض
حصن الزعامه 
ترى العالم بدت تقلل مهورهم وبنات قبايل معروفات مهورهم 15 الف!!!
وحتى الصرفيات قلت
ترى العنوسه مو سبب مادي وبسس!!
انا وخوياتي ليمن الحين مافكرنا وماغيرنرفض
الكلام من الحين الكفؤ؟؟؟
ترى قليل وربك رياجيل كفؤ
ترى العالم تغيررررررت
الاحوال تغيررررررررت
اعرف فئة شباب وللآسف كبيره !!
ناقشهم بآحد المنتديات المعروفه عن هالشيء
كآن الرد!!
والله ودنا بالزواج لكن حاليا مانفكر
ومتى تفكر يابعدي؟؟
والله لامن تهيآت
ومتى تتهيئ؟!!
والله يمكن لاصار عمري 35!!!!!!!!!!!!
اغلبهم وركز ماقلت كلهم
مايبون يتحملون مسؤوليه
مايبون احد يربطهم
ولا النوع الثاني طبعااا
ماني بلاقي وظيفه ومدري شنو انا تعبتت انا مدري ايش
ابي اتزوج ابي استقرر
طيب يارجال ترى فيه مليون طعش وظيفه
وش يرد!!
لا والله مابي اي شيء
مابي ام 4 الاف ولا 5 هذي ماتعيشش
طيب كم تبي؟!!
ابي ماتقل عن 8 بالقليل او 10
وهالفتره كللللللللللهااا يجلس عطالي بطالي
بدال لايشتغل شوي ويجمع ويطلع له كم قرشش
ترى عندنا ناس ماتبي تتعب اببببببببد
يعني انا فاضية شغل
والحمدلله حالتنا الماديه جدا حللوه
لكن جتني من فترة طفشش
قلت اجرب التسويق في النت
كنت اشتري فرضا ب1000
خلال اسبوعين او ثلاثه تنباع ب5000
؟؟؟
يعني اللي يبي الرزق لو بريال يقدر يجيب كل شيء يبيه
الخلل يكمن في الاشخاص نفسهم اكثثثررررررررر
من الظروف المحيطه بنا
زماننا ماعاده بآول واهتمامات العيال والبنات بالغالب صارت تافهه
حتى بغرضهم للزواج مايفكرون بالاستقرار كثر مايفكرون لآشياءء ثانويه
يعني شكل + فلوس وطلعات وفله ومدري ايششش
يعني زبدة الموضوع هذا كله
العيب بخلق الله مو بالزمان ولا الظروف
واتمنى انو كنت فاهمه مقصدك واتمنى انو تتقببل وجهة المظرر
 |
كلامك على العين والراس وواقعي صحيح لكن الفئه الثالثه اللي أنا ذكرتها هي الأغلب بحكم أني شاب وعايش ومتغلغل في المجتمع الشبابي !
أختي الكريمه والله الذي لا إله إلا هو أنو ما ذكرته هو الغالب في الشباب وشوفيني حلفت وأنا ما حد غصبني على الحلف
أولاً : بنسبة للمهور أعرف أنها قلت بنسبة ضئيله عند البعض لكن تبقاء المادة هي الاساس !
صدقيني في الأقليم النجدي غير تماماً والله حالات نادره يرضون بمهر اقل من 50
وفيه حالات أنو ما يطلبون شرط مهر يعني الجود من الماجود وهذي النوعيه من الناس مهدده بالانقراض وهم الناس الذوق واللي يعرفون وش معنى زواج
وأنا أتكلم عن الشاب اللي صامل يبي يتزوج ’ أما اللي لعاب مثل ما ذكرتي ما أتكلم عنه
أعطيك مثال :
أنا أول ما توظفت عام 1423 سنة تخرجي من الثانوي ! ذيك الأيام رواتبنا مرررره قليله يعني كانا نستلم رواتب تحت الالفين وحنا في وزارة حكوميه واللي مره متطور فوق الالفين بشوي !
قابلت عدة شباب في الوزارة أكثر من 20 شاب تتراوح أعمارهم من 22 إلى 35 !
أكثر واحد يستلم فيهم 2800 وأقل واحد 1690 ريال طبعاً نظام بند الأجور وخرجين ثانوي بأمانه
لما أدخل معهم وأسولف بحكم الزماله أشوف نصهم منحرف أما فكرياً أو أخلاقياً والنص الثاني صابر !!
