عز الله ان القلب في حبكم صاب
ماراح للي في المحبه يذله
ان قلت ماغليك فانا اليوم كذاب
القلب لاا شاف رقمك تغير محله
لو بمدحك والله لخلص كتاب
وكل من عذلني فيك الله يعله...
الفصل الثلاثون
ابتسمت بنعومة..وانا اراقب وافي وهو يركب الحصان...وقدامه بنت صيته..كان شكله لااا يوصف........صورة الفارس المثالي لكل بنت تبي تتزوج وتبي تنحب...
شعره يتطاير حوله بسبب الهوا القوي شوي...وكان يطاالعني كل شوي.. مدري اذا كان يقدر من هالمسافه يشوف الهيام اللي بعيوني ولااا لااء؟؟..
حتى لو شاف هالشيء..عادي وش يهمني؟؟..اهو عاارف قد ايش غالي عندي..وعارف اني اهتم فيه..واحبــ....ه.. ايه احبه يا ناس والله احبه...يمكن ماتصدقوني..بس وافي تغير كثير...اختفى قناع القسوة والبرود والطغيان...ووضحت الحقيقة..
سمعت صوت الشغالاات..فالتفت جهة المطبخ عشان اشوف وش الساالفه؟؟..فشفت صيته وهي تكلمهم وتطلبهم يسوون قهوة..
اخيرا..صيته طلعت من عزلتهاا...ابتسمت لهاا براحه...كان شكلهاا احسن..وحتى ملاابسها..كانت لاابسه بنطلون زيتي..وبلوزة صوف ناعمه مرة لونهاا ليموني..
جات وقفت جنبي وهي تبتسم لي بفتور....حطيت ايدي على كتفهاا اول ماوصلت قربي...
قالت صيته بصوتها المبحوح من كثر البكاا: مشاء الله على وافي فارس!!..."
رديت وانا مبسوطة: ايه بسم الله عليه...تخيلي كان بيركبه بدون سرج.."
صيته وهي تبعد شعرها عن وجههاا: ترى دوم وافي خيال...اساسا كان يقول اذا كبرت راح اسوي مزرعه فيها خيول..وتحقق حلمه.."
: وافي انسان محظوظ بكل شيء حوله...وسيم وغني واجتماعي وعطوف..كل شيء فيه هبة من رب العالمين.."
وكملت لاا شعوريا: ليت اهلي هناا عشان يشوفون حيااتي مع وافي شلون.."
ودمعت عيوني ببطء.....فغمضتهاا بقوة..حسيت بايد صيته على كتفي بس ماقالت ولااا كلمه...وانا احترمت هالصمت...
مهاا وهي تصارخ مبسوطة: يااااااه طلعت لي اربع نتايج كلهاا b+..ماابي احسد نفسي..مشاء الله.."
: هههههههههه..مشاء الله والف مبروك..ونااسه نجاح وزواج سوا.."
مهاا وهي تطب علي بعد كلمتي على طول..وتضربني بكوس: لااااا لا..تضيقين خلقي.."
صرخت بألم: مهااا حرااااااام عليك..آلمتيني..ماقصدي اضيق خلقك ..بس اذكرك بموعد البروفات.."
مهاا وهي تمسك المخده وتحطهاا فوق وجهي: آآآآآآآآآآآآآه بس..انا بفهم انت ليش لئيمه كذاا؟؟..محد غصبك على الزواج..عشان تحسين فيني.."
رميتهاا بقوة ورميت عليهاا الكوب البلااستيك اللي كان جنبي: والله اني انغصبت على خاالك.."
وكملت وانا اقهرها بحواجبي:بس.. الطيبون للطيبات...يا حبيبتي.."
مهاا بعصبية وهي تنقز على رجولهاا: وش قصدك؟؟اناا مو طيبه.. انا الطيب يستمد مني طيبته.."
: مهاا قصري صوتك...ترى وافي يقول ان فارس بني بيجي يزورناا.."
صرخت مهاا وهي تجلس على الارض: اكررررررررررررهههههه حرام عليك يا ملكه...ليش تذكريني؟؟..والله ماراح استقبله لو يمووت.."
