2010- 3- 17
|
#34
|
|
متميز في الفنون الادبيه
|
رد: قصة طويلة جدااا *_*
لمن رجعنا البيت...كانوا الكل منهبلين علي وعلى مهاا بعد ما شافوا السباق الحامي بيناا.. ولدرجة ان حصه كانت شوي وتصيح وهي تلمسني انا ومهاا ميب مصدقة عيونها اننا لسه عايشين..
وافي لمن رجع وقف... الكل كان يتكلم عليه...بس عيونه كانت علي انا ولا طالع بحد غيري .. وهالشيء خلاني امووت خوف.. عيونه الحمر.. سجايره المشتعله وحده ورا الثانية.. الازعاج اللي حولنا...كل هالشيء خلاني اجلس مع الحريم ولا احاول احتك معه...
حصه وهي تهمس بأذني: روحي شوفي رجلك....كنه يبيك!!"
طالعت بحصه وعيوني مفتوحه على الاخير: ها؟؟...قالك شيء؟؟.."
حصه بحنان: لااا ماقال لي بس ولدي واعرف وشلون يفكر يا ملكه... مدري ليش احسه انه ضايق..اكيد انت بتعرفين له!!..يمكن خاف يوم شافك تصيحين...!!"
: لااا ما اتوقع...يمكن...لأنكم تكلمتوا عليه...عششااان السرعه.."
حصه وهي تطالع بالسما: اناا ندمانه...لكن وش اسوي..وش اقول؟؟.. هو اول مرة يتصرف بهالطريقة.. كان شوي ويصدمكم..."
بلعت ريقي بخوف...وهربت من عند حصه ونظراتها..ولا رحت يم وافي اللي كان جالس مع الاخت مرومة وحنان ومهاا اللي كانت حيل زعلانه عليه وتعاتبه وتتكلم على بنت خالة امها الدلوعه..اللي شوي وتقعد بحظن وافي..
اول مالفيت ورا البيت..مسكتني ابتسام اللي كانت ماسكة جوالها...
ابتسام بفرح: واااااااو..وناسه يا ملكه...ليتني ركبت معكم..."
: كان جيتي!!"
ابتسام بقهر: زوجي يعيي...يقول هذولي عيال خالتي... لو انهم خواني عاادي.."
: اهاا....."
وسرحت افكر بوافي وطوايف وافي... لو تدرين يا ابتسام وافي وش يفكر؟؟..يفكر اني ابي اخوه.. اني ابي اغري اخوه الصغير المصرقع....ياررربي سترك... خااايفه حيل... خايفه تصير مصيبة بيني وبين وافي...
ابتسام وجوالها يدق:لااازم اروح هالحين...هذا متعب وعدني يمشيني عند الخيل.."
كنت بقولها لا تروحين بس ابتسمت بالغصيبة: مع السلامه..."
رحت لمجلس الحريم الخارجي... بعد مابدلت ملابسي بغرفة مهاا... كنت لابسه بنطلون جينز ناعم وبلوفر اخضر انعكس على لون عيوني بشكل مرة حلوو....
كان الوقت تقريبا العصر... والاغلبية نايمين...الجده كانت نايمة....وثنتين من خالات وافي الكبار... رحت يم عجوزنا...وقعدت احوس ادور بطانية ثقيلة عشان اغطيها...
تمددت اشوي ابي ارتاح..بس ما امداني اغمض عيوني..إلا ومجموعة بزران جايني وماسكيني مع ايدي..
: وشو؟؟..هاا يا بعد عمري..وش تبون؟؟.."
واحد من البزران: خالة مهاا تقولك تعالي لمهاا"
: قولوا لها تعبااانه..."
البزر الثاني بترجي: لالالالا....الله يخليك بتسوي لنا مسابقة بالمسبح...وتقول ماراح اسويها الين ماتجين.."
طالعتهم بيأس وقمت معاهم..ورحنا ركض لمهاا اللي عند المسابح...
مهاا اول ماشافتني: زييييييييين وافقتي تجين.."
: يا مهااا....حرام عليك تعذبين بهالبزران عشان يسوون اللي انت تبين..."
وقلدت البزر: خالتي مهاا تقووول.."
ماتت ضحك مها: هههههههههههه يقطع شيطانك..اوقفي بس لمي..ترى بنسبح بعدها..."
: وشوووووو؟؟...بررررررررررد....بعدين ما اعرف اسبح.."
مهاا وهي تكلم البزران وتكلمني: يله اوقفوا بصف مستقيم....وش فيك الله يهداك هنا دفا.. ماتحسين بالدفاا..؟؟...وإذا على السباحه فيه لستك كبير وفيه فلينه تشوفينها هناك.. وخلك باللي موب عميق..."
