ملتقى طلاب وطالبات جامعة الملك فيصل,جامعة الدمام - عرض مشاركة واحدة - اللغة الانجليزية Fourth year ladies .. First semester ..

سحااآآااب ~ · 2013- 7- 22

اقتباس:

المشاركة الأصلية كتبت بواسطة Princess Sara

ايش الاختياري اللي قصدك؟
والله يجزاك خير على الموضوع ..

وبالنسبة لترتيب المواد بالعربة قالوا اليوم بس متى اي ساعة؟

المواد الاختيارية تكون بمستوى 7 و 8 بس ..
يعني كيف ؟
ينزلون لك ثلاث مواد وانتي تختارين منهم ..
مثال اللحين بمستوى سابع عندنا 3 مواد علم لغة اجتماعي
وتعدد لغوي وتخطيط لغوي تختارين وحدة بس تدرسينها
وكلهم متطلب لمقدمة اللغويات ..

أما بالنسبة لترتيب المواد ماحد عنده علم كل بنت
لها كلآم ننتظر ونشوف آخرتها معهم ..

اقتباس:

المشاركة الأصلية كتبت بواسطة Sanfoor

فتحو الجداول بالبيبول سوفت ؟ فيه احد زيي لمن اروح مركز طلاب يطلع له ايرور !!

لا التسجيل ما بعد يفتح ,
أنا يطلع لي الفصل الصيفي الى اللحين ..

اقتباس:

المشاركة الأصلية كتبت بواسطة مينولوبي كروز

اهلين سحاب موضوع ممتاز براااافووو😁👍👍
وبهالمناسبة عندي كم استفسار حلو

الحين التسجيل ما بدا صح ؟؟ والمواد لسا ممانزلت ؟؟

لاني كل ما افتح البيبول سوفت واسوي بحث تطلع لي بس مواد الصيفي

شي ثاني واسفين عالاطالة

هل راح تزل هذي المواد بالترم الاول ولا لا ؟؟؟👇👇
صحة ولياقه
ادب مقارن
النقد الادبي
تحليل الخطاب
الرواية الحديثه
الادب المسرحي الحديث

<<<< هل راح ينزلون هالترم ان شالله ولا تسيف
😁😁😁
وشكككرا مقدما ياحللوووووين 🌺🌺🌸🌸

اهلاً أهلاً
المواد لسآ مانزلت والتسجيل مابعد يفتح
وأنا زيك تطلع لي مواد الصيفي ..
وبالنسبة للمواد اللي نازلة هالترم من اللي كتبتيهم
نقد وتحليل خطاب وادب مسرحي وادب مقارن .
رواية وصحة ولياقه مانزلوا ..
اذا حابه تتأكدين ارجعي للجدول اللي نزلته روينا بأول صفحة ..

اقتباس:

المشاركة الأصلية كتبت بواسطة basooma

ماشاء الله عليكم بنات بتفتكون صرتوا ف مستويات متقدمه الله يوفقكم وعقبال التخرج
بنات انا سألت كثير وم احد جاوبني وم لقيت غير هالموضوع بما انكم تخصص انجليزي ..
انا توني تخصصت وحابه اعرف ايش احسن الدكاتره لمستوى ثالث ومحتويات المواد من حيث السهوله والصعوبه اتمنى احد يفيديني
مشكورين مقدما

ي قلبي آمييين وياك
وعسى الله يوفقك ببداية مشوارك
بهالقسم ويجعلك من الأوائل والمتفوقين ..
وبالجد والاجتهاد بتوصلين للي وصلنا له ان شاء الله ..
حنا تعبنا لين وصلنا هنا الحمد لله

أما بالنسبة للمواد : هم 4 مواد تخصص و 2 عامة .
مواد التخصص بداية ً هي الاساسيات قراءة وكتابة واستماع وقواعد
جدا جدا سهله وأقرب للتفاهه المواد تبدأ تصعب لما تدخلين
مستوى رابع .. وبتكلم عن كل وحدة لحالها وطبيعة كل مادة ..

1. Reading : مادة جداً سهله تعتمد بشكل كبيير على قدرتك على القراءة وفيها
بعض الكلمات والقطع الخارجية ويعلمونكم بعض المهارات وكذا يعني ,, والكتاب
اللي كنا ندرسه حلوو ومبسط .
درستني هالمادة غادة القويحص كانت حليووه نوعاً ما شرحها مو مره بس كنت افهم ..
وتراها مزاجية واذا كانت معصبة لو تموتين ماتدخلين بعدها واسئلتها مش بطاله ..
امم جربتها بمادة تخصص السمستر اللي فات مررره شرحها كان روووعه
حبيتها أكثر من لما كانت تدرسني ريدينق .

2. Writing : مادة سههله تتعلمين فيها كيف تكونين جمل وكيف تكتبين بارجراف
بشكل مطور وفيها بعض القاعدات وكذاا ..
أخذتها مع ليلى الحسن إنسانة ماتتكرر وما بوفيها حقها لو بتكلم عنها
.. بإختصار لو لقيتي اسمها خذيها بدون تردد .

3. Grammar : هذي المادة ما بلعتها ولا حبيتها يمكن لإني ما احب القواعد ..
هي مو صعبة لا ابد , يعني كل يونت تاخذين كم قاعدة وتطبيق عليها جمل وبس .
أخذتها مع أحمد حسن يكررف بالواجبات لين تقولين بس .. البنات يحبونه بس أنا
ما دخل مزاجي .. الزبدة نجحت عنده ولله الحمد .. يمدحون لهالمادة آمنه صالح .

4. Listening : فيه بناات كثييير مستصعبين المادة وكثير حملوها بعد مدري ليش !
بس انا اشوفه سهله واسهل من السهل بعد .. نظامها كله سماع في سماع ,
تشغل لكم الدكتورة شريط تسجيل يكون حوار أو قصه أو أي شي وع اساسها
تجيبين على الاسئلة ..
طبعاً هالمادة ذي ما تتذاكر لانه بالفاينل بجيبون لكم شي خارجي ,,
اخذتها مع بدرية الشريف بس للاسف مو موجودة اللحين .

نجي للمواد العامة :

1. انترنت واتصالات : حاسب في حاسب يعلمونكم على برامج الوورد
والبوربوينت والاكسل مررره تافهه هالماده اذا ما جبتي فيها A ماعندك سالفة
درست عند مها القاضي ماتعجبني ابداً وتطول بالمحاضرة .

2. عقيدة واخلاق : مادة دينيه تتكلم عن التوحيد وانواعه .. الخ
سهله المادة مافيها اي صعوبة ..
باختصار اذا شفتي اسمي المبروك الشيباني خوذي
عنده وانتي مغمضه

وبس ..
تعبت
اتمنى اني افدتك ولو بالقليل ..

اممم ايه !
ترى احتمال اللي درسونا مايدرسونكم ,, لكن اذا فتح التسجيل ان شاء الله
وطلعوا عندكم الدكاترة ,, أبد علمونا اسمائهم وان شاء الله ماراح نقصر معكم

مسيرة انجليزية موفقه ياارب
وأي سؤال بالخدمة .. واذا حابة تنقلين
اللي كتبته لموضوعكم ماعندي مشكله
عشان الكل يستفيد