تميلحت عندهاا: مهاا والله اسمه حلووو.."
صرخت فيني بضيق: اي حلو..اناا مهاا آل..اتزوج واحد بشع ولااا اسمه وشو يا حظي؟؟.. اسمه فارس...اناا اللي اموت باسم سعود وخالد ونواف...آآآآآآآآآآآه...ليه ياربيييي؟؟.."
قلت واناا اضحك:هههههههههه... والله حتى اناا كنت ابي سعود..بس ماكل مايتمنى المرء يدركه...بعدين احمدي ربك اسمه فارس...مو من ذيك الاسماء اللي مدري شلون تنطق اساسا؟؟.."
مهاا وهي تسفهني وتروح عند المرايه وتضبط شعرهاا اللي انكش:متى بنروح المشغل؟؟..ابي اقيس الفستان واخلص.."
: خلااص نروح على المغرب..وشرايك اخلي صيته تجي ويانا؟؟..تراها بدت تطلع من الصومعه حقتهاا.."
مهاا وهي تتنهد: طيب..روحي اقنعيهاا...وقومي عن مخدتي خليتيها تصير مسطحه.."
: ههههههههه..طيب.."
رجعت اشوف وين وافي بعد مااطلعت من عند مهاا...بس بعد مارتبت خشتي في المرايه...
كنت لاابسه تنورة غجرية بيضا..وبلوزه نااعمه ذهبي..ومزينه وجهي كالعااده..
لقيته واقف مع صيته في الصاله...اول ماتقابلت عيوناا... ابتسم ابتسامه واسعه كلهاا شوق..حمرت خدودي خجل..وقلت لااا شعوريا بصوت واطي..((الله لااا يحرمني منك)))
صيته تطنز: انتم متى راح ينتهي شهر عسلكم؟؟..كأنه طول شوي؟؟.."
قلت واناا اطقهاا على كتفهاا: بسم الله عليناا..ان شاء الله دوم.."
صيته وهي تبتسم بصدق: آآآمين...طبعا هالدعوة مو لله...بس لأني قااعده اترجى رجلك العزيز...انه يآخذ عيالي لتويز آر اص...بس معيي يقول روحي معاهم..واناا مالي خلق اطلع.."
هزيت كتوفي : ودي اروح هنااك...ابي اشتري باربي..عشان.."
قلتهاا بحماس لوافي بس وقفت لمن..وافي طالعني مو مصدق وفيه ضحكة....بس حااول يكتمهاا..
عدلت كلاامي: ابي ازين فيهم غرفتي شوي..يعني فيه بعض الاشكاال مرة حلوة...و..و..ووو..."
وافي وهو يقول لصيته بغرور: شوفي بس علشان ملكه بطلع عياالك.."
ضحكناا انا وصيته..اماا وافي قرر ينتظرني بره عند السيارة..
: صيته تعاالي ويانا.."
صيته باعتراض: مالي خلق اطلع من البيت..ملكه خلقي ضاايق..وراح انكد عليكم الطلعه.."
وكملت وهي تغمز لي: فرصه عشان وافي يدرب على دور الاب في المستقبل.."
حمرت خدودي وقلت واناا اعض شفايفي: بآخذ منو معاي.."
صيته وهي تهز راسها: اوكيه..ليش لاااء؟؟..بس اخاف تضايقكم.."
قلت وانا اشيل منو من بين يديها: والله القمل( القمر) هدا ما يضايقني ابد..."
ورحت عنهاا ودخلت غرفتي اناا ووافي..ولبست عبايتي بسرعه..واخذت شنطتي وطلعت لوافي...
وصلت لقيت وافي وعيال صيته بالسيارة..وتاركين لي الباب مفتوح.. دخلت بعد ما اعطيت وافي منو..شالها وهو مبسوط وطااح فيهاا تبويس..وجلسهاا بحظنه وساعدني اركب الجيب حق مشااري..
طبعا اخذنا الجيب عشان الالعاب الكبيرة اللي راح نشتريهاا..