: مهااا..ماجبت ملابس سباحه..."
مهاا باصرار: مقاسي ومقاسك واحد...بعطيك لبس من حقاتي..."
: اناا انحف منك!!" وبغرور..
مهاا وهي تطالعني وفاتحه فمها: لاااا والله....اقول احمدي ربك ان مها بنت آل بتعطيك من ملابسهاا يله اسكتي ترا صجيتينا موب قادره ابدا.."
سكت مضطرة..ورحت اساعد البزران عشان يوقفون بصف واحد...وانتظرنا دقيقة وصفرت مهاا عشان تبدا المسابقة....
كنا متحمسين انواع التشجيع والصراخ والتصفير للبزران.. عاد انا صراحه ماشجعت غير ولد صيته ماعرف غيره...بعدين كافي انه ولد اخت وافي فشيء طبيعي راح اميله اكثر من البقية...
مهاا وهي تصارخ: بسرعه...بسرررررررررررررعه...لا تخليه يسبقك... يا غشااااااااش شفتك.. مطرود...يله برى برااااااااااااااااا.."
!!...
قعدت اضحك على حركات مهاا التلقائية والطفولية...تشبه عفاري كثير...ياااااااااااه اشتقت والله لعفاري وسماح...ما ادري متى راح اشوفهم..ودي اسولف معهم ونرجع مثل اول... اول ما جيتهم كيف كانوا يحترموني ويحبوني...قبل ما اصير ضيفه ثقيله عليهم لدرجة انهم تخلصوا مني مرتين بابشع طريقة...
تنهدت وانا اشوف مهاا توقف المسابقه وتطرد البزران عشان ينظف المسبح... وما انتبهت إلا وهي تأشر لي..
: نعم؟؟.."
مهاا وهي تعطيني المفتاح: لا تخلين احد يدخل...بروح اجيب لك ملابس من ملابسي.. وبجيب اللستك اللي خالي وافي انفخه..."
: ان شاء الله..."
وقفلت باب المسبح وقعدت اطالع بالماء وانا سرحانه..ارتعشت وافي.. وافي في مرحلة زمنية معينه ارتبطت ذكراه بذكرى الماء والمسابح والغرق...تنهدت بمرارة..وهالحين وش ارتبطت ذكراه فيه؟؟..ارتبطت بالالم والمرارة والحقد وكل المشاعر السلبية اللي يثيرها فيني...
طق الباب حق غرفة المسبح..فرحت فتحته.. كان وافي...وقفنا متنحين..ما كان متوقع يشوفني.. ولااا انا بعد!! حاولت اسكر الباب بسرعه...فضربت برجله وصرخ بألم...
فجأة قدر يدزني داخل وقفل الباب وراه: اخيرا لقيتك!!"
بلعت ريقي بخوف:.............
وافي وهو يحط ايده على رقبتي: وش الاستعراض السخيف اللي سويتيه عند مشاااااااااري ؟؟.."
حاولت ادزه بعيد عني كان راصني على الجدار ويضغط على رقبتي بدون تفكير....
: آآآآآآآآآآآآآآآآآآآآآه.....ماسويت شيء..فكنييييييييييييييييي"
وافي وهو يصرخ بوجهي:ماسويتي شيء..كل هذااا وما سويتي شيء...الله يآخذك...قولي آآآآآآآمين....ناوية تفضحيني عند الكل...!!"
بكيت بحرارة وانا احاول ابعده كان راصني على الجدار بقوة ويدينه تحوط رقبتي...
صرخت فيه وانا احاول امخش وجهه: خلنييييييي.... انااا حررررررررررررة ...فاااااهم ؟؟ ... فكنييييييي...اصلك حقيييييييييير..."
وافي وهو يشيل يده عن رقبتي:هذا بس تحذير بسيط....عشان ماتقربين من مشاري الايام الجايه...ولوو...بس سمعت انك كنت وياه...قسم بالله لاذبحك ولا يهمني..."
وكمل وهو ينفض يدينه وكأنه متقرف من دموعي:على الاقل بخلصهم من عقربة قذرة..."
كنت جالسه على الارض احاول امسح دموعي والمس رقبتي اللي تألمني..مجنون.. اكيد هالرجال مجنون...اكرررررررههههه...اكرررررررررررههههههه...
صرخت فيه: اكررررررههههههههههههك...يا حثاله..."
طالعني من فوق لتحت: ماطلبت حبك...ولااا ابيه..."
لاشعوريا صرخت فيه: صح...لأنك ماراح تحصله...اساسا انا عطيته لشخص يستاهل مو واحد مثلك...."
