،
أنا ما جيت ادوّر في خطايا الوقت لي تبرير
............ ولا جيت اسرق انفاس المواجع .. يا معنيني
من اوطان المواجع جيت .. لي فيها بلاد .. وبير
............ ولي فيها سحايب .. ماتكفّ ولو تكفّيني
كريمة ماعليّ منها خلاف .. ولا عليّ تقصير
......... وفيّة .. لو غدر وادي الوفا تمطر .. وترويني
مجرّد عابرة وهم الامان الممتلي .. تزوير
............ لا جيت ارجوك تحملني .. ولا اصرخ لا تخليني
سألت الدرب عن جرّة خطاك .. ولا عطى تفسير
............ وانا مابيه لا يعطي جواب .. ولا يسليني
كلام ٍ حار في فمي .. تلعثم .. خانه التصوير
............ مثل ماخانني حظ الردى .. لين انهدم ليني
أنا ماجيت اصبّ الهم ذنب ويطلبك .. تكفير
............ ولا جيت اشربك موت الهقاوي يا مقهويني
مجرّدعابرة بارحل عن عيونك بلا تبرير
............ بلا عذر وبلا كلمة عتاب .. وقبل تقصيني !
فمان الطهر يا غربة شعور ويا عساك بخير
............ محطّات الغياب تلمّ همّي .. يا معنيني