الـــــــــــزّواجْ ( 1 ) ..

[BIMG]http://1.bp.blogspot.com/_tFiZtpfSWpw/SwZDGZF_nUI/AAAAAAAAAFg/K_66g9_K-yY/s1600/Marriage.jpg[/BIMG]




من المتعارف عليه أن الـزواج قسمة و نصيـب ,

و هو قـرار صعب و يمكن يكون " مصيري " في حياة أي شخص ..

و الزواج له أسباب و دوافـع كثيره , و أحيان تكون غريبه و عجيبه ,

يعني لمـّا يجي الشاب و يقول أبي أتزوّج عشان أسّس عائلـة و يصير عندي عيال ,

أو لأن الشاب يخاف الله و ما يبي الحـرام ,

أو لأنـّه ملّ من الوحده و يبي زوجه ترافقه في هـ الحياه ,

فــ كل هـ الدوافع تعتبر معقوله و منطقيـه ,

اللي غير منطقي هو قرار الزواج علشان الأكـل ..!!

رفيقنـا" سعـد " طيـّب و على نيـّاته و قلبه أبيض ,

مشكلته إنه يحب الأكـل , و من كثر ما ياكل صار يميّز و يعرف حتى نوع العيش ( الرز ) اللي ياكله !!

قبل كم سنه قرّر يتزوّج و قالنا بكل صراحه إنه متزوّج لأنه تعب و هو ياكل من المطاعم ,

و يبي ياخذ له وحده " سنعه " تكون ربّه بيت و تطبخ له ليل و نهار ..

كان يتكلـّم بكل عفويّه و جديّة ,

حاولنـا نقنعه إن زمن أمه و جدّته إنتهى ,

الحين أكثر البنات ما يدخلون المطبـخ , و إذا دخلت " يا زينهـا " إذا سوّت سلطه ,

قلنا له شوف حواليك وش كثـر المطاعم ؟

لو البنات يطبخون كان هـ المطاعم خسرت و سكرّت من زماااااان ..

و بعدين يا " سعد " لا تغرّك برامج الطبخ اللي تطلع فيها منال العالم ,

ترى ما فيه إلا هي و الثانيه اللي تطلع على قناة دبي مدري قطر , هذولا آخر الحريم اللي يطبخون ,

أكثير برامج الطبخ اللي يقدّمها رياجيـل ..!!

حتى القناة السعودية قبل فترة جايبين لهم مصري إسمه الشيف محمد بهجت ,

و لا عنده من الطبخ غير السلطات !!


المهـم ..

" سعد " ما إقتنـع في كل الكلام اللي قلناه له , و مشى على رايه ,

و بعد شهر من الزواج طلـّق زوجته , لأنها طلعت ما تعرف تطبـخ غير البيض !!

و الحبيب كان معتقد إنه راح يتدلـّع بـ الأكلات و الطبخات ..

يمكن إختياره كان خاطيء , و لكن أساس إختياره كان هو أكبر خطـأ ..!!

المسكين ظلم روحه و ظلم بنت النـاس معاه و تخسّر و السبب بطنـه و شفاحته !!

لو فاتح له مطعـم بـ الفلوس اللي تزوّج فيها كان أزين له ..

ع الأقل يستفيد من شيء يحبـّه , و لكن اللي ما يطيـع يضيـع ..!!