وندمت على الكلمة اللي قلتها..لأنه رجع علي بسرعه....بس لميت نفسي بقوة كنت ميتة خوووف منه..!!
سمعت صرخته وهو يضرب بأيده بقوة في الجدار...وطلع وخلاني..
شفت مهاا جايه وصدمت بوافي...وكأنه تكلم عليها او قالها شيء... رحت بسرعه يم المسبح وغسلت وجهي زين...كذا مرة...
جات مهاا وجات وراها حنان وابتسام ومرام معهم....
اعطتني مهاا الملابس..فرحت بدلت بسرعه بالحمامات اللي داخل الغرفة...كان شورت وتوب بس مطاطي شوي...
رجعت لهم...وكنت خايفه موت من المسبح اللي مو عاجبني اني ادخله...بس توكلت على الله ودخلته...
وجات مهاا وراي وابتسام ومرام وحنان...وكانوا طبعا كلهم يسبحون عادي...وسحبوني وانا لابسه اللستك.وجيت معهم بالنص...كنت خايفه حيل...اشوف الموية تحتي.. عميييييييقه مالها قرار..
مرام بدلع ماصخ: فيه احد مايعرف يسبح في هالزمن؟؟..."
طالعتها وكان ودي اخرب مكياجها الثابت..الله يخلي التاتو...
: ايه اناا.." طبعا قلتها وانا اقلد صوتها الناعم حيل..وابتسم...
حنان فهمت تريقتي فماتت ضحك: هههههههههههه.....بالعكس احلى..هذا يدل على النعومة..."
مهاا كانت تسولف مع ابتسام ويغنون بأعلى صوت ويلعبون بالموية...لكن اناا ماقدرت اتسلى وياهم...تفكيري كان بوافي... خنقني...يمكن المره الجايه يذبحني...هالرجال يخوف .. يخوف حيييييييييل.....
حسيت ببرودة مفاجئة تقبض قلبي بقوة... وامتلت عيوني دموع.. تتوقعون لو اني متزوجة مساعد كان صار هالشيء؟؟..لا يمكن...لأنه دوم راح يخليني بأحظانه... دوم راح يحبني. راح يسأل علي.. ماراح يخليني انوم لوحدي...
طفرت دموعي بغزارة من عيني ولاحظت ان كلهم يناظروني مستغربين.. فتركت المسبح وفصخت اللستك عني ورحت ركض لغرفتي...
دخلت غرفة النوم.. ماكان فيها احد..انهرت ورا الباب... وحطيت ايديني على وجهي.. وبكيت بحرارة.... بكيت كل شيء بذيك اللحظه...بكيت هلي...بكيت عمي..بكيت جاسر.. بكيت حتى مساعد وسلطان...بكيت نفسي.. بكيت حياتي المحطمه مع وافي...
لو بسس..آآآآآآآآآآآآآه لو..وش بتسوين يا لو؟؟..لا انت لا مقدمه ولا مؤخرة... لا مخففه علي الالم ولا شايلته بالمرة؟؟..
قمت على شنطتي وطلعت لي بيجاما...دخلت الحمام واخذت لي شاور حار.... ولبست بيجامتي...وطلعت....
لقيت وافي متمدد على السرير وكان يدخن...طالعني بسخرية..
وافي ببرود: يعني كان لازم التمثيلية هاذي قدام هلي؟؟ لازم تخلينهم يعرفون وشلون احنا عايشين...ههههههههههه...مهاا جات تكلم علي وتطلب مني اشوف سيادتكم..ههههههه"
سفهته ولا رديت عليه...رغم ان عيوني على طول امتلت دموع....
وافي بتشفي حقير: ترى دموع التماسيح ما تأثر فيني..خلاص...لعبه قديمة...العبي غيرهاا .."
ماقلت له شيء رحت للتسريحه امشط شعري....لاحظت انه يناظرني... واحترت وش اقيم هالنظرات فيه؟؟.. لاااء ماكانت سخرية او حقد...كانت شيء ثاني..
وافي فجأه: ليش قصيتي شعرك؟؟.."
غمضت عيوني بقوة....اتذكر الرجال اللي بملابسهم البيضا... اللي سحبوني بقوة.. وحلقوا شعري..حلقوه كله...آآه..حتى انهم جرحو جلدتي بجروح مازال اثرها موجود براسي...
فتحت عيوني من جديد وقلت بسخرية :في المستشفى حبو يخلوني على الموضة!!"
تتوقعون كلمتي كانت رصاصة؟؟..يمكن....لأن وجه وافي بهت... وكأنه ماتوقع هالجواب ..
: حلقوه؟؟..." وافي بعدم تصديق...