لما أكلم العاقل منهم وعمره تقريباً 30 ليه ما تتزوج ؟ يناظرني بنظره غبيه !!
يقول من جدك تتكلم أنت ؟ وأكيد كلكم عارفين السبب يعني يسرق مثلاً !!
والعائق الاساسي هي المادة بالعربي الفصيح والعامي
لذلك عزفوا عن الزواج ومنهم من صبر ومنهم من أنحرف ! ومنهم من تعقد نفسياً
وعلى فكره نصهم خارج مدينة الرياض يعني جاي ومتغرب ومخلي اهله وساكن في شقه أما لحاله أو مع مجموعه وراتبه ما يتجاوز 2000 ومصاريفه أتوقع فوق ال2000 كيف بيتزوج هذا أو يكون نفسه ! وحالات وظروف والله ما يعلم بها إلا الله ما يسعني أذكرها لكم قسم بالله كم شخص اللي جاي من اقصى الشمال واللي جاي من اقصى الجنوب وشيء يضيق الخاطر
بعد القرار الملكي جاء الترسيم , تطورت الرواتب وصارت تتراوح بين ال3000 وال 5000 طبعاً في هذي الفترة بالضبط شاع الجشع عند التجار وغليت وطارت الدنيا والكل عارف الغلاء اللي أجتاح المنطقه
برضوا ما زالت المعاناه هي هي زادت الرواتب وزادت المصاريف
هذي من ناحية الدوام !
لما أجيك في النادي الاغلبيه اكيد شباب ولله الأغلبيه ودهم يتزوجون بس قدره ماليه صعبه أو أنه قاعد يكون نفسه له كم سنه
لما أجي في الحي برضو نفس المعاناه
بالعربي الماده هي الاساس ولله ما يزوجونك الناس وانت ما تقدر على مقومات الحياه أو أنك متعثر
اللي ذكرتهم الان هذولي يمثلون حسب تقديري 70% من الشباب السعودي
رواتبهم ما تساعد مع الغلاء والجشع
أنا قلت اللي شفته بعيني ولامسته على أرض الواقع رغم أني أختصرت الكثير وربما غيري ما شاف ولا يتوقع والله على ما اقول شيهد
هذا أسمه زواج مش لعب : أحسبي حساب مهر وبيت ومستقبل وأولاد ومصاريف تهل عليك هل ! والكل يعرف أن الله هو اللي متكفل لكن برضو الله سبحانه قال أسعى يا عبدي وأسعى معاك
ولسى فيه عوائل عندهم شروط وطقوس تعرقل دورة الحياه الاجتماعيه
وانا متأكد انو بيجي من يرد ويقول انت كبرت الموضوع وانو ربك يسهلها وانو المصاريف تتدبر
راح أقوله يقول عمر بن الخطاب رضي الله عنه : راعي الحاجه اولى بحملها
كثير ما عنده من يعوله ومتعثر أقتصادياً وفي سن الشباب وصابر والسبب جهتين من المعوقات
1-الوضع الاقتصادي والغلاء في الاسعار 2- وشروط العائله وطلقوسها
وأنا على فكره ما أتكلم عن نفسي يعلم الله
الحمد لله والمنه أموري متيسرهـ رغم أنو للحين عمري 28 ولسى أعزب
ولا خطبت وكل شيء متوفر بس قاعد أبني شقه على مهلي لأن السكن هو اللي أخرني
أنا أتكلم عن معاناة الشباب اللي هم عماد الأمه وهم القوه وهم الجيل القادم اللي شفت الكثير منهم يعاني بدون مبالغه
ولله الشباب في السعوديه هم أكثر فئه مظلومه ومسلوبه حقوقهم وغير منظور فيهم
أهتموا في الشايب والمعوق والمراءه والشاب يدبر نفسه
وهذا أكبر خطاء أجتماعي فادح ترتكبه الجهات المعنيه
وأنا أتحدى إذا مش أغلب الشباب اللي في المنتدى ما يؤيدون كلامي
والله أغلب الشباب فيهم الخير وودهم بالستر لكن العين بصيره واليد قصيره
وصبراً جميل والله المستعان
ربما خرجنا عن مضمون الموضوع اللي طرحه أخونا لكن صدقوني هذا المشكله أهم من الدوره
والمفروض نحل المشكله بعدين نطرح التنظيم والنصائح والطرق التي تؤدي إلى حياه سعيده ومن هالكلام
هذا وصلى الله على نبينا محمد