تعال اسولف لك...
تعال اسولفلك ترى الوقت محسوب
هذا العمر بيروح من عرض ماراح
اي والله اني غبت مجبر ومغصوب
لابيدي ارجع لك ولا قادر ارتاح
الغربه القشره مشاوير ودروب
والليل عقبك خيل فرسان ورماح
افز من نومي واناديك مرعوب
مثل الطفل لافز من نومه وصاح
في صوب هالعالم وحبي لك بصوب
البارح بطاريك لين الفجر لاح
لاصار حبك ذنب من يقدر يتوب
من رحت عن وجهك وانا كلي جراح
أرواحنا في البعد ساحب ومسحوب
والبعد مثل الموت لاجر الارواح
ماقلت لك ابن آدم اخطاء وعيوب
والمشكلة محد(ن) يشيله لاطاح
ماعاد لي في العمر رغبة ومطلوب
غديت كني بيد الايام مسباح
كل شي بالدنيا مقدر ومكتوب
حتى الجفا حتى الحزن حتى الافراح
ياصاحبي ماكل ممنوع مرغوب
والهم ماهو بس فترة وينزاح
ليته غيابي عنك ماهو محسوب
وليتك اليا رحت من عرض ماراح