ابتسمت له وانا اترك المشط من ايدي: ايه..على الصفر..ههههههه...عادي مرة..جابو المكينه وحلقوه... وكان بيشيلون جلدة راسي بعد..."
واضفت بسخرية وانا احط كريم مرطب على يديني واجلس على الكرسي: الصراحه مالهم حق.. مفروض يكونون متدربين..."
حك وافي جبينه وسكت للحظات طويلة.. كنت ابيه يطلع بس شكله ماراح يفارق الغرفة.. حطيت على رجولي كريم بعد..
وافي وهو يقوم من على السرير ويوقف قدامي: ارفعي راسك...طالعيني....."
مارفعت راسي له...لأن عيوني كانت غرقانه دموع...إلا وافي...ما اقبل شفقته.. لأنه حقير ...
رميت الكريم من ايدي لمن رفع راسي باصابعه...ماطالعت فيه....لأن دموعي قامت تنزل بسرعه...وكأنها تبي احد يمسحهاا...
لمسة وافي..احرقتني..كهربتني...حسيت كأني قشه واشتعلت بسرعه..
بلعت ريقي بصعوبة: وشوو؟؟..وش تبي؟؟.."
ووقفت بكسل ابعد عنه: تبي عشا؟؟"
طالعني لحظات: ابيك انت..."
وقفت فاتحة فمي للحظات مو مستوعبة وش وافي قال؟؟...يبيني انااا؟؟..بس مو انا اخونه .. ما احافظ على سمعته؟؟...وش يبي فيني؟؟...
قلت بتريقة بعد فترة صمت طويله شوي: اهاا...تبيني اناا؟؟؟...ههههههههه.... هههههه... صاير تعرف تنكت يا وافي..."
وافي بسرعه رغم ان وجهه شحب بقوة: مدري عنك...يعني وش ابي؟؟..ابيك تسكتين... لأني ما احب انك تحكين لي قصة حياتك..."
وكمل وهو يتمدد على السرير: جيبي لي عشاا......"
هزيت راسي له بطاعه وبإحباط...رغم اني هزئت فيه....إلا اني كنت اتمنى لو شوي..بس يقولي كلمة وحده....لكن انا هبلة..وش كنت متوقعة من وافي؟؟.
...ورحت طلعت من الغرفة ابي اروح المطبخ....دخلت المطبخ...ولقيت الشغالات طلبت منهم يحطون عشا لوافي بسرعه...وكان ورا المطبخ فيه زي المراجيح كبيرة..رحت لها بس وقفت يوم سمعت صوت بنات هناك...
مرام بدلع: عمركم ماراح تفهمون شعوري....احبه....اهو كل شيء بحياتي..."
**:طيب..لازم تدافعين عن حبك بكل الطرق..."
مرام وهي شوي وتصيح: متزوج..وزوجته جميله...وماعاد يحبني مثل اول..حتى طلب مني اني اقلل اتصالات له..آآآآآآآآآآه.."
**: اقول...والله شكل زوجته ميب دارية عنه...اساسا انت لاحظت انه ركبت مع مشاري في السباق...هذا يدل على اثنين.. انها متهاوشة معه...والثانية...ان الهوشة علشانك.."
مرام وهي تصيح: آآآآآآه...شلون اخليه يطلقهاا؟؟...شلوووووون؟؟.."
**: فيه مية طريقة وطريقة"
كنت ابي اسمع اكثر..بس طلعتلي الشغاله وقالت انه خلصت..طبعا انا اساسا كنت متأكده ان مرام تحب وافي...ياليته يطلقني يا مرام..ياليــــــــت...
اخذت صينية العشاا...ورجعت للغرفة....حطيت الصينية على الطاولة....بس لاحظت ان وافي حاط ايده على عيونه....توقعته نايم...لذا ترددت شوي...
سمع وافي حركتي فشال ايده عن عيونه....طالعني وهو مضيق عيونه بقوة.....
اشر لي على راسه: بندول..."
دورت على بندول بشنطتي بس مالقيت... كان وافي شاد شعره بقوة..اشر على صيدلية الحمام...رحت لها...فتحتها فلقيت فيها انواع الحبوب...وهالشيء خلاني اوقف منهبلة وانا اطالع...وافي تعبان..تعبااااان...سمعته صراخه..فقمت ادور واحوس على البندول....
ورحت اعطيته اياه وناولته كاسة ماء....ووقفت قريبة منه اشوفه وهو يحط المخده فوق وجهه ويصرخ صرخات مكتومة...
اختنقت..وحسيت اني مو قادرة اتنفس.... وطحت على الارض اطالعه....كان هو على السرير يتألم بشدة....ويتلوى..وانا مو اقدره اسوي له شيء..
