الموضوع: جميع التخصصات تجمع طالبات التحضيريه سنه 1434 - 1335 ..
عرض مشاركة واحدة
قديم 2013- 7- 19   #2
آإحسآإس
أكـاديـمـي فـعّـال
الملف الشخصي:
رقم العضوية : 105306
تاريخ التسجيل: Fri Mar 2012
المشاركات: 212
الـجنــس : أنـثـى
عدد الـنقـاط : 50
مؤشر المستوى: 57
آإحسآإس will become famous soon enough
بيانات الطالب:
الكلية: كلية التربية بالدمام
الدراسة: انتظام
التخصص: رياض أطفال
المستوى: المستوى الخامس
 الأوسمة و جوائز  بيانات الاتصال بالعضو  اخر مواضيع العضو
آإحسآإس غير متواجد حالياً
رد: تجمع طالبات التحضيريه سنه 1434 - 1335 ..

اهلاً ببنات التحضيري ومبروك قبولكم في كليتنا .
أول شي ماعندنا مبنى خاص فينا كلها أسياب يعني باختصار قسم كامل مع بنات الدبلوم .
موجودة في كلية العلوم بوصف لكم بالضبط , بعد ماتدخلين من البوابة الرئيسية لفي يمين على طول بتلقين جسر طويل أمشي وأمشي وبتلقين قدامك مبنى امشي شوي ولفي يسار وبتلقين بوابة كلية العلوم أدخلي بتشوفين ساحة كبيرة مرة امشي وانتي تمشين خليك لافة وجهك على اليمين بتلقين غرفة زي القزاز خليها وكملي مشي بعدين بتلقين مكتب صغير وفيه وحدة من الأمن او كذا وحدة البوابة اللي جنب مكتبها بالضبط هذي كليتنا ادخلي بتلقين درج اطلعي فوق وهلا بك في التربية , في كلام شبه أكيد يغيرون موقع الكلية بيصير المبنى اللي جنب الكافتيريا عاد لا غيروه اسألوا وين الكافتيريا ولا لقيتوها بتلقون جنبها مبنى قديم شوي هذي كليتنا إن شاء الله .

بخصوص اللبس :
بالسمستر الأول كانوا مشددين مرة على ألوان التنانير وضيقها وقصرها بس على السمستر الثاني صدر قرار بأنو نلبس اللي نبي بس بحدود .
التنانير : الجينز + الأسترتش + الميد + الكلوش + أي قماش وترا بطلوا الجينز .
الألوان : الأسود + كحلي + الرمادي بجميع درجاته + البيج .
البلايز والتيشرتات والقمصان البسي اللي ودك فيه بس الحد المسموح فيه لنص الكم .
الشنط : نصيحتي لكم لاتأخذون شنط كبيرة بتتعبين وانتي تشيلينها خذي وسط ولا صغيرة .
وإذا على الكتب شيليها بيدك ولا الله يخلي اللواكر .
الشوز : الفلات الفلات الفلات أي لون وأي نوع أهم شي فلات لأن بيذبحك المشي,لا تلبسين الكعب لأنك بتصيرين مسخرة وعلى العموم هي حرية شخصية .
الميك آب : خليك ناعمة ولو تبين نصيحتي حطي واقي شمس أو إي كريم حابة وأكتفي بماسكارا وروج ناعم .
الشعر : اللي ودك فيه ويناسبك بس خلي شعرك على طبيعته أحلى أو ستريت , وإذا بتسوين تكسير او ويفي حبذا يكون ناعم مرة .

المسموح والممنوع :
- جوال الكاميرا ممنوع بس أغلب البنات اذا مو كلهم يجيبون جوالاتهم المهم لا تطلعونه قدام الأمن عشان ماتشوفينه الا آخر السمستر وخلوا معكم جوال أبو لمبة دايم ترا بينفعكم .
- فيه دكتورات يحاسبون على اللبس والألوان وأحياناً توصل تطردك برا أنتبهوا من الضيق والقصير , طبعاً فيه دكتورات يوضحون لكم أيش المسموح والممنوع في محاضرتها .
- العباية داخل القاعة ممنوع بس فيه دكتورات عادي عندهم .

المكافأة : 850 نعمة وشيء أحسن من لاشيء .

الكتب : اسعارها من 20 إلى 100 ماتتعداها .

اللواكر : أول ماتدخلين من البوابة الرئيسية بتلقين مبنى قدامك هذا مبنى اللواكر , أيجار اللوكر ب 100 للسنة كاملة .

ونصيحتي لكم لا تبالغون في اللبس والميك آب و وتسوون تسريحات ترا مايليق في بنت جاية تطلب العلم , يعني جد في أشكال في الجامعة تصدم من كثر ماهي أوفر , خليك ناعمة ومرتبة , ونظافتك أهم من أي شي والعطورات اللي ودك بس عود مع الصبح وقوي لا تكفين ترا تقلب كبودنا .
و إذا بديتي تقضين خذي لك تنورتين وشوز وشنطة وكم بلوزة لا تكثرين يعني تكفي للأسبوع الأول لأن بتشوفين هناك اشكال وانواع وبتعرفين ستايلات بنات الجامعة وكيف يلبسون .
الدراسة حلوة وممتعة وتختلف كثير عن المراحل السابقة وكل ماتقدمتي وصرتي مستوى أعلى يصعب اكثر بس ترا فيه الصعب وفيه السهل وطبيعي إن الجامعة تختلف عن المدرسة , لأن هنا بتصيرين انتي مسؤولة عن نفسك يعني خلاص كبيرة , أعتمدي على نفسك في كل شي ولا تثقين في أحد بسرعة وبرضو لا تصيرين معقدة ترا الجامعة من أجمل المراحل والحياة حلوة لو عرفتي تعيشيها صح .
واللي تبي كتبي تبع السنة التحضيرية ما احتاجها ترا ومع بداية السنة نلتقي إن شاء الله وأعطيها .
وبالنهاية أتمنى افدتكم لو شوي واتمنى لكم سنة دراسية جميلة وممتعة .
ولو في سؤال او أي شي أنا حاضرة .
  رد مع اقتباس