مارديت عليه...فكمل بعد لحظات واهو منقرف: وطبعا والاكيد ماراح يكون هناك شهر عسل... شهر العسل هذا خدعه مني للجميع...راح نمشي بالسياره الفجر للرياض..."
ولف عني وابتعد ودخل الحمام....
سكر الباب بقوة...غمضت عيوني بقوة...هذا كابوس...كااابوس...استحاله يكون حقيقة...ورفعت عيوني للسما...ادعي ربي بصمت...وقلبي يألمني..لدرجة اني حسيت انه بيوقف...
طالعت بوافي وهو يطلع من الحمام... كان لابس روب الحمام...ماطالع فيني نهائيا وكأني مو بالغرفة...مشط شعره على ورا واخذ يجفف بالمنشفه.....وبعد ما تاكد انه نشف رجع مشطه...من جديد....
شفته وهو يروح يفتح شنطته...ويطلع بيجاما عاديه لونها رمادي غامق...دخل من جديد للحمام...وسمعت انا صوت جوالي..كانت رسالة...قمت ولقطت الجوال ورجعت من جديد مكاني على الكنبة.. كانت عيوني تحرقني من كثر ماصحت...كانت رسالة من سلطان... طالعت بالرسالة للحظات وانفجرت صياح بصوت واطي...سلطان...يا بعد عمري...والله اني ظلمتك...كان يباركلي ويتعذر مني لأنه ماحظر العرس....
طلع وافي من الحمام وانتبه لي وانا ابكي وماسكه الجوال...مسحت الرسالة بسرعه...قبل لايمد يده ويآخذ الجوال مني...
صرخت فيه بعصبية: عطني الجوال...مو من حقك تآخذه مني بهالطريقة"
طالعني بعصبية وقال: نعععم؟؟؟...مو من حقي....اساسا هالجوال انسي انك تآخذينه معك..."
وطلع الشريحة وكسرها قدامي بقوة...زميت شفايفي بزعل...وانا اطالع بشريحتي مكسورة على الارض...وطنشته وانا ارجع اجلس على الكنبة من جديد...
قلت وانا احاول اخلي صوتي متماسك: اطلب لي بطانية..."
قال وهو يطالع بالسرير: نامي عليه...انا ماراح انوم...بطلع بعد شوي...ويمكن ماراجع غير قبل سفرنا بنص ساعه..."
قلت بتهور: وين بتروح؟؟؟..."
التفت جهتي وقال وهو يناظر الساعه اللي بايده: آها..بديت تتقمصين دور الزوجه الغيور ؟؟ ... مسرع يا ملكه..."
قلت بلا مبالاة: سقط سهوا... ولا على ايش اغار؟؟..."
وسفهته ودخلت تحت الفراش الدافي..وطبعا ما تمددت كنت جالسه بس...شفت وافي واهو يروح يجلس قبال التلفزيون...تأملته للحظات..وقررت اني اسفهه واعامله بنفس طريقته..بعدين اساسا انا ماكنت ناوية اعطيه وجه خير شر...مفروض ما ازعل لمن اشوفه يعالمني بذات الطريقة اللي انا كنت مقرره اني اعامله فيهاا!!!
بس!!...لو انا اللي بديت وعاملته كذاا كان احسن...كان حسيت بكرامتي...لكن حاليا وانا متمددة على هالسرير...حسيت شكثر اهو قسى علي بدقايق قليلة...شكثر ذرفت دموع بساعه وحده بس..شكثر قاعد يحتقرني...
انا كنت متاكده انه مفتكرني بنت صايعه موب خايفه من احد وماتفكر لا بحسيب ولا رقيب...لكن مو لهالدرجة؟؟...مو لدرجة انه يكره حتى اني انطق اسمه..
الله يستر من الايام الجايه...وكيف راح يعاملني قدام خالاته واهله كلهم....
حسيت بدزة خفيفه على كتفي...ففتحت عيوني بتعب...وبكسل...شفت عيون واسعه قبالي.. لمعت فيهم سخرية....خلتني اعرف صاحبها على طول...هزيت راسي بقوة...وبعدت عنه بسرعه..
قال بحنان فضيع: ملكه حبيبتي...هاذي عفاري والبنات يبون يطمنون عليك قبل ما نسافر.."
طالعت فيه مو مستوعبة...وضميت الفراش لصدري بقوة..
قلت بحرارة وبعصبية: بعد عني..."
