السلام عليكم ورحمة الله وبركاته
بداية سبب كتابتي لهالموضوع الأمور اللي نشوفها تتكرر خلال فترة الاختبارات
حاولت أتجاهلها كثير ويمكن كثير مثلي
بس اللي صاير أنكم أجبرتوني أحكي بالموضوع
أول شيء أنتو جالسين تقولون حنا كبار ومافي أحد فينا أقل من 20 سنه
أجل وش حركات المراهقين هذي والدعاوي على العالم
كل ماتضايقتوا من دكتور ماده أو مراقب بديتوا فيها
وش اللي يشوفها بعياله والله لا يبارك فيه وماني عارفه ايش
عيب ياعالم والله عيب بطلو هالتصرفات
الدكتور مطلوب منه يختبرنا بكل شي موجود بالمحتوى من حقه يحط اي سؤال دامه ماخرج عن المحتوى
و المراقب أنسان مسؤول وهذي أمانه وراح ينسأل عنها يوم القيامه
أعطوه أوامر محدده وقوانين محدده وهو لازم يطبقها بحذافيرها
ارسلوا لنا الجامعه مسج أن الجوال غش مرتين خلال الاختبارات يعني الحكايه واضحه أنهم مدققين
ويجيك واحد يدعي عالمراقب ويهاوش والعالم وراه ماصدقوا يمسكون سالفه
أنا معكم أن مرات الإنسان نيته سليمه بس النظام نظام
وهالأمور أماااااااااااااااااااااااانه حطوها في بالكم أماااااااااااااااااااااانه محد يقدر يخون الأمانه ربي بيحاسبنا عليها
بطلوا حكاية الدعاوي هذي وربي كرهت الملتقى من كثر ماأشوف هالدعاوي دكاتره ومراقبين خلاص بجد يكفي
كلنا عندنا بيوت ووظايف وعيال ونذاكر اختبارنا ونذاكر لهم أختبارهم بعد هذا غير المسؤليات خارج البيت بعد
مافي شي يجي بسهوله مو معقول بيعطونا شهاده وحنا ماسوينا شيء
لحد يقول مشغول وماعندي وقت وظروف كل واحد يقدر يدبر له لو ساعتين يذاكر فيها
أبدأ من أول السمستر أمسك المواد شوي شوي كل وقت فراغ عندك
وإذا كنت ماتقدر بلاش هالجامعه من أساسها
لأني أول وحده ماراح أسمح أن أحد ينعطى شهاده بدون مايكون يستاهلها
لأن في الأخير الجيل الجاي عيالنا هم اللي بيخسرون بسبب مافي معلمين كفؤ
بسبب أن فيه ناس ماخذين الشهادات بدون مايكون أستفاد من تعليمه شيء
أخطائك لاتحملها غيرك أجتهد حاول قد ماتقدر
وربي مايضيع تعب
هالحكي من قلبي وأتمنى تفهمون وجهة نظري لأن جد تعبنا من هالحكايات
وحنا كبار كثير عليها
تمنيت ماأكتب موضوع مثل كذا بس يمكن تصحون من هالغفله وتنتبهون لهالأخطاء الكبيره
ختاماً أرجو أنكم تتقبلون كلامي بصدر رحب لأن ماحكيت الا من قهر فيني