تحرك وافي بالجيب وهو مجلس منو بحظنه ويلااعبها كل شوي..اماا انا طلعت الجوال وصورته كذا صورة.يهبل يا عاالم...كل حركه منه فن...وروايه يطول حكيهاا...
طلعناا من المزرعه وخذيت منه منو اللي قامت تصيح بحرارة...فشغل وافي سي دي واشرلي باصبعه ان الاغنيه منه لي...
قمت اغني لمنورة مع الاغنية((الله لااا يخليني منك لاااخلا ولااعدم..انت ماتدري بانك صرت لي نبض ودم...لو الخلااا الكون وانهدم...الله لااا يخليني منك..)))ياحلوو منورة لمن سكتت وقامت تضحك على الحركات اللي كنت اسويهاا فيهاا واناا ارقصهاا بنعومة..واهبل فيهاا..واقبص خدودهاا...
((لااا بدالك لااا سواك..يابدر فوق النجوم.. جنتي والله هواك...ياعساا حبك يدوم..ادعي ربي كل يوم الله لااا يخليني منك..)))طالعت بوافي واناا مبسوطة...كان مبسوط على صوتي...وعلى جو الازعاج اللي مسوينه عيال صيته بالسيارة..وعلى ضحكات منوورة...صدق طالعين احلى عيله بهالوجود...واللي يشوفناا راح يسعدناا...خصوصا ان وافي مسك ايدي بقوة وحطه تحت ايده وهو يسوق..
(((انت بلسم هالجروح...لو تلاامس قلبي عله..لو اجي احكي وابوح...ماكفاني العمر كله...انا ما اقول شيء الااا الله لااا يخليني منك..)))
قال واناا ابوس منورة: تبين بنت ولااا ولد؟؟.."
طالعته منصدمه من السؤال...وبعد ما استوعبته هزيت كتوفي بخجل: اللي يجي من الله حياه الله..."
وافي وفيه ضحكة: اكره هالاجابه الدبلومااسية...لو بايدك تختارين جنس المولود وش تبينه؟؟.."
قلت واناا العب ب شعر منيره الخفيف الحريري: ابيه ولد اذا كان بيطلع مثلك..."
وافي بلؤم: اهاا...وليش تبينه يشبهني؟؟"
ابتسمت لااا شعوريا واناا اجاوب:لأن كل مافيك حلوو..فشيء طبيعي اني ابيه يشبهلك.."
وافي وهو يضغط على ايدي بقوة: قولي آمين.."
: آمين.."
وافي بابتسامه عذبه: الله لااا يغير عليناا..."
: آآآآآآآآآآآمين....بس وووقف هنااك شوي.."
اشرت بسررعه على محل عصيرات وايسكريم كنت متعودة اشتري منه...مع اهلي...
وافي وهو يوقف: هناا؟؟.."
: ايه..." والتفت على عيال صيته: وش تبون يا حلووين؟؟.."
عيال صيته هزوا كتوفهم في البدايه بعدين البنت تكلمت وقالت: اي شيء من خالي وافي حلوو.."
ياا حبيلك والله...هذي الكلمة الوحيده اللي قلتهاا بس بعدهاا بشوي كملت: لااا تستحين عمري.."
سكتت وماردت علي..اما وافي قال وهو يقفل الجيب: وش تبين يا عمري؟؟."
قلت وانا اضم منيرة اللي بدت تغفى واحنا ماوصلناا لسه: جيبلي كوكتيل فواكه مع عصير فراولة وآيس كريم فانيليا.."
وافي وهو يحك شعره: حبيبتي مو كأنه كثير؟؟..احس ان وزنك زايد هالايام شوي.."
صرخت فيه بعتب: واااااااااافي..حرام عليك والله ما اكلت شيء من الصبح.."
ولد صيته ضحك بلؤم: هع هع.."
قلدته وانا معصبه: هع هع..هذا اللي فالحين فيه انت وخاالك...روح جيب لي بس اللي طلبته.."
وافي وهو يفتح فمه: قالولك الهندي اللي يشتغل بحوشكم؟؟"
قلت وانا احط ايدي فوق ايده بنبرة اسف وملصحه: آسفه حبيبي..بس عصبت شوي..يله يا قمر...جيب لي اللي طلبت منك.."
