يا حلو الغروب... كنت انا وجدة وافي اللي صارت جدتي...جالسين في البلكونه...نتأمل الغروب ونشرب شاهي بليمون عشان حلوقنا اللي رايحه وطي مع البرد!!
الشمس تحاول تنتصر على الظلام..بس تضطر بالاخير تستسلم وتنوم بامان..شكلها جميل مثل اميرة نعساانه ترجع تستلم للنوم^_^..
: جدة؟؟"
طالعتني وهي تبتسم: هااااا؟؟.."
:ممكن اناديك يمه!!.."
طالعتني وهي مستغربة...وقالت بكل حنان: اكيد يا بنيتي...وانا اساسا اعتبرك بنتي لأنك مرت الغالي...اللي اعتبره ولدي....واغلى من عيااالي وبنااتي كلهم..."
حسيت بفضول لمعرفة حياة وافي: انت اللي ريبتي وافي ومشاري وخواتهم....؟؟؟"
سرحت الجده للحظات وشربت شوي من فنجالهاا: انا اللي ربيت حصه...وحصه هي اللي ربتهم...وشالتني معهم..."
وسكتت تتذكر...وسكت انا احترام لهااا...
كملت بهدوء: يمكن وافي يقسى عليك لحظااات...بس ترى اللي شافه مو شوووي...تطلقت بنتي ام وافي من زوجهاا...وجابت عيالها كلهم عندي....ورمتهم بوجهي...قالت انها ماتبيهم وانها تبي تعيش حياتها...واذا ابوهم مابغاهم هي ميب مسؤوله ...ليش يروح يعرس وهي لاااء؟؟.. حاولت معهاا انها ماتخلي عيالها..لأنها بكره راح تحتاجهم...بس ولا كأنك تكلمهاا...راحت وتزوجت...وماتت مع زوجها بحادث من ثاني اسبوع....وافي كان اكثر واحد متعلق بأمه...عرف باللي صار...فكرررههها حيل... وتعلق بحصه اللي اعطتهم كل اللي يحتاجونه... كانت تخدمني...وتخدم اخوانها..والله انها ابر من بناتي "
حسيت بالم قوي..مسكين وافي...وش هالام؟؟..اقلها ماتوا اهلي وانا احبهم ومحتفظة لهم بصور حلوة بداخلي...تخيلت وافي الطفل المسكين المحروم من امه...ضميت نفسي.. يابعد عمري..يا وافــ.... قطعت تفكيري؟؟؟...وشووو انا اذكر اسم وافي..حتى لو يحزن مفروض ما اعطف عليه..حتى لو يحبني...ماراح اعطف عليه...!!
: يعني حصه اغلى من امهاا؟؟"سألت بهدوء مشوب بالفضول!!
جدتي قالت: حصه البنت الحنون هي اغلى ماخلق ربي عندي... انا ما انسى يوم انها تذاكر وتقعد تهمزني... كنت توني طاايحه بسبب الروماتيز...هذا اللي يهشم العظام ويلعن جدفهاا.. كانت تحب تنوم جنبي...علشان توفر طلباتي....وحتى يوم اعرست بكيت كثييييي ييير....ووافي بكا كثييييير....وانا كنت طماااعه وماكنت ابيها تعرس... كنت ابيها تعيش معاي تخدمني وتخدم اخوانها...بس الحمدالله انها مادرت وش كنت افكر فيه وقتها...."
انتظرت جدتي تكمل...لكنهاا سكتت...وغرقت عيونها بدموع وقامت تمسحها بشيلتها.. رحت يمها وضميتها بقوة ومسحت دموعها: ليش يا يمه؟؟..ليش تصيحين؟؟..."
جدتي وهي تشاهق: ابكيي لأن حصه تغربلت كثيييرررر... كان زوجها يطقها...ولا عمره رحم ضعفهااا.... حتى وهي حامل اسقطت ثلاث مرات....صدق كان يوم فرح يوم طلقهاا زوجهاا..."
قلت بفضول: متى طلقهااا؟؟..وكيف؟؟.."
- طلقهاا بسبب وافي...وافي اللي كبر وتعلم بره...ومسك كل حلالناا..وصار ينخاف منه ولا يخاف من احد.. طقه وكسر ضلوعه...وخلاه يطلق حصه غصبن عليهااا..."