وافي وهو مغمض عيونه: لا تطالعيني كذاا...."
قربت منه بتردد..لمست شعره وبعدته عن وجهه...فتح عيونه..ومسك ايدي..خفت.. مسكها بقوة..
- ليش خايفه؟؟.."
-انت مريض..آآآآآآه...مررريض..."
-طيب..وش اللي مزعلك؟؟...وإذا مريض..يمكن افضل بالنسبة لك!!..."
-لا تقول كذاا....وافي..وش قصة الادوية اللي في الصيدلية؟؟؟...وش السالفه؟؟ ..قووووول ... "
-................
-وافي تكلم..الله يخليك...انااا...انااا..انسى اني زوجتك...آآآه...اعتبرني صديقة... اعتبرني اخوك..اي احد..انسى اني ملكه...انسىىىىىى.."
-لا يمكن انسى انك ملكه....لأنك....آآآه...اتركيني يا ملكه وروحي...."
-ماراح اروح...بجلس يمك...انت تعبان...تعباااان فاهم؟؟....قولي..تبيني اسويلك شوربة؟؟ ... اي شيء؟؟"
-سويلي مساج..مثل المرة اللي سويتيه لي قبل...." واخذ ايدي حطهاا على راسه..وغمض عيونه ودفن وجهه بقوة في المخده...
داعبت شعره للحظات بحنان....وافي مسكين...مسكين يا ناس...مريض...يتألم....لازم اداويه...بس شلون...
في ذيك الليلة جلست طول الوقت اسوي لوافي مساج...وطبعا رفض انه يأكل اي شيء.. وماقدر ينام كثير بس على الاقل ارتاح شوي...اول مانام دخلت الصيدلية حقت الحمام وطلعت كل الادوية اللي فيها...حبوب اشكال والوان....مخيفه وكثيرة.. وفيه علب حجمها مرة كبير..حسيت بالأم يعتصرني... زوجي مريض..واناا ما ادري عنه...
قعدت اقرا الاوراق اللي عليها.. بس ماكان فيه شيء واضح مصطلحات طبية صعبه...لكن اللي تأكدت منه ان معه شقيقة حاده لأن واحد من الحبوب كان عند امي...بس فيه شيء مع الشقيقة....وشو هالشيء؟؟.. ماابي حتى اخمن...ويا خوفي يكون اللي في بالي....
طلعت من الحمام وشفت وافي...كان نايم مثل طفل صغير...يتألم ماسك الفراش بقوة ووجهه تعبان...اول مرة انتبه ان وافي نحل كثير عن اول يوم بزواجنا..كأنه فقد نص وزنه.... شعره طال بدون اهتمام.... لحية خفيفة نابته..بس مع هذا كان عذاب... وسيم..
رحت يمه وغطيته زين..وتمددت جنبه...وحاولت اني انوم!!...
طول الطريق للرياض وانا ووافي ساكتين... ما كنا نتبادل اي كلمه..اللي اعرفه بس ان كل العوايل طلعت معانا... وعلى كثر ماكنت ابي اجلس هناك وأخر مواجهاتي مع وافي لأبعد مدى...لكن ماكل ما يتمنى المرء يدركه....
توادعنا انا ومهاا وحصه وحنان بحرارة...ووعدوني يجون يزوروني بشقتي الاسبوع الجاي .. وطلبت منهم إذا بغوا يروحون لأي مشوار يمرون لأني عارفه ان وافي ماراح يرفض لهم طلب...
وشفت مرام تودع وافي بحنان فياض... وحسيت ان ودي اكسر لها راسها... خصوصا انها جلست مع وافي اكثر مني...لأني من بعد ذيك الليلة ماعاد نمت عند وافي.. رجعنا للجفا من جديد.. كنت انوم عند مهاا والبنات..وماحد كان يعلق على تصرفاتي الغريبة.. خصوصا اني عروس فمفروض اكون مع زوجي طول الوقت...
ارتعشت وانا اتذكر جو الشقه حقتنا...كان كئيييييييييب...المطبخ اللي ماكان وافي يآكل منه شيء... غرفة النوم البارده اللي انقفل علي فيهاا...المكتب والتيلفونات المتكسرة فيه... وش اللي بقى؟؟...ولااا شيء..مجلس وافي اللي ينوم فيه...
وافي بعد مالاحظ ارتجافتي: بردانه؟؟.."
: لاااء..."
سفهني وفصخ الجاكيت حقه الجلد وحطه على كتوفي...الحركه نفسها خلتني احسى بدفاا غريب... لدرجة اني احتريت رغم برودة الجو...
: وانت؟؟..راح تبرد.."
