ملتقى طلاب وطالبات جامعة الملك فيصل,جامعة الدمام - عرض مشاركة واحدة - مواد مشتركة تجربة اول يوم في التطبيق في المدرسة ... وتنبيه بخصوص عدد ايام التدريب ..

بوبديـــــْع · #1 2013- 9- 28

اهلا احبتي ... بعد التوجيه رحت للمدرسة ... طبعااا مدرسة ارامكو .. وللاسف مافيه الا انا طالب انتساب ولا فيه بعد طلاب انتظام متدربين .. مافيه الا اناااا ... اكتشفت من اولها ان المدير سكااانه وكيله خخخخ ... جيت للسكرتي اول مره اشوف بدال الحارس سكرتي ... مدرسة دلع بصراحة .. المهم .. وين المدير قال هذا مكتبه .. رحت اشوف المدير .. السلام عليكم طال عمرك .. يفكري احد اولياء الامور .. وعليكم السلام تفضل آمر .. وضحت له اني طالب متدرب جاي من جامعة الملك فيصل ... رد وقال دقيقة .. الا وقال لي موضوعك عند الوكيل .. رحت للوكيل .... رحب اول شئ بس من عرف اني متدرب ... سوااا مسئول ولطعني من اولها ساعة الا ربع في المكتب ... ليش ؟؟ اقول في خاطري مسوي فيها انه بيختبر صبري ولا اييش ذااا ... عاااد انا بسرعة استوي ... الا جااا طبعا ماهو الشخص اللي قابلني اول مره .. قلت له .. اخوووي ياليت توظح لي وضعكم في هالمدرسة عشان اشوف وضعي انا بعد ... الحبيب فكرني من طلاب الانتظام .... قال معروفه وضعك دوام من الاحد الى الخميس والحضور الساعة 7 ومافيه تاااخير طبعاا وتوقع عندي الحضور والانصراف والاذونات ممنوعه والى نهاية الفصل الدراسي نشوف لك حل قلت له اي حل .. قال احتمال نحتاجك في الاختبارات ...ماقدرت اتصبر .. قاطعته.. قلت له تسمح لي بالمقاطعة .. قال .. قل وهو مسوي زعلان ... قلت له انا متدرب لطلاب الانتساب واقرى الخطاب مضبوط اللي في يدك محدد لي 12 يوم بس .. انا ملزم فيه .. وفما زاد فهذا اجتهاد مني ... فانا عسكري على راس العمل مرابط ماااخذ اجازه بستين واسطه عشان التدريب من 1/11/1434هـ وبحضر بعملي في 2/12/1434هـ .. فأنا حاسب حسابي هالشهر بس التاخير من ادارة التعليم ماهو مني هذا الخطاب بيدك محرر بتاريخ 19/11/1434هـ ... سكت استوعب بشويش ....شوي ووراني الوجه المبتسم الجميل

وقال ماشاء الله عليك انت مكافح انت ممتاز انت وانت مسوي يمدح اني مكمل التعليم ..... وانا اقول في خاطري الله يعين الطلاب المنتظمين اذا هذا اول اخلاقك .. المهم مالكم بالطويله .. الا وجا المدير وقال له هذا طال عمرك موظف ولا يقدر يجي الا الاسبوع الجاي وانا اقول نخليه يجي الاسبوع الجاي وبعدين نشوف له حل .. قال اللي تشوفه ... يلعن ام الدركسون ذااا قلت في خاطري مدري ساحره هالوكيل هاللي مخلي الكلمة كلمته ..... نقزت في وجهه قلت مانبي اللي تشوفه انا غير متفرغ عملي يوم بيوم ويصير 12 بيوم .. وبعض الاوقات 24 بيومين .. فوقتنا ماهو بلنا .. عطوني كلمة عشان ارتب وضعي معكم ولا عطوني خطابي لا هنتم اشوف لي مدرسة غيركم .. قال الوكيل لا لا انت بس خلك نحتاجك .. حسيت عندهم نقص في المعلمين بكثير وبيكرفوني خلال هالفتره اللي هي قبل اجازة العيد .... بس المشكله المدير سكانه وكيله .. المهم .. انا وضحت لهم اني وقت استلامي بأأكون في عملي ووقت تسليمي بجيكم ليمن اخلص 12 يوم ووضحت له ان هالشئ موضح لمشرفنا اللي هو الدكتور عبدالحي اخذت اوراق الايقونه للمدرس المتعاون ... ولا عندي مانع اني اجيكم الى نهاية الترم بس وقت تسليمي .. طبعا اهم يبغون يلزموني بجدول يومين في الاسبوع ولا ثلاث ايام في الاسبوع بس راحت عليهم بعد ماعرفوا ان عملي استلامات يعني لو بيحط لي جدول مثلا الاحد بيكون جدولي الاسبوع اللي بعده مااقدر اجي الاحد وهكذا .. احس انهم توهقوا فيني

ولا عندهم احد من طلاب الانتظام ولا الانتساب الا انا ...لان كان عندهم الفصل الماضي على كلام الوكيل 7 من جامعة فيصل وكلية الشريعة المنتظمين .. واول مره يجيهم منتسب ... وناااشب ... خخخخخ .... قالوا لي على الله تعال الاحد الجاي من 7 انتبه تتأخر وتجمل معنا في هالاسبوع واحنا بحول الله نحاول نشوف لك حل او نتصل على مشرفك ....قلت له عاادي لو تبي اجي الفجر بعد يفكرني بنصدم من 7 الصباح مايدري ان تجينااا اياااام نحضر في الفجريييه مسيكين ... احس بوجودي معهم غير مهضوم جدااا .... وانا عارف ان دكتور عبدالحي بيوقف معي لأن تنبيهاته في ملاحظاته مكتوبه وواضحه بتعاون المدرسة بظروف الطالب الوظيفية .. ماادري وش اسوي .. مافيه وقت للتغير المدرسة ... واحس ماارتحت بصراحة ... بس بشوف ربي يسهلها ... وودي ببعض تعليقاتكم تكفون قولوا علقوا عن اي شئ ماني مرتاح من امس .... ملاحظه مهمه لكم احبتي التدريب فقط 12يوم وهذا نسخة من خطاب ادارة تعليم الاحساء للمدارس اللي بنطبق فيهااا ... وبالتوفيق لنا ولكم احبتي ...
[warning]التدريب فقط 12 يوووم .. الرجاء الانتباه ..[/warning]