وضحكت عند هالنقطه: هههههههههه....هذي ميزة وافي...مايعرف التفاهم...شري من كان صغير..."
لا شعوريا قلت: الله يحفظه لي...."
كملت جدته وهي تبتسم لي: بسس ترى مية مرة تمناه...والله اني ما انسى بنات ال... كانن دايم ينتظرنه على باب الفله.. مع انهن اكبر منه!!..."
حسيت بغيرة: كم كان عمره؟؟.."
-يعني كان توه داخل ال15سنة...."
حسيت بنار تشتعل بداخلي فقلت وانا ابعد عن حظن جدته: صدق بنات قليلات ادب!!"
جدتي وهي تضحك: ههههههههه...لااا والله..إلا بلااا ولدي انه مزيون..."
: مو مرررة..يعني ترى فيه شباب ازين منه..."
ضحكت جدتي: الله من الحريم..مانخاف ربنا اذا غرناا..."
: هههههههه...انا ماقلت شيء غلط...صح ان وافي حليووو...بسس..." وسكت يوم جاتت جدتي تضربني بعصاها....وهجيت من قدامها...
: هههههههههههه بروح اسووويلك حليب.."
تذكرت الاغنية اللي غناها لي وافي وانا واقفة عند ابريق الحليب..." ئووووووووول ان شاء الله..." وتمايلت قدام الابريق..وانا اغني بأعلى صوووت..: خليكي الله يخليكي عمري الجاي بشوفه فيك.."
: مشااااااااااء الله!!.."
التفت جزعانه: مهاااااااا!!..."
طالعتني مهاا وابتسمت بكسل: وشووو؟؟...ماتوقعت شوفتي؟؟..."
: لاااء...البيت بيتك..حياااك..." ولفيت عنها وحركت السكر بالابريق واضفت له زنجبيل... وحطيته بالصينية وحطيت كوبين..
: تبين حليب؟؟.."
مهاا وهي تهز راسها: لااااء...شكرا..."
: جايه مع احد؟؟..."
مهاا: وصلني خالي مشاري...اممم...بتروحين تقعدين مع جدتي؟؟.."
: لااا بعطيها الحليب...."
استغربت زيارة مهاا...رحت لجدتي..وحطيت عندها الحليب..وصبيت لها كوب...ولقيتها متمددة على الكنبة...غطيتها ببطانية...
ورجعت لمهاا..بعد ما تأكدت من شكلي في المراية اللي بالسيب...كانت بعض بقايا الكحل حول عيوني...وشعري الحمدالله مترتب..
دخلت الصاله...لقيت مهاا جالسه سرحانه على الكنبة...طالعت فيهاا بتردد...خاايفه انها تكمل اللي بدت فيه ذاك اليوم...وحاسه اني هالمره راح امووت لا محاااله...قلبي ماعاد يحتمل كل هالصدمات!!
: مهاا؟؟!!" نبهتها لوجودي وانا اجلس قبالهاا..
مهاا وهي ترجع شعرها ورى اذنها: آسفه..." قالتها وهي تطالع باصابعها...
: اها؟؟؟"
مهاا: عاارفة اني تصرفت معك بطريقة مرة غبيية...امممم...ماراعيت انك مرت خالي.."
:.............."
مهاا وهي تطالعني بعذاب: بسس انا لمن صلحت الجوااال....رجع دق عليي رجااال.. وقال لي ان فيه وحده متصله علي من الجوال حقي.."
:..........طيب؟؟" قلتها بفتور وانا محتاره اذا اعترف لمهاا بكل شيء ولااا اسكت افضل واشوف لوين بتوصل...
مهاا وهي تقلب عيونها بكل مكان: دقيت على خالي وافي...كنت بقوله انك تخونينه.. مافكرت مرتين اذا اللي انا اسويه صح او غلط...كنت راااح ادممرر خاااال.." سكتت عند هالنقطه وبكت بقوة...
: مهاا...نصيحه مني...عمرك لا تفسرين الامور بكيفك..." وكملت وانا اوقف: مرات ظاهر الامور يكون غير باطنها...وانت لازم تتعلمين من غلطتك....انااا..بروح اخذ لي غفوة..عن اذنك.."
ومشيت وتركت مهاا تبكي لوحدها ورغم ان قلبي كان ميت صياااح عليها...لكن خلاااص ان ملكه مو اي بنت!!...انا عزة اهلي اللي ماتوا فيني!!...شلون لعبت بكرامتي وسمحت للي يسوى واللي مايسوى انه يدوسها...
مرت فترة المغرب ببطء.. وتبعتها العشاا بكسل اكثر!!...وحسيت على الساعه 9:00 ان النوم قاعد يناديني لاحظانه... رحت لغرفة النوم اللي جمعتني انا ووافي قبل فترة...فتحتها ببطء...وكأني متوقعه اشوف وافي متمدد على السرير....بس مالقيت شيء غير الفراااغ!!
تمددت على السرير بتعب...وضميت مخدة وافي بقوة.... يااااااااااه تجنن ريحته!!...دخلت تحت البطانية الثقيله...وفتحت كتاب قوانين الحب العشرة...ثاني قانون...قريته باهتمام.. الاعتراف بالماضي!!...آآآآآآآآآآآآه من الماضي....يجب على المرأة ان تعترف لزوج المستقبل بكل ماضيها ويجب عليه المثل!!...
قريت هالقانون باهتمام....وبعد ماخلصته..طويت الصفحه وحطيت الكتاب على جنب... قمت من السرير....وفصخت ملابسي...ولبست بيجاما ثقيله كحلية...تصدقون اني ما اتكلمت مع مهاا نهائيا!!....ولمن عرفت اني ماراح اسامحها تركتني وراحت قبل نص ساعه... مسكينه والله!!..بس قلبي ماعاد يحتمل!!
غمضت عيوني بهدوء..بس سمعت صوت الجوال يدق...طالعت بالجوال باهتمام...كان وافي...الوافي!!....ترددت اذا ارد عليه او لاااء....بس اخاف يقفل...رديت بسرعه وسكت...
وافي: الوووو....ملكه؟؟"
:......................هلاااء..." رديت اخيرا بخوف!!
وافي وكأنه ارتاح: غريبة مانمتي؟؟!!.."
: كنت على وشك..."
وافي: اهاا..كيفك؟؟..."
: اممم الحمدالله بخير.....الحياه مع جدتك لها طعم غير!!...احس كأني ببرنامج الوادي..هههههه.."
وافي: ههههههههههه.....هيفاء وهبي؟؟"
: لاااء وععع..انا احلى من عشر من اشكال هيفااء..."
وافي بنعومة: صحح!!..."
حسيت اني قاعده اذوب..مثل قطعة الثلج اللي تذوب بصمت..
وافي: ملكه؟؟.."
:.............هلاااء.."
وافي بخبث: ليش سكتي؟؟...هممم؟؟"
: اممممم...ولااا شيء...اه...اممم..وش تسوي؟؟.."
وافي بملل: ولااا شيء جالس على سريري...احاول اني انوم..بس موو قادر.."
: ليش؟؟..."
وافي وهو يقلد صوتي: ليش؟؟...ابدا..لأني فاقد وحده مزعجه لها شهر ونص تنوم معي ..."
حسيت بحرارة فضيعه بجسمي...فرميت البطانية بعيد عني...ودورت شي عشان اهوي على وجهي....
وافي: هههههههههه...وش فيك؟؟.."
: هااا؟؟؟...ابدااا.."
وافي: هااا؟؟؟..ابداا..."
: واااااااااااااااااااااااافي...." قلتها بيأس!! والله انه حمااار!!
وافي بنعومة: عيوووون وافي..."
: امممم...لاااا..لا تكلمــ....ني بهالطررريقة..." وكملت بعصبية وصعوبة: بكره بتزوج قول هالحكي لمرتك!!"
وافي بحرارة: من عيوووني!!...وش تبيني اقولهاا بعد؟؟؟..."
: اممم...قولهااا....لنار جههنم ان شاء الله..."
وافي: لاااا بسم الله عليها ان شاء الله بجنات النعيم!!"
: تحبهااا؟؟...قلبك جمارك!!"
وافي: هههههههههه...قلبي ايش؟؟..."