جاوبني بلا مبالاة: ماعليك مني..اهتمي بنفسك.."
طالعته بكسل...شعره الناعم الغجري..اللي ينزل على رقبته باهمال...حواجبه الكثيرة والجرح اللي فيهم..قاطعهم من النص... خشمه الحاد...شفايفه الرفيعه اللي مسكرها بقوة..دقنه العنيد...رقبته السمرا الطويلة..
انتبه اني اطالعه..وكنا واقفين عند الاشارة...حسيت بخجل.. ما احب انه يغتر بنفسه... صح انه حلو...بس حتى ما ابيه يعرف اني اطالعه كل ماكان موجود...
وافي وهو يشوفني اشيل عيوني: طالعيني..."
كان امر...وامر قوي...لكني ماقدرت ارد عليه...احس ان وجهي ولع..خدودي صارت نيران ..
حط ايده تحت دقني وخلاني اطالعه..ذبت بعيونه..حاولت اني اكون قوية واطالعه بنفس الجرأة اللي ناظرني فيهاا...بس ماقدرت..حسيت ان دقات قلبي تناقز بسرعه.. عدلت جلستي بملل وطالعت قدامي..
وافي وهو يرجع يلف وجهي يمه..مبسوط بتعذيبي: لا تستحين مني!!...انا زوجك!!"
: موو...ب مستحيــ...ه.." قلتها وانا اطالع بحواجبه وبجبينه اللي باينه عليها تقطيبات الزمن المر!!
ابتسم وافي بنذاله: لا تطالعين بحواجبي...طالعي بعيوني..."
هزيت راسي باصرار اني ما اقدر اطالعه.. فشفته مستسلم بس ماشال عيونه من علي...
سمعنا صوت بوري وراناا..فضرب وافي راسه بيده..اوف..تخيلوا فتحت الاشارة مرتين ولا انتبهنا لهاا....
مشى وافي وهو يبتسم بسرعه..لمس طرف اصابعي...فجزعت ولملمت ايديني بحجري.. ما ابيه يلمسني...وافي مدمر...لا يمكن اخليه يستغل اي شيء ضدي...
لاحظت انه كشر بشراسه...وحسيته مثل ذيب كبير اسود على وشك يهجم علي ويقطعني بمخالبه...بس اللي صار..انه مد ايده ومسك ايدي بالقوة...
حسيت بقلبي شوي ويطلع من مكانه...كانت ايد وافي كبيرة...تعتصر ايدي الصغيرة برقة!! ... شعور غريب..ما اقدر اوصفه..احاسيس غريبة تدور فيني مثل الاعاصير... غمضت عيوني وتسندت على القزاز بكسل..فترك وافي ايدي بعدها بلحظات... حسيت بخيبة امل!!..تمنيت انه ما يتركها..ليت عندي نفس جرأته...ليتني مثل مرام...ليتني اقدر امسك ايده بنفس القوة والاصرار اللي اخذ فيهم ايدي!!...
تمددت على الكنبه اللي بالصاله بكسل..بعد ما اخذت دش حار...كنت مغمضة عيوني لمن حسيت بحركه بالصاله....فتحتها بسرعه..
شفت وافي جايب فراشه وتمدد على الكنبة اللي قدامي...ابتسمت غصبا علي على شكله..
-وافي..."
- ه..هلاااء.."
-ترى جوال جدتك خليته بالمزرعه.."
-وشووو؟؟..وش قصدك؟؟.."
قلت له وانا اهز كتوفي: يعني لا تنوم عندي.لا تراقبني...ماعندي لا تيلفون ولا موبايل.. والاهم باب الشقه مقفل.."
كان مصدوم بكلامي اللي انا عارفه انه سخيف جدا لكن غصبا علي... ما ابيه يكون قربي.. ايه يبعد عني ويخليني لوحدي...بدنيتي اللي انا بنيتها وتعايشت فيهاا...
- الافضل اني اسكت..لأني لو برد عليك يمكن ارتكب فيك جريمه!!"
طنشته وعطيته ظهري...وسمعت صوته وهو يتمدد على الكنبه اللي قبالي.... كنت عارفه انه يراقبني حتى بعد مرور نص ساعه...
رجعت لفيت اواجهه: الافضل نقلب غرفة النوم غرفة معيشة..."
طالعني بنص عين: ماطلبت شورك!!"
: هذا بيتي..مثل ماهو بيتك"
ابتسم بطريقة غريبة: بيتك؟؟!!"
: ايه..بيتي...عندك مانع؟؟.."
وافي وهو يغمض عيونه: لاااء..ماعندي مانع...يله نومي..عشان بكره تقومين بدري تكوين لي ثوب وشماغ...وراي دوام!!.."
