المشاركة الأصلية كتبت بواسطة صالح الروقي

السلام عليكم ورحمة الله وبركاته

كيف حالكم يامستوى رابع

انا مستوى 8 الترم هذا وخريج إن شاء الله ومعكم بهالماده وشفت ردودكم اغلبكم متخوف من هالماده

احب اقولكم نقطه انا اخذت الماده قبل كذا وحملتها بس ماكان الدكتور غسان هو دكتور الماده كان دكتور

ثاني وانا أجلتها لين غيروا الدكتور وبالعكس الدكتور غسان متعاون مره ومسهل الماده رغم صعوبتها

والله يااخوان وخوات لو لاحقين على الدكتور اللي اخذت الماده عنده قبل انكم لتعرفون ان الدكتور غسان

متعاون معنا بقووه انا اذكر الدكتور اللي قبل والله مايخلي حرف مايجيبه من بين السطور هذا غير الامثله

اللي برا المحتوى يعني بالعربي كان الدكتور اللي قبل مسوي تحدي بينه وبين الطلاب كأنه يقول اتحدى احد

ينجح عندي ورسبوا عنده ناس كثيره والطلبه اللي من دفعتي يذكرون هالشيء ولكن فضل من الله انهم

غيروا الدكتور الأول وجابوا الدكتور غسان ويكفي ان الدكتور غسان قال اذا ماعرفتوا لشيء احفظوا الأمثله

اللي بالمحتوى وخلاص يعني ماراح يكون الاختبار خارج عن المحتوى وهذا شي يريح لنا كلنا ومن الناحيه

الثانيه وحسب دراستي للماده عندنا المحاضرات الثمان الأولى مهمه جداً لأن فيها امثله كثيره ومحتاجه حفظ

وتركيز اكبر عشان مايصير عندنا لخبطها واما من المحاضره التاسعه الى المحاضره 13 يبي لها قراءه مع تركيز

مو محتاجه حفظ فقط التعريفات البسيطه اللي بالمحاضره وباقي المحاضره كلام عادي نقراه بتركيز ونفهمه.

يعني لو خلصنا من مذاكرة الثمان محاضرات الأولى يعتبر خلاصنا 80 أو 85 بالميه من الماده .

وطبعاً لاننسى اسئلة اختبار العام الماضي نركز عليها بعد نهاية المذاكره , وانا راح اقولكم طريقتي بالمذاكره

طوال دراستي بالجامعه أنا ابدأ قبل الاختبارات وتكون أول ماده اذاكرها هي اخر ماده تكون عندي بجدول

الاختبارات يعني ابدأ بشكل عكس لجدول الاختبارات بحيث تكون الماده الأولى لي بالاختبارات هي اخر ماده

اذاكرها قبل الاختبار بكم يوم عشان ادخل الأختبار بمعلومات الماده نفسها ويكون تركيزي عليها بدون مايكون

فيه تشتيت لذهني هذا الشيء الأول , الشيء الثاني والمهم واللي اعتبره انا هو ملخص مذاكرتي يكون

اسئلة اختبار العام الماضي اطبع لي نسخه محلوله واطبع تقريباً خمس او ست نسخ اخرى غير محلوله

وابدأ بأول نسخه غير محلوله وابدأ اراجع مذاكرتي فيها واختبر نفسي واشوف كم حليت سؤال صح وبعدها

ارجع للنسخه المحلوله واتأكد من اجاباتي واي خطأ عندي او سؤال ماعرفت له ابدأ اركز عليه بشكل كبير

وعلى هذا الوضع إلى ان اخر سؤال من اسئلة اختبار العام الماضي وبعد ماانتهي من كذا امسك بعدها النسخ

الباقيه اللي مو محلوله وابدأ أحلها بنفسي بدون ماارجع للأسئله المحلوله الا للضروره او نسيان شيء بعضكم

يمكن يشوف هذه الطريقه شاقه او متعبه عليه لكن أنا من وجهة نظري اشوفها اسهل طريقه اقدر اضمن بعد

الله سبحانه اني شطبت على الماده بشكل كبير علماً اني ابدأ في حل اسئلة اختبار العام الماضي

صباح يوم الاختبار ويكون كل تركيزي من الساعه 9 الصبح تقريباً إلى ان ادخل الامتحان على اسئلة الاختبار

ولله الحمد والمنه معدلي لم ينزل عن 4 ونص من فضل الله سبحانه