: اه...قلتلك جمااارك...يحب كل شوي!!...."
وافي بخبث: الشرع حلل اربع...عشان كذا لازم احب اربع..!!"
: بسس!!...انت.....تحـ....تحب وحده صح؟؟؟" وحسيت بلساني لصق بحلقي عند هالحد...
وافي: احبهااا بس يبيلها تكسير راس...ترفع ضغطي كثير...وتثير فيني مشاعر اكررههها ..."
: مشاعر تكرهها؟؟.."
وافي وهو يأخذ نفس: تحسسني اني ضعيف عندهااا..عشان كذا اجبر نفسي استقوي عليهاا غصبن علي..."
:..............."
وافي بكسل: ملكه؟؟..."
سكت ولا رديت عليه حسيت ان قلبي كل العالم تسمعه...وتجمدت بسريري...ياربييي... وش اللي قاعد يصير فيني...يااارب اكوون اقوى من وافي...ومن عشرة مثل وافي!!..
وافي بقلق: ملكه؟؟...نمتي؟؟..."
:.................."
وافي باستسلام: ماراح اقفل...بجلس على الخط معك حتى لو انك نايمه...بس تصبحين على خير.."
: وانت من اهله!!...تقدر تقفل.."
وافي بنعومة: لااااء راح اظل معك على الخط...يله نومي ولا تزعجيني..."
________________________________________
خساارة..
مابقى فيني شعور للهوا شفقان...!!
طرحت العاطفه...
وانت ترى...
آآخر من يهمني!!!!
الفصل السابع والعشرين...
كانت ايامي بالمزرعه ممتازة...زاد وزني..اشرق وجهي...بانت الصحه على كل حركة من حركااتي..نفسيتي تحسنت كثير..خصوصا مع سواليف وافي في آخر الليل وبداية الفجر ... مع منظر الخيل وهي تسرح وتمرح في المزرعه في المكان المخصص لهاا.. مع منظر الحمام اللي كل يوم افتح له الصندقه بنفسي!!
جدة وافي اعتبرتني مثل بنتهاا...وعاملتني بحنان فضيع...وكنت استشعر هالحنان بكل سعاده ... ماكنت مصدقة ان هالشيء يصير لي وان حياتي خلااص صارت افضل حياة في الدنياا... حتى اني نسيت موضوع زواج وافي مع انه من وقت لثاني كان يظهر لي ويعكر علي تفكيري...بس وافي كان دايم يطمني بكلااامه...كنت احس بحبه..وكنت شبه متجااوبة معه...كنت ابي اتجاوب معه..بس خوفي من اشياء كثيرة كان يمنعني اتمادى بمشاعري ...خصوصا ان هذا وافي مو حي الله!!
الساعه10:00ص
حسيت بسعاده فضيعه وانا اشوف شغالة صيته تدخل المطبخ ومعها منوو...شلت منو وانا حيل مبسوطة وقطعت خدها تبويس.. طلعت من المطبخ بعد ماقلت للشغاله تكمل شغلي... ورحت ابي اشوف وش مناسبة هالزيارة من صيته..لأن مو عادتها تجي بنص الاسبوع وعلى وجه الاختبارات النهائية..
من صدمتي لمن شفت منظر صيته المأساوي...فتحت فمي مفجوعه... كانت صيته جايبه عيالهااا كلهم...ومعها شنطة سفر كبيرة تجرها بتعب...
رحت يمها بسرعه..وانا مصدومة...وسلمت على بنتها وولدها بسرعه... وضميت صيته بقوة...
: صيته...وشووو؟؟..وش صاار؟؟.."
صيته وهي تشيل غطاها عن وجهها: انا تعباااانه يا ملكه..." وقامت تصيح بقوة وبحرارة ...
: صيته حبيبتي..."
تجمعوا عيالها حولها وقاموا يصيحون...معهاا...وحتى منو الصغيرة قامت تصيح بحرارة وكأنها تعرف امها وش تحس فيه...
حسيت اني مرة متوترة...وماعرفت شلون اتصرف بمثل هالحاله؟؟..الله يذكر ايامك بالخير يا عفراا... كانت تعرف تصرف بالحالات المأساوية...