وافي وهو يرفع يدينه للسما: ماورانا غير الطاعه..لااا تفتحون الباب الا اذا رجعت لكم.."
هزيت راسي له وقعدت اربت على ظهر منورة اللي على وشك تغفى...
رجع وافي بعد شوي..ومعه العصيرات..اللي طلبتهاا..ووزعناها على الكل...وطبعاا ماكنت قادرة آكل لأني متغطية زين..ابوي الله يرحمه كان يسمحلي اكشف اذا جيت اكل بس..!!
وافي اللي انتبه لمعاناتي وقف بسيارته جنب ممشى..فشلت غطاي وقعدت آكل واناا اسولف وااشر على بعض الناس اللي تركض وننكت اناا ووافي عليهم.....
وافي وهو يأشر على حرمه تهرول وهي لاابسه نقاابها: طاالعي لااا يفوتك....خخخخ....شكلهاا تحفه.."
: وافي حرام عليك..تبي تنحف وماالها الا الركض.."
وافي وهو مو مقتنع: تروح تسجلهاا بنادي.."
قلت وانا اتنهد: والله مساكين انا الحريم..."
وافي بنبرة لهاا معنى: تعتبرين نفسك مسكينه؟؟.."
سكت اشوي واناا ابعد عيوني عنه...اناا مسكينه؟؟..ابدا انا ملكه فعلااا...لأن حب وافي يرفعني لعند النجوم...لأن حب وافي حقق لي الحلم المستحيل الاحساس بالامان اللي انا فقدتهم فترة طويله..رغم ان تجي لي بعض اللحظات احس بضيق فضيع..واحس اني راح افترق عن وافي فراق مامثله فراق...
رديت على وافي واناا ابتسم: اناا ملكه يا وافي مو مسكينه.."
ابتسم لي بكسل وبعد خصله نزلت على وجهي بس رجعت الخصله بكل تمرد مكاانهاا..
وافي بضحكه: كثير فيك اشياء تشبهك ياا ملكه.."
: وافي؟؟!!" نطقتهاا بتردد وبدون سبب بس كنت محتاجه اني انطق اسمه...
وافي بلهفة: وشوو؟؟..وش كنت تبين تقولين؟؟"
حلفت له بصدق: والله ماكنت ابي اقول شيء..بس احب انطق اسمك..اسمك رائع يا وافي...وافي..واافي.."
قعدت اكرر اسمه بتلذذ غريب...
كان بيتكلم ويقول شيء..بس اكتفى بابتسامه واشر لي على اللي بايدي: كليه يا عيوني....عشان ورانا مشوار.."
هزيت راسي له واكلت اللي اقدر عليه وقطيت البااقي..ورحناا لتويز آر اص..وكانت تجربه ممتعه مع عيال صيته خصوصا اني كنت مع البنت ووافي كان مع الولد..وكناا نلعب بالالعاب لأن المكان فاضي...وصوت ضحكاتنا يتعاالى بالمكان بدون حساب...
لدرجة ان لمن دخلوا ناس المحل واناا ووافي قاعدين نلعب ببعض الالعاب وصوت ضحكتي يتردد ويرتفع..فاضطريت اسكت لمن اشرت الحرمه على راسهاا يعني مجنونة وناظرت بزوجهاا... اماا وافي الحيوان اشر علي وهو كاتم ضحكته..واضطريت احترم نفسي والم الالعاب بالعربية واطلع...
________________________________________
اعجبني الفستان على مهاا..كان مرة مرتب...ومثل ماتبيه اهي...بدانتيل فرنسي..وطرحه خليجية....
وناسب جسمهاا مرة..خصوصا مع مشدات الكروسيه اللي نحتت خصرها وابرزته بشكل حلوو..مع العلم ان جسم مهاا اساسا حلو...
قالت وهي مبسوطة على شكلها بالمرايه: روعه صح؟؟"
صيته وهي تحك شعرهاا: حلوو بس مرة فخم..احس انهم بطلوا هالموديلات يا مهاا..."
