تضج بهالجسـد هيبـة مواجعنـا ونتألّـم
ويسبقنا ألم روح ٍ خطاهـا مـن مطامعنـا
نلم أرواحنا بين الخضوع ودعـوة المسلـم
عسى نور الدُعا يشفع ورب الكون يسمعنـا
بشر ..\.. ياما خطينا .. الخطا وارد ونتعلّم
لأن ( اللّه ) خالقنا طِهر والديـن وازعنـا
محد منّا تبع درب الهروج ولاقـدر يظلـم
ولايمكن يكون الظلم نسخه مـن طبايعنـا
أحد يمكن وهب نفسه ( قضية حق ) واتكلّم
وبَعض الحق مايلقا أحد يستوعـب المعنـى
كثير اللي رخص قيمة كلامه حِسّه المُظلـم
قليل اللي حكى اشرق حضوره في مسامعنا
ضعيف النفس ماكنّه أبـد صلّـى ولاسلّـم
ذليل الـدرب ماتقـوى شياطينـه تضيّعنـا
عزيز الروح مايترك قناعاته وهـو يعلـم
بأن الروح في ظل القناعـه كنـز يرفعنـا
يبوح القلب واوجاعه من الآآآآهات ماتسلـم
ونبني للتفـاؤل والأمـل احسـاس يدفعنـا
نبي نكتب ونتبادل أحاديث الـورق للحلـم
نبي نرسم جنونك يالقلم ويفيـض اروعنـا
نبي نستر جروحك يالزمان القاسي المؤلم
تبعثرنا أماني هالعمـر والشـوق يجمعنـا
محد منّا كسر شوكة هواه واسْتمـر يحلـم
لأن الحلم لايصبح حقيقـه ضمـن واقعنـا
تضج بهالجسد رهبـة مواجعنـا ونستسلـم
لرب ٍ نرتجي عفوه وغفرانه .. ومرجعنـا
نلم أرواحنا بين الخضوع ودعـوة المسلـم
عسى نور الدُعا يشفع ورب الكون يسمعنـا