ناديت الشغاله حقتهم وخليتها تآخذ الصغار جوه..وسحبت صيته لغرفتي اناا ووافي.. علشان ماتسمعها جدتناا...اول مادخلت الغرفة..رمت نفسها على السرير..وصاحت بمرارة ... تركت منيرة على الكنبة...ورحت لصيته ومسحت على شعرها بنعومة..
: صيته...اسمعيني..البكاا عمره ماكان حل لأي مشكله..."
صيته بمرارة: يكلمهاا يا ملكه...يكلمهاا...اسمعهم يتغازلون قداام عيوني... ماراعى وجودي ...يطلع بالساعات عشان يسولف معهاا... واذا سألته تعذر لي بأشياء كثيرة... وبالأخير اعترف لي انه يطلع معاها عشان يأثثون البيت..."
عورني قلبي على صيته مسكينة يا عمرري...: صيته عيوني...خلاااص..مايستاهل دموعك اذا هذي سوااته..."
صيته وهي تلتفت لي: ملكه انا بتطلق منه...ما اقدر اعيش معه..لو تشوفين الجحيم اللي اعيشه يوميا....احس بناااار تحرق صدري.. ولااا ترحمني.."
قلت لها بهدوء: مو كذا تنحل الأمور...الأمور لازم تنحل بهدوء..واحنا قلنا الصبر ياصيته ..اصبري على رجلك وان شاء الله تقدرين تغلبين على مشاعرك... بعدين لا تنسين عياالك ...تراهم محتاجين زوجك..محتااجين ابوهم"
صيته بأصرار: يخسي يآخذ عيااالي..والله لو اخليه يدور عني بكل مكان..عيااالي لا يمكن اخليه يآخذهم...عشان تربيهم بنت الــ..."
قاطعتها بسرعه: هدي اعصاابك..بروح اجيبلك كاسة مااء..واغسلي وجهك مو حلوة تشوفك جدتك بالشكل ذا...اكيد الحين درت انك جيتي وميتة خوف عليك.."
هزت صيته راسها لي وراقبتني وانا اروح اطلع من الغرفة ومعي بنتها الصغيرة...خليت الشغاله تودي لها كاسة ماء.. ورحت للصاله عشان اشوف وش مسوين عيالها الباقيين؟؟.. لقيتهم جالسين على سبيس تون.. يا حلو البراءه...قبل شوي يصيحون وهالحين مبسوطين على افلام كرتون...شفت عجوزنا ناايمة وقدامها كاسة الحليب اللي لسه ماشربتها..رحت يمها وبستها على راسها وغطيت جسمهاا زين..ورجعت لصيته...
لقيت صيته تمسح دموعها بالمناديل وتشرب كاسة الماء..جلست عندها على السريرحطيت بنتها بالنص بيناا...
صيته وهي تبوس خد بنتها: والله قمل( قمر)...." والتفتت علي: وش مجلسك هناا؟؟.. وين وافي؟؟.."
: واافي مسافر!!..وانا هنا لي ثلاث ايام.."
صيته وهي تطالعني مستغربة: مساافر؟؟..وافي انا شايفته امس..."
: وشوووو؟؟.." قمت على طول من السرير وحطيت ايدي على راسي...حسيت بصداع فضيع..وش قصدها ان وافي في الريااض...
: صيته انت متأكده؟؟..يمكن كان توه جاي من السفر؟؟.."والله ان قلبي كان قارصني كنت حاسه ان في الموضوع ان...
صيته بتردد: ايه...لاااء...مدري والله!!..اخاف اني اسبب مشكله وانا مانيب دارية!..."
: صيته..اخوك الاستااذ..قايلي انه مساافر..اكيد بيصرفني عشان مرته الثانية.." وارتجفت شفايفي بقوة..والله لوريك يا واافي...مو انت اللي تضحك علي...خذيت الجوال ودقيت عليه ..
صيته وهي تحاول تسحب الجوال من ايدي: ملكه انتظري.."
: الووووووو...بعدي عني يا صيته.."
وافي بنعومة: هلاااء...هلاااء بملكتي هلاااء....شوي شوي وشفيك تصاارخين؟؟..."
: واافي؟؟..متى بتجي من السفرر..؟؟"
وافي الكذااب ببساطة: بعد بكره ان شاء الله...ليش؟؟.."
