أولآ من المفروض أن يتم سرد الموضوع تحت أسس مرتبه لكي يتم فهم الموضوع من الممكن أني ما قريته زين لكن مشكلتكم في كل مكان والله يعينكم
بالنسبه لي الحمد لله طالب بكالوريس بكلية الجبيل الصناعيه تخصص هندسه كهربائيه دكاتره على اعلى المستويات وكادر اداري ممتاز جدآ ولكن اول مره اسمع بكلية التربيه للبنات لكن لازم تفهمين شغله وحده..
انا طالب غير عن كل الطلاب لو فيه واحد مثلي بيكره الدراسه وبيضرب الباب ويقول بالله اشتغل حارس امن عند بنك ولا صيدليه ولا اعذب نفسي
انا طالب انقبلت في جامعة البترول قبل سنوات عديده اخوكم في الله دخل الجامعه وما توفق فيها اول سمستر وطلع وبعدين رحت لجامعة أو بالأصح (مقهى عزوز) بجده وكملت فيها السمستر الثاني وبرضوه فشل في فشل خلوني اكون واضح وصريح الخلل كنت انا اتحمل شيء منه لكن المصيبه البترول ومقهى عزوز على رغم تميزهم بالدكاتره والبروفيسورات الا ان ما عندهم ثقافة الوصل بينهم وبين الطالب حتى لو بتروح للدكتور في الساعات المكتبيه يا يقولك مشغول او عندي اجتماع لأنه اساسا ما يعرف يشرح في الكلاس فيروح يعتذر بأعتذار الأطفال هذي الحمد لله سنه من عمري راحت ونقول الله يعين السنه الثانيه رحت لجامعة سعود بالرياض كنت عزابي وحالتي يرثى لها سنه كامله وانا في عذاب الله لا يوريكم ما اعرف احد ما كنت احب اسوي علاقات مع عيال الكلاس لأن الواحد هالايام اقسم بالله صار يخاف يتعرف على احد لا يطلعله ثاني يوم واحد راعي حبوب ولا حشيش الله يبعدكم عنه الموهم ما جبت معدل كويس يأهلني أني ادخل حلمي بالحياه اللي هو الهندسه الكهربائيه يعني سنتين من عمري طارت في الهواء بعدها ما عرفت وش اسوي كنت انقهر واموت من داخلي اذا شفت دمعة الوالده على خدها وهي شفقانه على حالتي الوالد كلمني ادخل عسكريه يقول احسلك من الدراسه مدام الله ما وفقك فيها قلتله طيب الموهم صار فيه تقديم للعسكريه في تبوك حركت من جده لتبوك ويوم وصلت للبوابه العسكريه اللي تدخل على المقر حق التسجيل وقفت كذا وجلست افكر بيني وبين نفسي يا عبدالله هذا حلم حياتك تصير ذليل بين يد ظابط او رتبه اكبر منك جلست افكر مده طويله بعدها قررت اني ما ادخل وارجع على جده وصار فيه تقديم على الجبيل الصناعيه قلت يالله خليني ادخل واجرب والحمد لله انقبلت ومشت اموري تمام وبدينا الدراسه وتخيلي سنتين بدون سياره وفي الجبيل الصناعيه وقمت القهر والطفش والمعاناه لكن طالعت في نفسي الى متى وحالي كذا لازم اغير من نفسي والحمد لله أنا الآن طالب مستوى عاشر والحمد لله معدلي من افضل المعدلات في الكليه وعلى كذا سوو لنا حفل تخرج قبل شهر او شهر ونصف وبعدها بأسبوع وقعت عقد عمل مع شركة ارامكو السعودية وبراتب لو اجلس عسكري طول عمري ما شميته ومميزات الحمد لله
لكن يا نجد العرب شوفي حالي على قد ما تعبت وخسرت اهلي فلوس بشكل فضيع الا اني قدرت احول من نفسي واجتهد واحاول اني اتغلب على الصعاب فأفضل شيء لك انك تشدين حيلك وعلى فكره للعلم بس جميع السنوات الخمس في كلية الجبيل كنت اخذ فيها صيفي يعني الصيفيه بالنسبه لي كانت شهر بس بالله بتحصلين واحد بالشكل هذا؟؟؟
تذكري دائمآ أن تلجأين إلى الله ولا احد سواه ما احد نافعك الا الله لا وزير ولا مندوب ولا غيره لكن الله يعينكم ويفك محنتكم وشدي على نفسك شوي وما فيه تعب الا وراه راحه
الله يوفقك ويوفق الجميع