بالجامعه قررت رفع المعدّل
ودي عشان الوضع لي يتعدّل
اقول قول ولا ابيه يتبدّل
هذا كلام(ن) صارم(ن) دون زوغات
محاضرة بمحاضره اكتب الدرس
ما افكر ببيت(ن) ولا افكر بعرس
ماسك قلم وأكتب دروسي على الطرس
واحاول اجمع قد ما اقدر علامات
اخاوي الشاطر ولا اخاوي التيس
حتى لو انه من صقور القرانيس
اهم شي شاطر ولو انه بسيس
والنفع يظهر دايماً بالنهايات
وللامتحان اشد حيلي واذاكر
ما ألعب الطرنيب وافرش جواكر
والّا اسافر لعب وأقطع تذاكر
ودي أبسّط يوم أحسب الدرجات
أثبّت مثلّث وأدوّر بفرجار
كوساين التسعين تربيع للار
كله على شانك يادكتور عمّار
وبعد التكامل جيتنا باشتقاقات
وجانا إختبار(ن) صعب وقت النهائي
كنّ المدرس صار وضعه عدائي
وحنا نتباكا زي اولى ابتدائي
ضاع الطموح وراح والحلم قد مات
جانا اختبار(ن) ماحسبنا حسابه
كل المسائل بالصعوبه تشابه
والوقت مايكفيك حتى كتابه
إلا لو إن الوقت لك خمس ساعات
والإسئله من خارج المنهج إتهل
حلّل وعدّد بعدها برهن الحل
ولا تناقش كيف وشلون أو هل
ولا تقول إنك تبيه إختيارات
يا جامعتنا شوي خفي علينا
الصعب منتس صار سهل(ن) بيدينا
مكافأتنا شهور ثمّن تجينا
غير الجداول والتخربط والأزمات
وفختامها حتى المعدل تحدّر
ووقت النتايج كل منا يتودّر
هذا النصيب اللي علينا مقدّر
وصلوا على محمد كثير الصلوات..
وسلامتــــــكم..