السلام عليكم ورحمة الله وبركاته

الحمدلله انقبلت بكلية الأمير سلطان، واليوم رحت عشان أكمل إجراءات القبول.

بكتب هنا الأشياء اللي ممكن تفيد أي أحد رايح يسلم الأوراق والوثائق، لأني كنت محتاجة أحد يفيدني..

أول شيء رحت للمبنى حق لجنة القبول اللي هو راح يكون المبنى اللي نداوم فيه (طالبات) بس الطلاب ما أعرف،

فيه أخوات يسلمونك أول شيء يطلبون منك الشهادة ونتائج التحصيلي والقدرات وصورتين من بطاقة الأحوال حقتك وحقت الوالد وسجل العائلة بعدين يعطونك ملف هذا الملف فيه أوراق من ضمنها ورقة التعهدات توقعينها وفيه ورقة حقت التمديد والابتعاث اذا ما كلمتي المدة اللي محددة لك تقدرين تمددين، وفيها حقت الفحص الطبي وفيها حقت الأدلة الجنائية وفيها حقت البنك الأهلي هذا اللي أتذكره..

بعد ما تخلصين من تعبئة الأوراق راح يعطونك نسخة من البيانات اللي كتبتيها وقت تسجيلك بالموقع عشان تتأكدين منها وتوقعين عليها.

بعدين يعطونك سجلين واحد تصريح للسواق والثاني حق البطاقة الجامعية، وهذي تاخذينها معاك وتعبينها وتقدرين تسلمينها أثناء بداية الدوام مع ورقة البنك.

بعدين هم راح يرسلون ورقة الفحص الطبي اللي عبيتيها للمجمع الطبي فتروحين للعيادات الخارجية وتسألين عن شخص راح يقولون لك اسمه، وهو يعطيك بطاقة حقت المستشفى وتدخلين عند دكتور يسألك أسئلة ويعطونك أوراق للأشعة والمختبر، وإذا خلصتي إسألي هم متى تراجعينهم عشان تاخذين ملف النتايج وتسلمينه للجامعة.

بعدين تاخذين ورقة الأدلة الجنائية اللي أعطوك إياها وتروحين لهم عشان ياخذون بصماتك وراح يعطونك كرت عشان تدقين تسألينهم إذا خلصت النتايج أو لا.

وكذا بعد ما تطلع نتايج الفحص الطبي والأدلة الجنائية تاخذينها وتودينها للكلية.

بكذا الحمدلله خلصتي إجراءات القبول *بعد المشورة* :")

وموفقين إن شاء الله .