وصباح الكسل اللي انتي عايشه بآجوائه
وصباح النوم الجميل
يعني باقي شهر بس على الاختبارات شهر ولافتحتي شيء حرام عليك اتركي عنك السمستر الاول واللعب
انتي بالسمستر الثاني وكل المواد دسمه وغثيثه وكثير
حمستك للمذاكره صح وشجعتك
ههههههههههههه ،،
لا لا لا جد اتكلم يعني المواد محتواهاا صدق كثير ومعلوماتها دسمه بس سهله وبسيطه وان شاء الله يمديك
تختمينها قبل الاختبارات ويصير عندك وقت للمراجعه،
نبدأ باول شيء اللي هو
التذوق الادبي
ماده عدد صفحاتها كثير بس سهله ونصيحه علشان ترسخ المعلومات افتحي الملزمة وتابعي شرح الدكتور
ماشاء الله باسلوبه بالشرح راح تفهمين المادة بالشكل اسرع واسهل،
طبعا اللي تركزين عليه مفهوم النص عن شنو يتكلم - مناسبة النص - قائل النص - معاني الكلمات - الاساليب اللغويه
لاتربكين نفسك بحفظ الابيات لانه مو مطالبين فيها .
ثاني مادة اللي هي
مبادئ علم الاجتماع
ماااده بجد عندي ابيخ ماده وغير مفهومه باي شكل من الاشكال ،، بس بالمجمل ماده تنبلع مع كاس بارد من البيبسي
وراح تنهضم ،، يعني من وجهة نظري ماده تحتاج الى مجهود شوي وتركيز لكثرة العلماء والتعريفات اللي فيها لانها
كثار وفيه خرائط ذهنيه بالموقع راح احطه لك تحت بالمرفقات ان شاء الله يفيدك.
ثالث ماده اللي هي
انجل كتابه
ماده ممتعه وحلوه كثير للي يحب الانجلزي طبعا بس والله سهله كثير واللي مطلوب منا بالمنهج ( الاربع قطع الاولى فقط )
عندك المحاضرات ال ( 8،7،6،5 ) ماهي مهمه وعندك تفهمين طريقة الكتابه الصحيحه و عندك القواعد وشرح الدكتور
حلو ومفهوم .
رابع ماده اللي هي
القراءه والمحادثه
هي ماده احس امتداد لمادة التعلم والتفكير بالمستوى الاول بس بشكل اوسع شوي ومتكرر وكل شيء مار بحياتنا
ودرسناه ، وكله تعاريف بسيطه وتعداد مافيه شيء من الصعوبه ابدا شوية تركيز وفهم بالمادة وتنهينها بالسرعة يعني
اتوقع تحتاج يومين بس،
خامس مادة اللي هي
التلاوة والتجويد
ماده سهله كثير وخفيفه ومع شرح الدكتور تتوضح الامور وتنفهم ماهي صعبه ولا معقده يبغالها شوية حفظ في الاحكامم
والحروف .
سادس مادة اللي هي
فقه السيره
ماده معلوماتها كثيره بس كلها تتكلم عن سيرة الرسول صلى الله عليه وسلم وعن حياته واشياء دارسينها وعارفينها
يعني بسيطه وسهله وتحتاج الى قراءه مع تركيز وهي ماده ممتعه ماهي صعبه ،
سابع ماده اللي هي
انجل قراءه
ماده حلوه كثير وممتعه ماتحتاج كثير مشقه بالمذاكره لانها تعتمد على الفهم مع شوية حفظ يعني كوكتيل
اللي عليك تركزين فيه وقت المذاكره هو انك تعرفين كيفيه استخراج الاجوبه الصحيحه والمطلوبه للقطعه متى
مافهمتي القطعه تتكلم عن شنو راح تقدرين تستخرجين المطلوب - تعرفين مفردات ومعاني الكلمات - مافيها
اي قواعد - راح تجي بالاختبار قطعتين فقط ميزتهم انهم قطع طويله وعليها تقريبا 20 سؤال وكلها تتعلق بالقطعه،
ثامن ماده اللي هي
برامج الحاسب المكتبيه
من اسمها ماده تتعلق ببرامج الحاسب اللي هي الاوفيس - البوربوينت - الاكسل يعني يقاس بمدى المامك وخلفيتك عن
هذه البرامج اذا كنتي اشتغلتي عليهم من قبل راح يكون عندك سهل كثير ، وهو بالمجمل يعتمد على التطبيق والممارسه
بالشكل عملي علشان ترسخ المعلومه وتنحفظ بالمذاكره ذاكري وطبقي على الكمبيوتر وراح يسهل معك .
بكذا انا انتهيت من المواد اللي انا اخذتهم باقي الاحصاء / النحو التطبيقي مااخذتهم ان شاء الله اللي اخذوا
هالمواد ينفعونك ويقولون عن تجربتهم .
ذاكري بالتركيز وفهم وان شاء الله ربي يوفقك ويوفقنا جميع وفالنا ال +A
