هذي هي ( أوراق شعري ) تحتري ندّك ** من غيبتك والدفاتر بيض وعجافي !!
تشوقني لالبست من الوفا قدّك ** مالي عذر عن وفاك وزينك الصافي !!
الليل قطعة سواد ولا كسى خدّك ** والشمس ماغيّرت من ليلك الضافي !
محلّك القلب كان إنّ الغلا شدّك ** من غفلة الشوق صحّ النوم ياغافي !
آخر علومك يقولون الجفا حدّك ** وشلون دلّيت درب الوصـْـل ياجافي ؟!!
تاخذْك الأيام وتودّيك وتردّك ** يخونك الوقت وتعوّد على الوافي !!
كانك على الشوفة اللي شفت من جدّك ** ياكبر فرحـتـْـك لو تدري عن الخافي !!
تأكد إن المشاعر ماتقف ضدّك ** لاخانها البرد ترجي صوتك الدافي !!
لو راح بي جزْر غيرك جابني مدّك !! ** لاهبّ طاريك بشراعي ومجدافي !!
إطعن بحدّ العيون السود من ردّك ؟! ** إن كان لك ديـْـن خلّ العين تستافي !!
ماهو غريبٍ عليك ولا على ودّك ** كثـّـرت فيّ الطعون ورحت متعافي !!
ياطول ركضي وراك وياكثر صدّك ** ماكنـّـك اللي خذيت العقل ياكافي !!