|
رد: 47 درجة مشاركة ضاعت علي ظلم !! *صورة للنتيجة
السلام عليكم ورحمة الله وبركاته ..
أعتذر منكم جميعاً ع التأخير ، كله من هالفريدان اللي خرب النفسية 
والاخوان اللي راسلوني اسف جداً جداً ماقدرت ارد عليكم لان مشاركتي اقل من مئة !!
المهم بعلمكم وش صار معي ..
مشيت من الرياض بما أني كنت عند اهلي يومين (لأني موظف بالقصيم )
يوم السبت ووصلت الحساء تقريباً الساعة 11 وشوي وسيييده للجامعة 
مابي اكثر كلام المهم دخلت العمادة وعلى طول لمكتب "المرتزق" الفريدان
حصلت اثنين سكرتاريه وفيه يعني زحمة مراجعين .. كلمت السكرتير اللي مكتبه ع اليمين ( وللأمانة الرجل طيب ) وعلمته مبدئياً بالمشكلة وقال ليش تطق هالمشوار كان قدمت تظلم ويجيك الرد .. قلت له لو هي درجات قليلة وماضرت معدلي كثير ماجيتكم هنا ولا شفتوني ( ما اخذت وعطيته معه كثير لاني مابي اضيع وقت ابي ادخل على العميد واتفاهم معه )
المهم انتظرت حوالي نص ساعة ودخلت على المرتزق
السلام عليكم .. كيف حالك يادكتور
وعرفته بنفسي ،، يادكتور تراني جاي من مسافة 700 كيلو عشان اقابلك
عندي درجات بالمشاركة راحت علي ظلماً واجحافاً !!
قالي ليش تجي وتعب نفسك حنا فاتحين ايقونة تظلم حط مشكلتك ويجيك الرد !
قلت اول شئ انا مقدم تظلم ولو هي درجتين او خمس درجات لو حتى عشر درجات ماجيتكم .. لكن بأي حق أحل وآاتعب ويروح علي 47 درجة وينخسف معدلي من 3.66 لـ 2.91 وأنا متأكد اني مخلص كل شئ ..
قال ممكن الخطأ منك ( ويقعد يعطيني سالفة طالب نقس مشكلتي طلع من عنده الخطأ وطالب ثاني عشان ورقة الاختبار وخلوه يجي ويصححها بنفسه وشفتها عنده يبي يقنعني ) .. قلت يابن الحلال والله الذي لا إله الا هو انا متأكد حتى عندي مادتين درجاتي كاملة فيها والباقي كلها ناقصة
وعشان اثبت لك عندي مادة ناقصة فيها 7 درجات ليش مانقصت نفس المواد الثانية تتوقع الخلل مني ولا من نظامكم ؟؟؟
قال لا لا النظام مايكذب .. قلت اجل انا اللي جايك هالمسافة كلها عشان اكذب ولا ايش ؟!
وترا ماهو انا لحالي اللي انظلم اثنين قابلتهم برا نفس المشكلة والمنتدى ككككله يشتكون من نقص درجات المشاركة وهم متأكدين انهم مخلصين كل شئ !!!!!
بعدين ع الاقل رجعوا النظام القديم اللي نعرف درجات المشاركة كاملة ولا لا عشان ماننظلم
قال لا لا هاذي للطلاب الكسالى ومدري ايش ومن ذا الكلام
قلت لا كسالى ولا شئ الدعوة كلها كيف نرسبك يالطالب وصارت تجارة وسرق من جيوب هالطلاب !!
حقد علي من كلامي وقال خلاص انتظر تقفل ايقونة التظلم وبيجيك الرد ( يبي الفكه )
قلت مافيه مشكلة بس علموني وش اللي ماخلصته ؟؟
قال لا بيردون عليك بأيقونة التظلم !
قلت يابن الناس علموني عشان دامني عندكم هنا عشان اعطيك اللي يثبت انا ماني فاضي اطق مشاوير مع هالخطوط رايح جاي بسبب اخطائكم !!
المهم اكثر من نص ساعة وانا افهم فيه حسبي الله عليه ولا يفهم وطلعت من عنده ورجعت للسكرتير ( على امل أنه يفيدني بحل ) وقالي وش قالك الدكتور وعلمته .. قال أجل رح لواحد أسمه اظاهر قالي اسمه صلاح ( نسيت اسم عائلته ) هو اللي يقدر يطلع لك وش اللي ماخلصت لانه هو المسئول عن الموقع كله .. رحت لصلاح هاذا ولقيت مكتبه مقفل ورجعت للسكرتير وعلمته انه ماهو موجود وسأل عنه احد الموظفين وصار له كم يوم ماداوم اظاهر طالع إجازة !!
المهم ماطلعت من الجامعة الا حدود الساعة 2 الظهر ولا طلعت من هالمشوار كله بأي فاااايدة ألا اني عرفت أن الدعوة كلها سرق في سرق ومصلحتك يا الطالب في حريقة اهم شئ انك الرسوم تدفع وبس !
الشكوى لله مالي ألا انتظر ردهم بالأيقونة والله يزينها ..
لا تحرموني مني دعواتكم ،،
|