[ شعر ] : °•.♥.•° يمه انا ودي اقول للناس °•.♥.•°

[ms.jasmien]

بسم الله الرحمن الرحيم
السلام عليكم ورحمه الله وبركاته

يمّه أنا ودي أقول للناس
عن الشيمة عن الحسرة عن الإحساس
عن العمر اللي ملاه الياس
أنا ودي أحكّيهم… أضحكهم… أبكيهم
عن الدمعة وليل الخوف… عن القصة حروف حروف
عن جروح تسافر بي… وترقى ثم تحول بي
مثل غيري من الأجناس

وأنا عمري يقول يمه… وأنا فرحي يقول يمه

وأنا جرحي يقول يمه
أذكرهم… أفكرهم…
أسولف عن جروح وليل… أحبك يا غلاتي حيل
أذكرهم وأنا توّي صغير مرقدي صدرك
لهاثي يجمعه صدرك… ضحاكي مبعثه صدرك
وزادي منبعه صدرك… وأداري الجرح من صدرك
تربينا على كلمة… تجمعنا على كلمة
تحابينا على كلمة
غطانا كلنا بلحاف… وزاد ناكله بصحاف
وحنا مثلنا آلاف

تلمي القرش فوق القرش… نبي نشري ثياب وفرش
نبي نجبر خواطرنا… ورب الكون يسترنا
تقولي للولد منا… أبيكم للزمان رجال
أبيكم فارس وخيال

أبي لا صاح فيكم جار…يبيكم والزمن دوار
تفزّوا له صغار كبار

أبشرح بعض قصتنا… وكل الناس قصتنا
ليا أذن مطوعنا… يجي صوته بمسمعنا
تصيحي يا ولد صلوا… توضينا تصابحنا وصلينا
رفعنا للسماء كلمه… تصعدها بواكينا

وبعد نص الملا ما فاق… ألا يا كاتب الأرزاق
ألا يالله تهدينا

أعرف إن الجروح كبار… وأعرف إن الزمن دوار
وأنا أذكر وش تغدينا… وما به شيء بيدينا
أنا أذكر يوم صار العود.. على كيفه، وتباكينا
أنا باذني سواليفه… وممشانا على كيفه

أنا أذكر طفية الفانوس… وأنا أذكر لذعة الناموس
وطعم الرز والمعدوس… ولا به شرح أو قاموس

أنا أذكر ثوبي البالي… وأشوف الحال بعيالي
وأنا أذكر صيحة الفران… وأنا أذكر ونّة الجوعان
أنا أذكر كل ذا كله… ندور للخبز بله

أنا أذكر لا شكى شاكي… صفعتيني وأنا باكي
أنا أذكر دعسة خطاكي… تقولي يا ولد جنيت
تطارد يا خبل الونيت

أنا أذكر كل ذا وسأل…

زمانراح واتبدل

وذاك القرص من ايدك
تعجنينه تلمينه تخبزينه وأنا فرحان… أنا أذكر صيحه الفران
تبدل كل شيء فينا… ماعاد به شيء يكفينا

_.-._.-._.-. _.-._.-._ .-._.-._. -._

أنا أذكر أول بجامه… وثوب مشترى للعيد
وأنا أذكر أول عمامه… وفرحه خالتي بالعيد
أنا أذكر يوم ما به شيء… بعدنا ما عرفنا شيء
ودمعات الفرح منك… تعبر بالفرح عنك

أنا أذكر شايبي المرحوم… واشوفه مرتكي لليوم
يصيح بنا يعذبنا…عيالي ولموا الدلة
أناظر وافتزع يمه… عطيني البيز يا يمه
تسمي ثم تقولي لي… ترفق لا تطيح يمه
ولا منه قعد راسه… تمدد صار بنعاسه
زعق فيني علامك ما تغطيني… اقول ابشر
احس البرد فيني… وأزيده من بطاطيني

أنا أذكر خالتي حمدة ، ومقبولة ، ومستورة
أسامي تمتلي صورة
أنا أذكر حمسة المحماس … وأنا أذكر دقة المهراس
وأنا أذكر ما مة الدافور … وربعي وخاطري المكسور
أنا أذكر حارتي تبكي … بعضهم يشتكي جوعان
وأنا أذكر دخلة الضيفان … وخالي وعزوتي جمعان
أنا أذكر صيحة العسة … وجوع الليل مندسة