مانمت بس اهو على طول نام... صدق الرجال عجيبين..مخلوقات غريبه...بمجرد مايغمضون عيونهم ينامون.. بعكسنا احنا الحريم.. اللي نفكر بكل شيء... نفكر بالفطور والغداء والعشا وتنظيف البيت وكوي الثياب ووووو...اوووووووووف...الافضل اني انوم قبل ما انجن صدق!!
في الصباح بعد ماراح وافي وبعد مانظفت البيت زين...جلست عند التلفزيون اطالع بالقنوات بملل..من قناة لثانية....ليت عندي تلفون...ليتني ماتركت جوال الجده في المزرعه.. كان على الاقل قعدت اسولف مع سارا او مع عفاري او سماح يا قلبي.. اللي مادري كيف حال ابوهم؟؟...اكيد انه مريض حيل...اكيد مسافرين عنده هالحين....الله يعنيهم ويخفف عليهم مصيبتهم ويصبرهم...ما يستاهلون والله... بنات مرة حبوبات... الله يخلي ابوهم لهم ياررب...
سمعت طق على الباب...فانهبلت ووقفت لحظات مو مصدقة...بس بعدين سمعت حس مهاا وهي تصارخ علي من ورا الباب..
: افتحيييي....انا مهاااا"
معقولة؟؟؟..وش تسوي مهاا هنا بالصبح؟؟.
فتحت الباب دخلت مهاا زي الصاروخ....طالعتني وهي مبتسمة وهي تشيل الغطاا عن وجهها: يووه...بررررد..."
: مهاا وشوو؟؟..وش تسوين هناا؟؟.."
مهاا وهي تضحك: الله من حسن الضيافة..جايه اسليك...روحي البسي..بنطلع نفطر وبعدين تروحين معي الجامعه.."
بتردد: مهاا من صدقك انت؟؟..الوقت..مررة بدري..."
مهاا وهي تطالع بساعتها: لااا موب بدري 8:30 نروح لمملكه نفطر..ونروح الجامعه.. يله بسررعه تراني طفشااانه.."
دخلت غرفة النوم وجات وراي مهاا مدرعمه....كنت مترددة حيل...
شافت مهاا شنطة الملابس على الارض: ماطلعتي ملابسك من الشنطه...لسه؟؟.."
ضحكت بخجل: ههههه..كل يوم اقول بكره.."
وطلعت لي تنورة سوداء نص الساق وبلوفر ناعم مشمشي....دخلت الحمام وطلبت منها تدق على وافي عشان تقوله وتركتها وهي تدق رقمه..
لبست ملابسي على عجل...وحطيت مكياج خفيف على وجهي...وكحلت عيوني وطلعت من الحمام...
مهاا وهي تعبس: مارد علي..حاط البريد الصوتي..."
خفت وبلعت ريقي بتردد: مهاا.. ما اعتقد ان خالك راح يكون مبسوووط.."
مهاا وهي تتوسلني: ليه انتم كذاا؟؟..عاادي بندق عليه لين يرد وباقوله انك معي.."
ترددت كثير بس بالاخير حسمت امري ووكلته لله.. لبست عبايتي وطلعت انا وياها بعد ماعلقت ورقة على باب المطبخ وعلمت وافي فيها اني مع مهاا ويدق على جوالها عشان يتأكد!!وكنت ميته خووف من اللي راح يصير!!
نزلت انا ومهاا وركبنا سيارتهم مع السواق....طلبت منه مهاا يودينا للمملكه... كنت اطالع بالسما..الجو يجنن الصباح... رغم برودته.... حتى ان البخار يطلع من فمنا لمن نتكلم.. بس بعد كان حلوو...
مهاا: افففف..مدري وش فيه خالي مايرد علي بالمرة..."
: حاولي مرة ثانية.....الله يخليك"
مهاا: وش هالرعب اللي مسببه خالي لك؟؟.."
: اي رعب يا بنت الحلال...بس هالشيء لازم تخيلي لو اموت هالحين ووافي موب راضي عن طلعتي..."
مهاا وهي مفجوعه: اعوذ بالله... وش التفكير؟؟... لااا ان شاء الله محنا بميتين.."
وترجع تدق على وافي من جديد...كنت خايفه موت من ردة فعله... انا عارفة وافي شلون يفكر..الله يستر!!...
حاولت اني اسولف مع مهاا وانبسط وحكيت لها عن اول يوم في الجامعه لي...ونسيت وافي مؤقتا مع السواليف..
وصلنا المملكه...وطلعنا فوق لسبازيو....وطلبنا لنا فطور دسم...