رفع وافي حواجبه بسخرية وفتح السبيكر في الجوال...
عفاري وهي مفجوعة: ملكه عيوني...وشفيج تصارخين على ريلك؟؟؟...."
قلت وانا احاول اتمالك مشاعري وانفاسي: عفااااري....اشتقت لكم كثير..."
عفاري وهي شكلها صدق خايفه علي: وافي سوالج شي...قالج شي...زعلج بشي..."
طالعت بوافي اللي يبتسم بسخرية وكأنه يقول اتحداك تقولين لهم على سواد وجهك...
امتلت عيوني دموع ورميت الجوال بقوة من يده واعطيته قفاي وخبيت راسي تحت المخده وقمت ابكي بحرارة..وانا احاول اكتم صوتي بايدي...
سمعت وافي يقول لعفاري: اكلمك بعدين..."
وقفل الخط مباشرة...سمعت خطواته واهو يقرب مني...وحسيت بحجمه على السرير...فضميت نفسي بقوة...مسكني وافي بقوة من اكتافي وسحبني قريب منه...
قال وهو يطالع بوجهي منقرف: لو غلطتي هالغلطة مرة ثانية...ماراح يصير لك طيب.."
حسيت بانفاسه تحرقني وهو قاعد يتنفس بسرعة...
قال واهو يشدد على كل كلمة ينطقها:تتصرفين قدام الناس بشكل طبيعي...ما ابي هالشكل الماساوي نهائيا....فاهمه؟؟..."
طنشته ومارديت فصرخ فيني بقوة: فاهمه؟؟؟.."
رديت عليه وانا اضربه بقوة على صدره:اتركني يا حشرة..."
وليتني ماقلت حشرة...وليتني ماقلت اتركني...وليتني ماضربته...
مسكني وافي بقوة...من اكتافي واخذ يهزني بقوة واهو يصرخ فيني كأنه مو مصدق جرأتي: انااا حشرة...وانت وش تكونين؟؟؟...هااا قوليلي؟؟.."
قلت بعناد وبعصبية وانا احاول ابعد يدينه عني: انا ملكه...فااااهم...انا انسان....بني آدم.. عندي احاسيس موب مثلك..."
ضحك بقوة فجأة ووقف يهزني..طالعت فيه بخوف: ملكه...ههههههههههه...احد ضاحك عليك...هههههههههه...انتي عنكبوت...عارفة وش يعني عنكبوت...عنكبوت صغير...قذر...يبني بيته بالمكان غير المناسب..."
عنكبوت؟؟..الرسالة...اهو اللي ارسلها...صرخت فيه بجنون...وغمضت عيوني بقوة وانا ابكي وقعدت ارفسه برجولي واهو قاعد يضغط على اكتافي بقوة عشان اوقف...واحس اصابيعه قاعده تنغرز وتألمني بلحمي: انت ولاااا شيييء... اتررر رررركني يا حيواااان...اترركني..."
ركزت قوتي وانا اشوفه يضحك ببرود على رجلي اليمين...ورفسته بقوة...باقوى ماعندي على رجله...فرماني واهو متألم...ولمن حاول يمسكني مرة ثانية...قعدت امخشه بطريقة عشوائية...وغرزت اظافري بوجهه بقوة...رماني بقوة على الارض...فضرب راسي بحافة الكنبة...وحسيت بصداع فضيع...
شفته يروح يدخل الحمام....وحاولت اوقف..بس الالم منعني اتحرك....
الساعه 4:00ص
تحركت من على السرير بتعب...وحسيت للحظه وكأني احلم...وش جابني على السرير... انا ضربت وافي...وطحت على الارض...اكيد هذا عقلي الباطن...
سمعت صوت المنبه حق وافي يدق بقوة... قومني من عز نومتي...واهو لسه نايم.. تحركت بتعب من على السرير....لامست الارض وقعدت اترنح في الم فضيع بجسمي..كتوفي تألمني وراسي...وقلبي....
اخيرا..صحى وافي وقفل ساعته بعصبية...شفته يجلس وانا احاول امشي بهدوء عشان ادخل الحمام...
تلاقت عيونا..فصديت عنه بسرعه..بلعت ريقي بتوتر...وكملت طريق للحمام... دخلته ...وقفلته وراي وجلست على الارض دقايق احاول اتماسك...خصوصا اني احس بغثيان فضيع...ولازم ارجع عشان ارتاح...