مهاا وهي مو راضيه تقتنع: بالعكس..انتي ماشفت آخر حفله لبليساا؟؟ (( بليساا هي اليساا))كانت لاابسه مشد كروسيه مخلي جسمها فنان ...بعدين حتى جويل بالصراحه احلى قالت انه راجع وان هالموديلات راجعه.."
وكملت بفرح: والله لرقص بالعرس..ولاا همني احد...ونااسه..بهز وسطي..وبرقص مصري..على اغنية الواد ئلبو بيوجعوا..."
قلت واناا اضحك: مانتيب صااحيه..عز الله هج الرجال يا مهاا..ماراح نشوف غير غبااره.."
مهاا وهي تكش علي بايدينهاا: غيرانه من جرأتي..حبيبتي عيونه راح تطلع من محاجرهاا..يحمد ربه ان مهاا آل.. بترقص قدامه..تراها ماحصلت قبل لأحد.."
قلت بخجل: يااويلي ماتخيل اخلي وافي يشوفني واناا ارقص...ساتيح كثير.."
مهاا ب قناعه: شفتي هذا انتم اكثركم...لكن ماعندي بأحد برقص واهتز بدون تفكير.."
وحطيت ايدها على خصرهاا وقامت تتلوى قدامناا بحركات حليوة...واناا وصيته ميتين ضحك على خباالها اللي ماراح ينتهي....
رجعت الخيااطه فاضطرت مهاا تحترم نفسهاا شوي...قلت للخياطه بعض التغييرات الضرورية...وقلتهاا لنا راح نرسل لها السواق بكره...ودفعناا قيمة الفستان...
طلعناا من المشغل كلناا...وقررننا نروح لكافيه قبل لااا نرجع البيت...اخترناا توتي كافيه اللي بالتحلية...ولمن وصلناا كان مرة زحمه....بس لقينا لناا طاولة....
مهاا اول ماجلسناا: اسمعي...اناا مفكرة ازف هالهم معي.."
صيته بجدية: مهاا عيب عليك...اي هم؟؟..احترمي الفاظك...ترى كذا موب زين..تخيلي بكره تغلطين وتقولين له بوجهه هم؟؟!!"
مهاا وهي تهز كتوفهاا بدون اهتمام وتقلب المنيو بيدهاا: ماا يهمني..والله ثم والله اني وصيت وحده من خويااتي تدعي ان الله يآخذه وهي رايحه عمره الاسبوع اللي فات.."
قلت وانا مفجوعة: ياااويلي...من جدك يا مهاا؟؟..حرام عليك اذا انت ماتبينه ترى اهله يبونه.."
مهاا بعصبية وهي تنادي الجرسون: انا مايهموني اهله يا ملكه...لو هم خايفين عليه كان احترموا رفضي..لكن ربي باذن الله بيقبل دعوتي عشان يعرفون ان الله حق!!"
: مهاا يا بعد عمري..مو كذا تنحل الامور...خلااص ربي كتبه من نصيبك...شلون تجرأين تدعين عليه؟؟.."
صيته وهي تحاول ماترفع صوتها: والاخت صديقتك..صديقتك الصدوقة دعت على رجلك بعمره.."
مهاا وهي تكلم الجرسون اللي واقف فوق راسنا: جيب هذا وهذا وهذا...." ولفت راسها علينا وقالت: لااا الله لا يسامحهاا..تخيلي وش قالت؟؟..قالت انه دعت ان ربي يسخره لي..هذي دعوة بالله؟؟"
: ايه هذي الدعوة مو الهباب اللي كنت تبينها تقوله.."
راح الجرسون من عندنا فتكملت صيته بعصبية: مهاا...يا مهاا مايصير كذاا..حاولي تكسبينه يا قلبي..انت ماتبين ترجعين مطلقة.."
مهاا بلاا مبالاة: الا انا حالفه اني ما اعيش معه اكثر من شهرين..خلوه يطلقني..ترى عمر الطلااق ماكان آخر الدنياا.."
سكت ولااا علقت على كلاامها..فكرت الطلااق اللي كانت تلح علي بين وقت لوقت...رغم انهاا كانت تخوفني بنفس الوقت..
