السلام عليكم
بصراحة كنت ابي اكتب هالموضوع بمجرد رجوعي من الاحساء ولكن أشغال سيطرت على وقتي وتفكيري
هذي اول زيارة لي لمدينة الأحساء ولكن بعد اللي شفته فيها لن تكون الزيارة الأخيرة إن شاء الله
اختبرت مادة وحدة "فقه السيرة"
سافرت في نفس يوم الاختبار الساعة 6م ودخلت الهفوف الساعة 8.30
كنت محدد موقع الجامعة على خرائط الايفون ولكنه خذلني بمشكلة فنية حصلت في الاتصال
فقلت اذا خذلني الايفون فلن يخذلني أهل الاحساء
حاولت امشي على ذاكرتي للخريطة لكن ما نجحت
وتفاجأت إني وصلت الى وسط المدينة منطقة أسواق ومواقف ليموزين
قلت باخذ ليموزين يمشي قدامي الين يوصلني للجامعة واعطيه حقه بس للاسف كل الليموزينات واقفة وفاضية واصحابها مو عندها
لقيت شايب واقف على بعد 30 متر وقفت عنده وسلمت عليه وسالته عن الجامعة ؟ قال هذي بالجهة الثانية من الهفوف
قلت مو مشكلة ابي ليموزبن , وما قصر هالشويب وقف ع الشارع ويأشر للموزينات الين وقف واحد بس كان معه ركاب وكانت وجهته غير جهة الجامعة
قلت للشايب اشرايك يا عم اروح بسيارتي قدام شوي واسأل قال اذا وصلت عند اول اشارة اسأل وبيدلونك
وعزمني وحاول فيني بس قلته يا عم وضعي كذا وكذا واختبار وراجع الرياض
والا انا بصراحة في خاطري تمنيت اجلس معه راعي سواليف وحبيب ومزوح ويفتح النفس
مشيت الى أول إشارة وسألت عندها واعطوني وصف بسيط واضح الى عند اشارة ثانية وقال اسأل هناك ويدلونك
ونفس الشي مشيت الى الإشارة اللي وصفها لي وسألت عندها واعطوني وصف بسيط واضح الى عند اشارة ثالثة وقال اسأل هناك ويدلونك
ونفس الشي مشيت الى الإشارة اللي وصفها لي وسألت عندها واعطوني وصف بسيط واضح الى عند اشارة رابعة وقال اسأل هناك ويدلونك
وآخر شي سألت واحد عند هالاشارة وقالي رح يسار ثم يمين تجيك الجامعة في الوجه
وفعلا على الوصف
بصراحة في البداية يوم كل واحد يوصف لي شوي ثم يقول اذا وصلت هناك اسأل قلت يمكن اللي يوصفون لي مو متاكدين من الوصف
لكن اللي اتضح لي فعلا وتأكد منه انهم عرفوا اني من برا الديرة فما يبون يكثرون الوصف عشان ما أتوه وأضيع مرة ثانية
وصلت الجامعة تقريبا الساعة 9.15 وقابلت طلاب من اهل الاحساء سلموا علي وسألوني "انت ياي من الرياض"
قلت ايه , قالوا الله يحييكم اهلنا واخوانا اذا تبون شي في الحسا نخدمكم بعيونا
قلت الله يكثر خيركم وما نستغني ويكفينا منكم المبادرة والسؤال
اختبرت ورجعت مسكت الطريق مرة ثانية الى الرياض وصلت حوالي الساعة2
بصراحة احرجتونا ياهل الحسا بطيبتكم وكرمكم وخدمتكم وتواضعكم وابتسامتكم
شكرا من الأعماق
ولنا زيارة أخرى قريبا إن شاء الله بعيدا عن أجواء الدراسة والاختبارات