شفت وجهي بالمراية...كنت افجع.. من يصدق اني عروس...وين لمعة عيون العروس؟؟.. وين تورد خدودها؟؟...وين ابتسامتها الواسعه؟؟...
غسلت وجهي بقوة كذا مرة...وفرشت اسناني بكسل...وحاولت ارتب شعري المتلفلف بشكل عشوائي..لقيت بنس جنب المراية من اللي تركتها امس وانا افكك شعري...حطيت بعض الخصل ورا اذني...وحاولت ارتب كل هالخصلات المتمردة...
طلعت من الحمام...شفت وافي قاعد يكلم بالتيلفون...انتبهت للجرح اللي على خده..تأوهت .. يعني حقيقة.. فلمست راسي لاشعوريا من ورا...مكان الطيحه ولاحظت انه يألمني بقوة..
انتبه لي وافي...فقال وهو يقفل السماعه: تبين الدكتور يشوفك؟؟"
مارديت عليه ورحت للشنطه وقعدت ادور لي على لبس مريح عشان السفر بالسيارة...
سمعت وافي يقول بعصبية وبصوت واطي مرة: لا حوول ولا قوة إلا بالله... اللهم طولك يا روح..."
خفت للحظات فقلت بتردد: مااا...احتاج..."
شفته وهو يمر من قدامي ويدخل الحمام...استغليت الفرصه وقعدت البس ملابسي بسرعه قياسية قبل مايطلع...
بنطلون جينز سماوي باهت.. وتوب بدون اكمام وردي بياقة مرتفعه شوي.. وقعدت ادور لي على شوز ناعم يناسب ملابسي...ولقيت صندل ابيض نعوم بكعب رفيع...لبسته وحسيت بالرحة وانا قاعده امشط شعري...وقلت لنفسي وانا اطلع المكياج من شنطتي..انا طول عمري متعودة على الزينة..ومو علشان عيونه اتركهاا...
كحلت عيوني بقوة...وحطيت روج لحمي على وردي باهت...ورسمت حواجبي زين...
طلع وافي وانا قاعده ادخل المكياج لشنطتي من جديد..طالعني من فوق لتحت...وسفهني وهو يطلع بنطلون جينز غامق وقميص اسود..عطيته قفاي يوم شفته يفصخ بيجامته ... وقح!!
سمعت دق الباب...وعرفت انهم الروم سيرفس... مشى وافي من قدامي فتح لهم الباب بعد ما اشرلي اجي يا يمين يا شمال....بيده..
دخل عربة الطعام...واول ماشميت ريحة الخبز حسيت بجوع فظيع...وبالم ببطني...
قال وافي واهو يأشرلي وكأنه يكلم خدامته: اجمعي اغراضي وحطيهم بالشنطة...ورانا خط...وبعد ماتخلصين تعالي كلي لك لقمه..."
حركت فكي بعصبية...ورفعت راسي وقلت وانا اجي عند العربة حقت الطعام" ...ابيك تعرف اني مو شغاله عندك...عشان كذاا..ياليت تتكرم وتجمع ملابسك بنفسك..."
وفتحت الغطا على واحد من الصحون وشفت الخبز..فأخذت لي توست محمص حار.. وصبيت لي كاسة عصير برتقال...
سكت وافي ولاحظت انه ماعلق...ولمن رفعت عيوني جهته..لاحظت ان وجهه محمر من العصبية...وكأنه يعد لمليون عشان مايطقني...ارتجفت شوي...بس حاولت ما ابين اني خايفه...
قال وافي واهو يقبض يدينه بقوة: اعتقد انك ما تمشين إلا بالطريقة اللي امس.."
ارتجفت ثواني وقلت وانا ارمي قطعة التوست اللي معي على الطاولة وبصوت هامس: حمااار!!"
ورحت للحمام عشان اشيل اغراضه...وانا العنه واسبه بداخلي..وبعد مادخلتهم كلهم بالشنطه...وسكرت الشناط...
لاحظت ان وافي طلع من الغرفة شوي...طالعت بالاكل وحسيت ان نفسي مسدودة عنه..فدقيت على الروم السرفس عشان يآخذونه...
رجع وافي وشافني لابسه عبايتي وجاهزة قاعد انتظره...وانا حاطه ايدي على خدي وجالسه على السرير..
قالي: تغطي....بسسررعه"
تغطيت بسرعه مثل ماقالي...وشفته يجي يمي وهو معصب..وأخذ يعدل غطاي بسرعه وبقوة...
