عليك اتكالي يالله العفو والغفران
تفرج لقلبي سبة الهم والضيقه
حمدتك على مانزلت من نعمة النسيان
وانا عبدك اللي خايف ذنوبه تعيقه
حصل ماحصل للعبد قد قالها ابوسلطان
وانا اللي حصل من صاحبي شي ماطيقه
لو اني مسامح واتحمل بعض الاحيان
وا طوف خطا الصاحب ولاحب تدقيقه
ماحب الخطا الجارح ولا الذل والحقران
وانا شاربن من دلة العز وابريقه
هبوب الندا هزت بقلبي غصين البان
عسى خير ياحلمن تمنيت تحقيقه
لكن الزمن سكر على دربه البيبان
وانا مالي الا ارضى بعذره وتصديقه
هجرني وانا توي صغيرن على الاحزان
وتوكل وانا ادعي له من الله توفيقه
رحل والله انه مادرى عن غلاه انسان
ولايمكن الايام تكشف عن مواثيقه
رحل ماذخر عن وجهي الالدموع الوان
وانا ناشفن ريقي وهو ناشفن ريقه