: واافي يا حمااااار!!..يا كذاااب.."
وافي قبل لا يستوعب اللي قلتله..لقاني قافلة الخط بوجهه...
: قاعده احاول اهديك واكتشفت اني انا اللي محتاجه لهدوء.."وجلست على السرير ودموعي اربع اربع...
صيته بأسى: رجالنا مجموعة كذابين.."
: استااهل والله...انا استاهل..مفروض اني ما اخليه يتحرك بدوني..."
دق الجوال بعد كلمتي على طول...كان وافي..اعطيته بزي..ورجعت ابي اتكلم مع صيته.. بس دق من جديد...واعطيته من جديد بزي..حوالي الثمانية مرات وانا مستمرة..بالأخير صيته خذت الجوال مني: الوووو...وافي انا صيته..."
وافي وصوته عاالي حتى انا سمعته وانا بعيده شوي عن صيته: ووين ملكه؟؟.."
صيته وهي تطالعني وتأشر لي انه معصب: ملكه بالحمام!!...تبي شيء؟؟.."
وافي بصوت مكتوم: صيته..لا تكذبين علي..عاارف انها قدامك وتغلي زعل.. خليني اكلمهاا..."
صيته بجدية: لااااء...راح تهاوشون اذا تكلمتوا.." وكملت بمزح: بعدين دامك كاذب عليها كان كذبت عليناا بعد...ولااا كان علمتني عشان اخبي عليك!!.."
ضربتها بقوة على كتفها الحمااره بتعاون مع اخوها ضدي!!...
وافي وهو يصرخ: صيتووووه!!...مالت عليك من اخت..."
صيته بأسف وهي تبتسم لأنها حارقة اعصاب وافي: وافي لا تززعل...بس والله مايصير تكلم ملكه الحين.."
مديت يدي للجوال...بس صيته عيت..: لااا يا شيخه تبين تسببين مصيبة لنفسك؟؟.."
: صيته..روقيني خليني اكلمه بسرعه..واشوف وش عنده!!.."
صيته وهي تبتسم بلؤم: تصدقون اني ارتحت بعد ماشفتكم...هههههههه...اسمحولي بس اشكالكم تززنن وانتم تهاوشون...ياا عصاافير الحب.."
ضربت صيته بقوة وحاولت آخذ منها الجوال بس كانت اقوى مني...طحت على ألأرض وتعورت...فخافت واستلسمت وعطتني الجوال اول ماحطيته على اذني سمعت صراخ وافي اللي خرق اذني..: حمااااااااااااار؟؟..هااا؟؟ انا رجلك تقولين علي حماار؟؟.."
كنت ابي اتهاوش معه بس لقيتني ادافع عن نفسي: واافي..اسمعني..انت..انت..غصبا علي قلت لك كذاا...لأنــ.."
وافي بعصبية وبدون تفااهم: خذي سواق صيته...وتعاالي البيت بسررعه...صدق معطيك وجه اناا...الشرهة علي اللي مراعي فيهاا مشاعرك!!."
طالعت بالجوال وانا مو مصدقة...وافي قفل الخط بوجهي..الحماااار!!
صيته: بتروحين له؟؟.."
: لااااء...من جدك اروح؟؟..مفروض اهو اللي يجي يراضيني موب انا اللي اروح له.."
صيته بخوف: ملكه؟؟...انا اعرف وافي زين...وبعطيك معلومة صغيرة...عمر وافي ماصرخ بالطريقة ذي...وهذا اذا عنى شيء...فهو يعني شيء واحد..انه معصــــب عليك ...فهمتيني"
طالعت بصيته وانا اوقف من على السرير: يعني..اروح له؟؟.." وضميت نفسي بخوف.. يمكن انا فعلااا غلطت على وافي...مفروض ما اقوله حماار..جد لو احترمه ماكان قلت له هالكلمه...ياربيييييييه ساعدني...
صيته بتوتر: نعنبو ذا الوجيه...هالحين انا جايه اقولكم عن مصيبتي لكن شلت مصيبتكم.. شلي شلايلك وروحي لرجلك.."
: لااااء..هذا آخر قرار..اللي يبيني يجيني.." وسفهتها ودخلت الحمام!!..