قلت معترضه: اااييييي...كسرت رقبتييي!!!"
قالي واهو يرجع للباب: اششش....مابي اسمع حسك..."
شفت ثنين هنود يدخلون ويشيلون الشناط حقتنا...ولحقناهم انا وزوجي العزيز وافي...
حسيت بضيق وانا اركب السيارة..وتذكرت الذي مضى...لمن صفقت وافي كف بالسوق... يا الله شوفوا كيف الدنيا؟؟..مين كان يصدق ان وافي يتزوجني؟؟؟...ضميت نفسي بقوة وان اتسند على قزاز السيارة...
ثواني وركب وافي جنبي وشغل السيارة وانطلق بسرعه...
قلت له وانا اشوف يدينه السمرا واهو يقبض المقود بقوة وبمهارة..:ماراح نسلم على عمي سعود؟؟.."
طلع علبة سجايره من جيبه" لاااا...ماله داعي..مسلمة عليهم قبل خمس ساعات تقريبا..."
قلت بحرارة: ولووو...انا ماراح اشوفهم ابدد..."
طالع فيني وقال" ملكه...متى راح تفهمين...اني ماهتم برغباتك...ولا راح انفذها...عشان كذاا انسي تزورين بيت عمك..او حتى بيت اهلي..."
قلت بهمس: شكراا..."
قال وافي فجأة وبقهرر" لا تحاولين تحسسيني اني ظالم...لأنك راح تتعبين ولا بتوصلين لنتيجه..."
سكت منقهرة منه...وقعدت اتامل السيديات اللي قدامي واجربهم واحد ورى الثاني..دخلت اول واحد وطلع اغاني غربية.....فشلته..دخلت الثاني...لقيته امسية شعرية لعبدالرحمن بن مساعد...بس شلته نفس الشيء...والثالث..خليته مشتغل...
لاحظت ان فك وافي انقبض بشدة...وكان فيه عرق ينبض بقوة بجبينه...
ياحبيبي آنستنا...ربي تمم لنا انسنا...بالسعاده والهنا...يوم ماشرفتوا هنا...ياحبيبي آنستنا...
عدلت جسلتي وانا اتامل الطريق...بينما لف وافي على محطة بنزين..ونزل...
والله...والله ماخبي عليكم...انا ماخبي عليكم...اني عايش في جحيم الانتظار...والفؤاد اشتاق اليكم...بالدقايق والثواني تزيده نار...
بالسعاده والهنا يوم ماشرفتوا هناا....يا حبيبي آنستنا....
الحمدالله على السلامه الف مرة...انت سيد اهل الوسامة والمسرة...ياعطوفا في كلامك يا ابو سمره...يارقيق الابتسامة وكل نظره...
شفت وافي يرجع ومعه كيس فيه اغراض...وناولني الكيس..او بالاصح حطه بحجري ورجع يتكلم مع العامل وعطاه فلوس...وشفته يشكره بحرارة هذا الاخير...ورجع ركب جنبي...وحرك السيارة...ولاحظت ان وافي اخذ يردد الموال بحماس...وانا كنت مبهورة بصوته الحلوو...
ودع الصبر...ومحبا ودعك...ذائع من سره ماستودعك...يقرع السن على ان لم يكن...زاد في تلك الخطا إذ شيعك...يا اخ البدر ..يارعى الله زمان..ارجعك.... ان يطل ليلي بعدك..فلكم بت اشكو قصر الليل معك...
الحمدالله على سلامه الف مرة...انت سيد اهل الوسامه والمسرة...ياعطوفا في كلامك يا ابو سمرة...يا رقيق الابتسامة وكل نظرة...
بالسعاده والهنا...يوم ماشرفتوا هناا...ياحبيبي..آنستناا...
مشينا بالطريق مكملين دربنا خارج دبي...فتحت الكيس اللي معي...وشفت فيه عصيرات متنوعة...وساندويشات ساخنه...
ناولت وافي آيس تي...وساندويش جبن حلوم....ولا تسألوني ليش؟؟؟..ببساطه حسيت انها شغله ذوقية...والحمدالله انه ماكسر بخاطري واخذ الآيس تي وحطه قدامه وأكل من الساندوتيش...
تأملته واهو يآكل...وحسيت بشي غريب..وقعدت اتامله متنحه...للحظات..اكيد اي وحده غيري بتكون مبسوطة إذا تزوجت وافي...وسيم...وصوته حلو..وغني...واجتماعي..لكن اناا...دمعت عيوني فغمضتها بقوة...انا هبله!!...
