|
رد: ماهو شخصَ عابر في عيونيَ هو بين الضلوع و نبض المحاني ..✿, مسآحتكم الشعريه ..✿,
أنا الصديق اللـي لياطحـت شالـك
لضامتك دنياك والوقت بـك مـال
أنـا يمينـك شدنـي فـي شمـالـك
يمنى بلا يسرى ترى حالهـا حـال
أنـا عـزاك وعزوتـك لا جرالـك
من تاعس الدنيا هواجيس وأهـوال
ماني من اللي لاغتنـى مـا وفالـك
لو لك عليه من الجمايل والأفضـال
وماني صديقك كان وقتـك صفالـك
أنا صديقك لأدبرت فيـك الأحـوال
خذني عصى موسى إذا كنت هالـك
لمسحلك بحور القهر قول وأفعـال
فالك عسى الله يسعـد اليـوم فالـك
فالك عقب صوم الدهر عيد شـوال
وبالك يجي في خاطرك يـوم بالـك
أنك تغيـب ولاتجيلـي علـى بـال
لا .. لا تفكر أنت فـي مثـل ذلـك
إني أتخلى عنك لـو الزمـن طـال
ما أقول أنـا ياعـم مالـي ومالـك
ماترخص العشره ولا تغني أمـوال
أسمع جوابي قبل ما أسمـع سؤالـك
خارج حدود التغطيه وأرسل أرسال
على محيـط السالفـه حـط دالـك
أجيك رجلي كان ما جيـت خيـال
أنـا لياشـح الزمـن فـي وصالـك
تمدني النخوه على وصلـك حبـال
أنـا عمـى عيـن العـدو لا نوالـك
أنول روحه قبل ما روحـك تنـال
بينك وبين الشمس شجـرة ضلالـك
ماللشجر قيمـه إذا مالـه ضـلال
والليـل لـو الليـل مظلـم وحالـك
ترسمني الظلمى على صدره هـلال
ماني ولد عمـك ولا أغلـى عيالـك
خطوى الخوي يسوى بني عم وعيال
|