قلبي ياللي لواه من الصواديف لاوي *** جرحته الليالي و الحظوظ الرديـّـة
والله إني بوسط الناس كني خلاوي *** من يلوم المفارق عقب فرقا خويـّـة
أشهد إن المفارق من عظيم البلاوي *** مير هذا نصيبك يالعيون الشقيـّـة
اتجلد وأقول إني على البعد قاوي *** والله أعلم بقلبٍ فيه الأشواق حيـّـه
كيف راحت يابو تركي حياتي شقاوي *** وين درب السعادة والحياة الهنيـّـة
ليت لأهل الهوى والحب قاضي دعاوي *** كان أداعي عيون اللي فراقه خطيـّـة
كنّي المبلي اللي قطعته المكاوي *** كلما جظ بالونات زادوه كيـّـه
من إبداعات الشاعر/ دايم السيف
( الأمير/ خالد الفيصل )