فتحت عيوني فجأة واستغربت يوم شفت مافي اي غطا على وجهي...وكان وافي يتأملني... وفجأة تجعد وجهه بقرف...وطلع السيدي ورماه خارج الشباك...
قال وهو يشرع بسواقته فجأة: طبعا..تذكرتي حبيب القلب..او اقول حبايب القلب"
صديت عنه بألم....اي حبيب قلب واي هم...
قالي بعصبية: غطي وجهك....مانبي فضايح...."
تغطيت اي كلام...وحاولت اني ما اطلع صوت وانا ابكي...مالي معه إلا كم ساعه وكرهت الدنيا..
شغل وافي الراديو وكانت الاخبار....رفعها على آخر صوت...وكأنه مشمئز من صوتي وانا ابكي....وطلع سجايره واخذ يدخن بشراهة لدرجة اني خفت بالاخير يوقف ويرتكب فيني جريمه!!
قال وافي ببرود: كلي لك لقمة...تراك ما اكلتي شي من امس"
طالعت بالساندويش اللي مده لي..كنت توني قايمه من النوم...راسي مصدع مرة...
قلتله وانا ااشر على بره: وقف بسرررعه!!"
كان بيعترض بعدين يوم شافني على وشك ارجع..اضطر يوقف بسرعه ويلبق السيارة على جنب...
فتحت الباب ونزلت ركض من السيارة لين ماوصلت للسياج اللي على الطريق وكشفت غطاي واخذ استفرغ بقوة...وماوقفت إلا بعد فترة طويلة شوي...
شميت ريحة عطر وافي وراي...ناولني قارورة موية..اخذتها منه..فتلامست يدينا..فرميت قارورة الموية متقرفة...ورفعت وجهي المليان دموع اطالع بوافي...
ضيق عيونه....وزم شفايفه بقوة...وقال بصوت حار"إذا خلصتي تلاقيني بالسيااارة"
هزيت راسي له..ومسكت قارورة الموية..وغسلت وجهي وتمضمت كذا مرة... وبعدها تيممت عشان اصلي...
فتحت الباب ولقيته سرحان وهو يدخن..قلت له بصوت خافت" ابي سجاده..."
قال لي واهو يصد عني اكثر" في الشنطة..."
رحت ورا للشنطة...ولقيت السجاده خارج الشناط...
رجعت للسيارة وقلت بصوت عادي بارد: ماراح تصلي؟؟.."
طالع فيني ببرود وقال: مصلي من قبل لاشوف اشكالك..."
غمضت عيوني...اوكيه..اهانه حلوة...مردودة لك يا وافي...مردودة والله مااخليها...
رحت فرشت سجادتي...وصليت الظهر والعصر جمع وقصر...
ورجعت للسيارة...وسكرت المكيف اللي قدامي...وضميت نفسي بقوة ورميت راسي بتعب على المقعد...
قال وافي واهو يحرك السيارة" حاولي تاكلين شي..خلاص مابقى لنا غير ساعه...."
قلت له وانا مو مصدقه التفت حولي: دخلنا السعودية؟؟؟..."
قال واهو يضحك" هههههه...صح النوم...داخلينها من اول...من ثلاث ساعات تقريبا..."
قلت بعتب: ليييش ماقلتلي؟؟؟.."
وعدلت جلستي وقعدت اتامل الطريق...واخذت لي علبة عصير مدها لي وافي...استغربت من اهتمامه بصحتي...وبعدين فكرت بهزء..طبعا لازم يهتم بصحتي...علشان إذا شافوني الناس...والله وممثل شاطر يا وافي!! لقيت نفسي اطالع للعصير بقرفه ولا قدرت اشربه نهائيا...
وصلنا اخيرا الرياض...رحله طويلة ومتعبة...للاعصاب والجسم...وقفنا عند بيتزا هت..وطلبنا بيتزا كبيرة وسلطه...ورحنا للعمارة اللي وافي ساكن فيها...توقعت اني اكون ساكنة بفيلا لكن مو مشكله...كله بيت بالاخير..بس المصيبة بالشقه ان مافي مجال للهروب من المواجهات الطارئة بيني وبين وافي...لكن ربي يحلها ان شاء الله....
دخلت العماره...وشفت وافي يعطي البواب مفتاح السيارة عشان يطلع الشناط فوق...ورحنا ركبنا المصعد...