مهاا فجأة بحسرة:يووووووووه!!"
: وشووو؟؟.."
مهاا وهي تدخل جوالها بالشنطه: كله بسبتك خلص شحن جوالي.."
: نععععم؟؟...مهاا الله يخليك قولي شيء غير كذاا.."
مهاا وهي تعبس: للاسف قفل...بس عادي...انت كتبت رساله لخالي...ان شاء الله يشوفهاا..."
:..............
مهاا وهي تشرب من قهوتها: ملكه؟؟!!"
: وشو؟؟.."
مهاا بتردد: فيه شي غريب...يعني...ما ادري..خلاص انسي الموضوع.."
: مهاا وشو.؟؟ قولييي..لا تعلقيني كذااا...يله..."
مها بتردد اكبر: يعني...حياتك مع خالي..غرررريبة..."
حمر وجهي وبغيت اشرق بالقهوة: غريبة؟؟...من اي...ناحيه؟؟"
مهاا: انت فاهمتني...يعني ملابسك لمن دخلت البيت...يعنييي...معليش كانت مرة مو انيقه... وشعرك..كنت لامته بطريقة..اممم" وهزت كتوفها...
حسيت باحراج: اه...خالك مايحب المكياج الكثيــ.....رر...ووو....ما يحبني البس..ملابس متكلـ..فه في البيت..."
مهاا وهي مستغربة: معقووووووول؟؟؟..خالي وافي كان هو اللي يشتري لنا افخم الملابس .. كان يحب يشوفنا دوم مرتبات ويهاوشنا إذا شافنا..بشكل حوسه...."
طالعت فيها مترددة: هذا اللي يصير معي.."
وكملت باكبر نصبه في حياتي: اساسا اهو يقول اني لو البس خيشه طلعت قمر.."
مها: هههههههههههههههههههه...
: ايه...موب مصدقة روحي اساليه"
مها: ههههه...لااا عاد اهو صادق..مشاء الله عليك...الله يخليكم لبعض..."
خلصنا فطور ورحنا الجامعه..وسلمت على زميلاتي بالصف واستاذاتي...وبعضهم اتاثروا بكوا لمن عرفوا ان اهلي ماتوا..وانا بعد تأثرت لمن شفت جامعتي وكليتي الحبيبه... حتى اني ماكان ودي اطلع....سارا كانت موجوده...وانهبلت يوم شافتني وقمنا نصارخ بحماس ... حتى انها ماحضرت المحاضرات اللي عندها وهي تسولف معي...
سارا تعاتبني: من تزوجت ماعاد عرفت علومك..نذذذذذذله...دايم كنت تقولين انا صديقات حتى لو بعد الزواج والاطفال..."
: سارا يا عمري..مشغولة حيل ماعندي وقت لأي شيء..."
سارا طالعني بشك: نحفتي كثيييييييير...تغيرتي..."
: للاحلى؟؟.."
سارا وهي تتاملني: تصدقين...للأحلى...النحف ناسبك مرة..طالعه قمر...والشعر القصير حلو عليك بعد...بس شعرك اول ازين..."
:...والله لك وحشه يا سارا ولامك وابوك واخوانك وحشه..ان شاء الله ازوركم يا عيوني ..."
سارا بحماس وهي ترفع اصبعها قدام عيوني: طالعي...خاتمي الالماس..."
: وااااااااااو..مبرووووووووووك..الف الف مبروك..."
سارا مبسوطة: انخطبت...خطبني ولد جيرانا...يقول انه كان يحبني من كنت صغيرة... عاد ابيك تجين ملكتي..."
: ولووو..اكيد..."
والتفت على مهاا: هاا يا مهاا تراك بتجين معي عشان خالك يوافق..."
مهاا وهي تنط وسطنا: دام فيها معرس وعرس جايه جايه..ههههههههههه"
وودعت سارا ووعدتها اني ادوام الترم الجاي بعد ماكلمت الوكيله ووافقت على طول وقالت لي ان موضوعي سهل مرة..
طول الوقت بالسيارة وانا ومهاا راجعين ضحك وسوالف... كان حنين الجامعه يغمرني.. وحسيت براحه كبيرة حتى اني نسيت وافي نهائيا... مرينا البيتزا واشتريت غدا لي ولوافي ووصلتني مهاا وودعتها ووعدتني انها تجيني هي وامها وخواتها الربوع...
طلعت لشقتي...ودقيت الجرس..ماحد فتح لي..معقول وافي مارجع؟؟... استغربت..وطولت عند الباب....وبالاخير انفتح الباب...وطلع وراه وافي..اللي طالعني وكأنه شايف جني
________________________________________
|
|
|
|
|
|