.
.


ياجر قلبي جر لدن الغصوني
وغصون سدر جرها السيل جرا

على الـذي مشيـه تخـط بهونـي
والعصر من بين الفريقين مرا

وياليتهم فالدرب مـا واجهونـي
وياليتهم مـا زادوا الحر حـرا

ياليتهـم بالحـب مـا ولعـونـي
كان ابعدوا عني بخير وشـرا

ويا ليتهم عن حاجتي سايلوني
يوم إني أقعـد عندهـم وأتحـرا

وياليتهم من زادهـم أطعمونـي
وأنـا علـى زاد الحبيب أتجـرا

وأهله من أول بالورق يورقوني
على غدير حدرة الما يقرا

لا مبعد عنهم ولا قربوني
ولا عايف منهم ولاني مورا

وياليتهم يامنهم ولعوني
خلوني اقضي عازتي واتدرا

لا والله اللي بالهوى هوجروني
هجر بها الحيلات عيت تسرا

ادعج غنج يذبح بسود العيون
يذبـح إلـى منه هنف واستمرا

الخد بـرق فـي علـو المزونـي
تقول براق من الصيـف سـرا

ان مت في دافي حشاه ادفنوني
في مستكن الروح مهوب بـرا

بين النهود وقدّ روس القروني
عن الهبايب مستكن مذرا

وقفـت عنـده شايحـات عيونـي
كني غريـر باللهاوي مضـرا

يا عزتا لي من تفرق شطوني
يعزا لي ارمي بالسلب واتعرا

.
.

http://www.youtube.com/watch?v=ojk-grPgIGs