اول مادخلناه...دق جوال وافي...فطلعه من جيبه...وابتسم وهو يشوف الرقم...وقال وهو يطالع فيني: هلاااا والله....هلا باهل دبي...."
اول ماقال دبي..رفعت راسي لا شعوريا....عفاري يا بعد قلبي وسماح وحشوني كثيير...
قال وافي: افاااا....هذا وانا خالك....طيب...يجيلك يوم يا آنسة عفراا...طيب..خذي...هاذي ملوكة نور عيوني.."
طالعت فيه بغيض..قال نور عيوني قال..ههه...اصلا باين انه ممثل واستحاله ان عفاري صدقته...
اخذت الجوال منه: عفرااااااااااا....."
صرخت بفرح فاشرلي مفجوع عشان اقصر صوتي....طنشته...وصلنا اخيرا الدور اللي ساكنين فيه..
: الووو...والله انا اللي اشتقت لك موووت...لااااا..ابدا كنت متضايقه شوي...يا بعد عمري... يمكن حسيت بالوحده..لااا ابدا...اساسا حياتي مع وافي من بدايتها تشرح الصدر وتبشر ببداية علاقة رائعه...نعععم؟؟...ههههههه...من عيوني يا الغلا...باااايو"
عطيت وافي الجوال وقلدني: من عيوني يا الغلا...باااايو"
قلت له وانا اتبعه: ترى مالي خلقك..."
لف علي وقطب حواجبه: موب اخوك الصغير عشان تكلمين معي بهالاسلوب..."
سكت للحظات وقلت بصوت ماعرفته: اخوووي..ميت!!"
لاحظت ان وافي صنم لثواني...وبعدها طنشني..وراح للشقه..وفتح بابها...
قال لي بتريقة يوم جيت ادخل: برجلك اليمين يا عروس!!"
طالعته بقهر وعناد له دخلت باليسار...
طالعت بالمكان من حولي...شقه انيقه...كبيرة حيل..مرتبة واثاثها عصري جدا..بس لاحظت ان فيها غبار...
كحيت بقوة وقلت بسخرية وانا افصخ غطاي: وااااااااااو...المكان مرة نظيف..."
قال وافي واهو يحط الاكل على طاولة الاكل اللي بالمطبخ المكشوف على الصاله: انت اللي راح تخلينه النظافه بعينها..."
قلت وانا اجلس على الكنبه: يعني...تبيني اشتغل وانا بصباحيتي..."
ضحك بسخرية: ههههههههه...لااا بساعدك لا تخافين..اخاف يغمى عليك..."
وكمل وهو يأشرلي على الغرفة اللي جوه: هاذيك غرفة النوم حقتي..."
قلت بحماس: وانااا؟؟؟....غرفتي وين؟؟..."
طالعني للحظات وبعدين ابتسم بخبث:للاسف مافيه غير غرفة وحده في الشقه ذي... لكن...بما اني انسان عطوف جدا...راح اتكرم واخليك تنومين فيها اليوم بس....مفهوم؟؟؟.."
هزيت راسي بتريقة: مفهوم..."
جلس على الكرسي..وطلع البيتزا من الكيس. ...وقالي: جيبي كاسات..."
قلت وانا ادخل المطبخ: ان شاء الله مستر وافي..."
وطلعت كاسات وجيت وجلست بعيد عنه بثلاث كراسي...وقعدت آكل وانا ساكته...
قلت عشان اكسر الصمت: الجو حيل بارد..."
طالعني شوي يمكن ثواني....وما رد...
قلت بلقافه: من وشو؟؟.." وانا اشر بعيوني على الخدش اللي بحاجبه...
لمس حاجبه كأنه يتذكر: آه...من زمان...يوم كنت صغير..."
كمل وافي وهو يبتسم: كنت حيل شقي..اذكر اني خطفت القطو حق جيرانا....لأنهم ماخلوني العب مع بنتهم اللي كنت احبهااا..."
حسيت بطعنة قوية....غيرة؟؟..انا اغار..صدق اني موب صاحية...لكن ايه اغاااار...قاعد يكلمني عن حبيبة الطفولة...وبكره حيكلمني عن حبيبة المراهقة..وبعده عن حبيبة المستقبل..
حسيت ان نفسيتي انسدت بينما هو وصل لنهاية كلامه وقال: وهذا هي النهاية....سووا لي عملية وبقى اثرها لهالحين.."