اما هالحين لا يمكن اطلب الطلااق من وافي لو يسوي فيني اللي يسويه...اساسا خلااص حبه سكن في شراييني وصعب علي اتخلص منه...يعني حتى لو زعل مني راح اراضيه بدون ما افكر مرتين مين اللي غلط على الثاني..
صيته بهدوء: شوفي يا مهاا...اناا حاسه ان ولد عمك راح يحطك بعيونه...خصوصا انه يبيك من زمان..هذي وحده...ثانيا..ولد العم دايم يحط بنت عمه فوق راسه...لأنه يحسب احساب اهلهاا...لكن شوفي اناا...اناا كنت رافضه عيال عمومتي كلهم...وكان حلمي اخذ واحد من بره الجماعه كلهاا...حتى اني ماكنت ابيه يكون غني...كنت اعتقد اني قادره انجح هالزواج مهما كانت التحديات والظروف...لكن مع صالح..طلعت عيوني من محاجرهاا...ماكان يقبل مني اي شيء...حتى لمن اشتريت له سيارة...رفض يآخذها وزعل مني ونام بره البيت اسبوع كامل...يا مهاا ولد عمك من نفس طبقتك الاجتماعيه...من نفس قبيلتك.."
سكتناا اناا ومهاا ولااا علقناا على كلاام صيته...اللي فتح جروح مالهاا اول او آخر...كان شكلهاا يقطع القلب وهي تتكلم رغم الهدوء اللي غلف صوتهاا...بس حركات يدينهاا وعيونها كانت واضحه مرة...
قلت واناا اتمدد جنب وافي على السرير: خاايفه..."
وافي وهو مغمض عيونه: من ايش؟؟.."
: من كل شيء وعلى كل شيء..."
وافي وهو يتثاوب: اممم...وش اللي مشغل بالك؟؟"
رديت واناا اغمض عيوني: خاايفه على مهاا...خايفه على صيته..خاايفه على جدتنا...خاايفه على عفرا..وعلى روعه وسماح.."
وافي حط ايده فوق ايدي: ليش تفكرين بكل هالعالم؟؟"
: طبيعتي...متعودة احب واحب...واعطي واعطي..ولااا انتظر من احد انه يحبني او يعطيني.."
ضغط وافي على ايدي بقوة: وانت معي انسي كل العالم..وفكري فيني اناا وبس...لااا تخافين على احد ولااا من احد وانت معي..حبيني اناا وبس...وهذا راح يكفيك..."
ابتسمت بنعومة له..وقلت وانا ادخل تحت البطاانية: بحااول...يا وافي...بس علشاانك انت.." وهمست بصوت واطي وانا العب بشعره.."لأنك اكثر واحد اخااف منه واخااف عليه..!!"
لكن وافي ماسمعني..لأنه ناام بسرعه...!!
بعد يومين...
صرخت بفرح وقمت انقز مكااني....واناا اشوف سمااح وروعه....كنت احس عمري بحلم...ومو مصدقة...كلمتهم وقررت اقابلهم..ويوم شفتهم...لااا شعوريا صرخت...
رحت يم سمااح وضميتهاا بقوة..ولااا اهتميت بالناس اللي تطالعناا...
سماح وهي تضحك: ههههه...شوفي كيف الناس يطالعون؟؟..بعدي عني..."
: هههه..اووه..سمااح مو مصدقة....مرررة نحفتي..."
سماح بزعل: يا سلااام يعني اناا سمينه؟؟.."
مارديت عليهاا لأنها عارفة انها ميب سمينه وانهاا عصله...بس صارت اعصل من اول...
التفت على روعه اللي كانت واقفه وراهاا....روعه ماكانت متغطيه كانت بس حاطه الشيله على راسهاا...وشكلهاا كان غييييير...
ضميت روعه بعد..بس بحنان مو بدفااشه...
روعه بفرح: ياااااه..من زمان ماشفتك...احس انك مغبره.."
ضميت روعه من جديد...لمن سمعت جملتهاا...يعني لسه بقايا روعه القديمه موجوده...ورحناا لطاولة اللي حاجزينهاا لناا...