اادفع ثلاث ارباع عمري لجل يوم
اجلس انا وياك واخذ كثيرك ..
واليا حصل يومين الله من علوم
واليا بغيت اسنين انت وضميرك ..
تراني استاهل وانا منك محروم
لاتحرم اللي منتظر مد خيرك ..
تعبير وجهك يعتبر طارد هموم
غمازتك اجرام الله يجيرك ..
بحات صوتك وانت صاحي من النوم
تكره اللي يكلمك صوت غيرك ..
تنهيد صدرك وانت ضايق ومهموم
من حسها سلم مصيره مصيرك ..
كلك على بعضك الياجيت ملموم
ماتنحسد الناس تحسد عشيرك ..
ياخي لحقني منك شرهه عتب لوم
قلبي كسيرك وانت تطعن كسيرك ..
شفني اخايل في السما برق وغيوم
ضميان وانت تشح عني غديرك ..
انا اعد من السهر ضيم ونجوم
وانت تحضن مسندك في سريرك ..
خلك على وضعك عسى وضعك يدوم
بس ودي في بعض الامور استشيرك ..
اذا اعتبرت اني اسيرك ومن قوم
ماهو كذا اصلا تعامل اسيرك ..
واذا افترضت ان فيه ظالم ومظلوم
تدري بلاش من فتراضي يثيرك ..
لكن تأكد من عرفتك لها اليوم
انا حياتي مابها شخص غيرك ..
:
:
