|
رد: أَمُعَفِّرَ اللَيثِ الهِزَبرِ بِسَوطِهِ لِمَنِ اِدَّخَرتَ الصارِمَ المَصقولا
كثر التذمر من مقام تجي فيه
....................... يثبت بانك تشعر بقصر قامه
وكثر التولول .. ليه هذا وذا ليه
....................... يثبت بان الحسد نبض اللئامه
وكثر النصايح عن حرام ٍ تسويه
..................... يثبت بانك شخص ينشر حرامه
وكثر السوالف بالكرم بين اهاليه
....................... يثبت لهم بانك عديم الكرامه
وكثر افتخارك في كلام تنافيه
....................... يثبت بان افعال مثلك .. كلامه
وكثر انتقاصك من نعامٍ تماشيه
....................... يثبت بانك مثل مشي النعامه
وكثر اهتمامك في عدوٍ معاديه
........................ يثبت بانك طامعٍ باهتمامه
وكثر انتقادك للامام ومصليه
..................... يثبت بانك مانت كفو الامامه
وكثر الظهور بثوبك الزين يهريه
................ ويثبت بان اللي ورى الثوب خامه
وكثرة خصومك من كثير المشاريه
....................... يثبت بأنك ماتمل .. الملامه
ومن لايمل اللوم مالومهم فيه
.................... ان اثبتو من هالكثير انفصامه
مازاد عن حده قلب ضد راعيه
....................... حتى التاني في كثيره ندامه
اللي عن الطولات يكثر تأنيه
....................... ماتنفعه دون المعالي سلامه
كل شي يكثر ظاهره عن خوافيه
................. يعكس مدى كثره شعور انعدامه
|