.
.
.

صمت الرجاء لاتلحقه نبرة اليأس
اطلق عنان العمر واعلن تحديك
لاصار مالك سلطةٍ تحكم الناس
خل الأوادم فوقها الرب يكفيك
ولاضاعت ايامك على دق مرواس
الحق على عمرك ترى اليوم يمديك
لاتلحق الشرهه مناقيد وأفلاس
حاول تعدل ميلتك قبل نوصيك
الذنب وحشة ليل في قطع الأنفاس
والتوبه اغلى جايزة منك واليك
لاتجعل الحيره على الواقع الباس
لامت واحد فالمخاليق يرثيك
ياجاهل الدنيا ترى باسها باس
ماتروي العطشان وشلون ترويك؟
ان ماجعلت ايمانك البيت والساس
لاتأمن الدنيا وعثراتها فيك
احذر مفاتنها ترى طيشها انعاس
وان ماصحيت ايجيك وقتاً يصحيك
لو زينت لك وجه الايام بألماس
اما عزانا فيك ولا نعزيك
العمر مثل العود وايامك الفاس
ومهما ارتفع راسك على الخد ترميك
هذي خلاصة ماعرفته بلاأقياس
ولافيه بالدنيا سوا الرب يحميك
وصلاة ربي عد ماهب نسناس
على شفيعاً فالحشر للمهاليك

لـ الشاعر // هيآف السبيعي