يقولون لي ضاقت وأنا أقول مفروجه
وعندي يقين ان الله اللي يفرّجها
خيول الأمل عندي على طول مسروجه
ونفسي تفاؤلها مع النّاس يبهجها
...
لو ان الزمن قاسي والأوضاع محروجه,
عسى الله علينا مايضيق مخارجها
لقيت الصبر ينفع مع الضيق منتوجه
ابصبر عليها بالمساير وادرجها
...
وابنهج دروب دوم بالطيب منهوجه
دروب النشاما اللي على العز منهجها
أداريك ياراسي عن الميل والعوجه
ما ابا الناس لا شافتك تكثر لجالجها
...
ياراسي تسامى واترك اللاش وهروجه
مادام انك دروب الفخر تسلك أبلجها
فضى الله وساع لساكه واسلك فجوجه
هو اللي لخير الخلق سهل معارجها
...
أنا خابرك ماتقبل علوم ممجوجه
تنقّى خيار السالفة قبل تهرجها
توكل على ربك والأوضاع مفروجه
هو اللي يضيّقها هو اللي يفرجها