تبي تدفى على الكانون … ولا به حظر أو قانون
ولا به رأفت الهجان … وأنا أذكر موضة القيطان
وصوت العنز واللبان … رواية في زمان كان

أنا أذكر يوم قالوا عيد … وأنا عيدي بزنوبة
وأنا احفظ سورة الإخلاص … وأرتل سورة التوبة
وأنا أعرف حظي المسكين … كبار القوم هجوا به
وأنا احلف لو بيارقنا … على التاريخ منصوبه
يباريني نزيف الجرح … ويسأل وين ودوا به
اقوله وش تبي يا جرح … تبي تاخذ على نوبة
تبي تحرس معاناتي … وكل الأرض مقلوبة
تبي تسكن على قبري … وأنا المدفون في ثوبه
وعمي مات في بيته … وخالي قد تغدوا به
أنا جرحي يسافر بي … وليت الناس حسوا به

أنا أذكر كل ذا يمه … أنا اعرف حاجتك يمه
أنا أذكر جرحنا يمه

أنا أذكر سقيانا من الزفه … أنا وعيالك الحلوين ملتفه
نبي ندفى من الكانون … نبي نشرح وجاع عيون
نبي نملا جياع بطون … نبي نصرخ و نملا الكون
أنا أذكر كل ذا مدفون … تبين الصدق يا يمه
أنا بذاك الزمن مجنون

_.-._.-._.-. _.-._.-._ .-._.-._. -._

عرفت وشلون لاصحتي … أحب راسك
عرفت وشلون لا صمتي ولا افطرتي … ولا باعك بعض ناسك

أنا أذكر يوم نتباري … ولاحد موذين جاره
ولنا قانون بالحاره … يفسر قصه الدنيا
غريبه قصه الدنيا

أنا أذكر دمعتي بعيني … وثيقه بينك وبيني
تعذبني ، تكذبني ، تعاتبني … تبي تقبض على رمشى ، وتسحبني
ليا صحتي … أنا ويني
وأشوف الدرب بعيوني … أشوف البرق بسنوني
أنا من هو وأنا بدوني ؟..

أنا حظك وأنا منك … وارد المايلة عنك
تذكرني بسواليفك … وأنا أراقب مذاريفك
في ذاك الجرح في الكتمان … وإن اللي جرح إنسان
وإن اللي نزف إنسان … وإن اللي بكى إنسان
أنا أذكر قصه الشراب … تحوّل بيدنا كوره
وأنا أذكر قصه الطلاب … وأستاذي وباكوره

أنا أذكر لعبه الشرعى … وبعض اغنامنا ترعى
ونشرب كلنا بمغراف … عدل وانصاف
وعمي صالح القطان … ينجد للجميع لحاف
كبرنا بالعمر يمه … تغربنا .. تباعدنا .. تعذبنا
نبي نلحق بباقي الناس … نبي نشيلك بعالي الراس
نبي نطرد من الوسواس … جروح القلب والاحساس
بعضنا غادر الديره … بعضنا غاص في الحيره
ولكنا حفظنا الروح … ومعنى الحب والجيرة
بعضنا ما قرا كلمه … وبعضنا فز من حلمه
وبعضنا طاح به علمه
ندور وين ووش صرنا … ولا به نو يمطرنا
وصرنا مثل باقي الناس … نصارع في كلام الناس
نعاين في وجوه الناس … تغير كل هاك الناس

_.-._.-._.-. _.-._.-._ .-._.-._. -._

أنا يمّه أنا ودي اصارحك … وعيني ما تبارحك
أبيكي تسمحي يمه … جعل ربي يسامحك
أبحكي للملا يمه
أحكيهم عن أوجاعي … عن جروحي عن أوجاعي
وكم داحوس في اصباعي … وكم حزن على شراعي
زماني ما عرف دكتور … زمان القاز والدافور
زمان العجن والتنور
زمان لو تعيشونه … بكل العمر تشرونه
زمان الفقس والحنا … زمان الجرح والونة
وكم نمله وكم صرصور … يعيشوا كلهم منا

