انا عايشٍ في عـالمٍ مايشـيل إثنين
ياخبل الحسود اللي على ماش يحسدني
امد الوفا والقرب والقا الجفا والبين
ودنيـاي عن ما يسـعد القلـب تبعـدني
وعلى قد ماني خايف افقد من الغالين
ولافيه احد يهتم لو كان يفقدني
وانا لوبقول إن البشر كلهم غادين
فلاشك مخطي واكثر الناس ينقدني
ولكن حظي جابني في المكان الشين
ويمكن خطاي إني معي قلب قيدني
جبرني وقمت اشتاق وانشد عن المقفين
ولا شفت احد منهم عن الحال ينشدني
وانا خابرٍ تبع المقفين ماهو زين
ولكن قلبي للجفا مايساعدني
ليا جيت اسوي مثلهم قال رايح وين
وحذرني اسباب القطيعه وهددني
وانا علتي من قلبي الطيب المسكين
يمد الوفا للناس لو كان تجحدني
ولالي رجا في الناس من بعد صبر سنين
عسى الله على صبري بالإحسان موعدني