اقدمها لكم هذه القصيدة
عساء ان تنال علي اعجابكم
خويت درب عمري ماخذاني دونهـا النسيـان
وأنا ياهل الملامه مارغبـت العيـش وحدانـي
ابيها مهرة ماعسفت صغيـره وبنـت حصـان
أبوها اللـي يفـك المشكلـه ويزبـن الجانـي
أبوها لاتعزوى باسمهـا فـزوا لـه العربـان
يحق الها الفخر فـي قولـة آل فـلان جدانـي
ابيها فـي بحـر عشريـن لازود ولا نقصـان
أبيها اقصر طويله والوصوف اشكال و الوانـي
أبي الجبهه كما الصبح وكما القوس أسود الحجان
وابيها ناعسـات ونرجسيـه سـود الأعيانـي
ابي رمش كما ريش يغطي الثلج في الأوجـان
وابي جفن يشيل الرمـش طربـان و كسلانـي
وابي خد مثل ورد تنمى فـي طـرف بستـان
وابي خشم صغير ومثل حد السيـف شامانـي
ابي البسمه كما البرق وثناياها كمـا المرجـان
وشفاهـا جمرتيـن وفمهـا خاتـم سليمـانـي
ابي شعر كما ذيـل الفـرس لا كبـت الميـدان
او الشلال لامـن بـات ليلـه بيـن الامتانـي
ابي جيد سـواة ابريـق فضـه ناتـق مليـان
وصـدر كنـه مرايـه عليهـا طلـع رمانـي
ابي ظهر كما الجدول وقدمن مثل غصن البـان
وخصر مثل مجدول العنـان وجسـم رويانـي
ابيهـا نابيـة ردف وبطـن ضامـر جوعـان
ابيها مدمجـة سـاق وقدمهـا لسـان ثعبانـي
ابيها بنت عـز مـن رغدهـا ينعـم الفستـان
ابي الرقه وابي الدقـه لهـا باطرافهـا شانـي
ابي المشيه كما اللي طالع من المعركه كسبـان
وابيها ترش مع خطواتهـا مسـك وريحانـي
ابي صوت إلى مني سمعته كـن فيـه الحـان
يدغدغ مسمعي ويثير كل السحر ف.. اشجانـي
ابيها حب واخلاص وهواجيس وفرح واحـزان
ابيها مثـل دكتـور اهالـي العشـق وصانـي
ابيهـا لوحـة ماصورتهـا ريشـة الفـنـان
ابيهـا جوهـرة ماجابهـا قاصـي ولادانـي
ابيها تنتصر لي مـن زمـان حطنـي نيشـان
وتبشـر بالغـلا اللـي مالفابـه واحـد ثانـي
مهرها قلب وشعـر يهـز القلـب و الوجـدان
والبسها القصيـد وتصيـح اوزانـي وقيفانـي
ابي اللي فات واللي فات صعب ومن لقى العنوان
يرد العلم وإلا افضـل ابقـى اعيـش وحدانـي