مرّات ربـّـك يرزقك .. خوّة إنسان .. ** واحد ويسوى في عيونك قبايل !!
يا " شعر " تبقى في نظرهم كحيلان ** وبنظرتي تسوى عيال الحمايل !!
حنـّـا الثنين أخوان وأكثر من أخوان ** لو ما إجتمعنا بالنسب والسلايل !!
لو نختلف بأسماء وعروق وأوطان ** يبقى التشـابه بيننا بالخصايل !!
وأنا إلا منـّـي نويت أكسب إنسان ** أسعى له بكل السبل والوسايل !!
آعرْف كيف آردّ الإحسان بإحسان** وكيف أحصد بذور الفضايل .. فضايل !!
عايش زمن عاصرت به كل الأزمان ** ما آعيل بس أنطح .. ثمانين عايل !!
أكسب عدوّ وأحرق به قلوب عدوان ** أشعل فتيله .. بس أطفـّـي فتايل !!
إن خفت ضعف .. آخاف من ضعف الإيمان** وإن عفت حمل .. آعاف حمل الجمايل !!
ما أظمى على الساحل ولو متّ غرقان ** لو مركبي تابوت والموج هايل !!
أغرق شهيد .. أرحم من آموت عطشان** طيحة شموخ .. ولا وقوف متمايل !!
ودّك إلى من جيت في كل ميدان** لو منت الأوّل .. بالصفوف الأوايل !!
خلّك ليا عوّدت خسران .. خسران ** ينقال عنـّـك .. عاملٍ لك .. عمايل !!
لاصرت تحلم .. إحلم تكون سلطان ** وإن جيت تقنع .. إقنع بحلم زايل !!
الوقت غربه وآخر الدرب عنوان ** والعمر رحلة والتجارب رحايل !!
وأنا كثر مالي من الناس خلاّن ** اللّي صفوا لي بالصعايب قلايل !!
شايف حسد ؟! قل : شايف أشكال وألوان ** قابلك ظلم ؟! إلاّ لقيت الهوايل !!
وإن عشعش بصدري من الغبن شيطان ** وتسدّدت دوني جميع الوسايل !!
بلقى من عيال الحمايل كحيلان ** اللّي يكفي عن عيال الحمايل !!
مرّات ربـّـك يرزقك .. خوّة إنسان .. ** واحد ويسوى في عيونك قبايل !!
.
.