زمان لا بكى واحد … تشوف الكون في واحد
تحس الآه من واحد … وان الدار به واحد
زمان التضحيه شيمه … وقول الصدق له قيمه
وعيون الناس تسليمه … ونفرح لا بدت غيمه
أنا أذكر فرشة الشمله … أنا أذكر كل ذا يمه
وأنا أذكر دبة النمله … وحول الناس كانوا ناس
ولا به شيك او عمله

أنا أذكر لا تجمعنا … نغمس من طرف ما عون
أنا أذكر عمق ضحكتنا … وتشهد للجروح عيون
وش اللي يجبر الدنيا … تبادلني الضحاك طعون
تصبرني على جرحي … وأنا اطلب من جراحي العون

ولا قالوا نصبح عيد … نطرطش بيتنا برخام
وننفض كل زوالينا … وحنابلنا حفات اقدام
وذا يضحك وذاك يصيح … ولابه حرس او خدام
وذا يبكي على حظه … وذا يسبح مع الاوهام

أنا أذكر يوم نلم كبوش … وصيحة بايع المنفوش
وأنا أذكر لعبة الطره … وكل الدار غريفه وحوش
وفطور العيد دبيازه … ولا به ناس منحازه
ولا به ناس تغتالك … وتبكي لا جت جنازه

أنا يمه عرفت ان الكبار كبار … وهرج الغيب اشوفه عار
وعرفت ان الزمن دوار
أنا أذكر طاسة الحنه … وخواتي ضاحكات صغار
أنا أذكر يوم ما كنا … عيون طافحات غبار
تبدلنا ولا كنا … نناظر ما مضى ونحتار
زمان راح ولا احد مرتاح … يبدل جرحنا بجراح

الا يالغاليه وينك … تلميني من احزاني
تدليني لعنواني … تشوفي وين جرحي صار
وأنا ويني … ووش جاني
أنا يمه غريب ببيت … تدور حرقتي عن بيت
أداري الآه بكلمة ليت … واجفف دمعتي بياليت
الى مني نصيت القوم … يجيني ردهم ياليت
***
أنا يمه أسير هموم … ولولا دعوتك ما أقوم
جروح الناس خلتهم … وأنا جرحي معي لليوم
جروح الناس عافتهم … وأنا كني جريح اليوم
هموم القوم في صدري … وأنا همي نساه القوم
أنا يمه وكم مثلي … غريب غربته بيته
زماني راح من عيني … واحسب اني تعديته

تشوفي من أنا بغيرك … ومن هو حبني غيرك
ومن هو اعشقه غيرك … ومن هو افقده غيرك
تشوفيني ادور لك واروح بعيد … افتش في ثياب العيد
اردد اهتك وأعيد … بغيرك وش يكون العيد

أنا منهو اذا رحتي … وكم من جرح وكم شفتي
أنا يمه تمنيتك … خذيتي عمري وعشتي
أنا يمه بعد صدرك … ادور في زمن قاهر
ادور عن لبن طاهر … ادور عن فرح طاهر
اسامر حزنك الساهر على جفني … وليل صار يعرفني
يعذبني ويسعفني … يهاودني يكتفني
يوديني ويجرفني
أنا يمه اعيش بجرح … اذا لديت يزهمني
ولا ماغفيت يزهمني … ولابه حد يرحمني
سكوتك بس يفهمني
….

[غرآم]

أنا أذكر لا تجمعنا … نغمس من طرف ما عون
أنا أذكر عمق ضحكتنا … وتشهد للجروح عيون
وش اللي يجبر الدنيا … تبادلني الضحاك طعون
تصبرني على جرحي … وأنا اطلب من جراحي العون

الا يالغاليه وينك … تلميني من احزاني
تدليني لعنواني … تشوفي وين جرحي صار
وأنا ويني … ووش جاني
أنا يمه غريب ببيت … تدور حرقتي عن بيت
أداري الآه بكلمة ليت … واجفف دمعتي بياليت
الى مني نصيت القوم … يجيني ردهم ياليت

الله عليج يا سمسمه ............ وصح احساسج يالغالية

استمتعت بموضوعـــــــج ودمتي مبدعـــــــــه

تقبلي مروري ........... محبتك: غــــــــــــــــــرآم

[ms.jasmien]

والله عليك ياغرومتي
وعلى طلتك الرائعه

تسلميلي يالغاليه
الله لايحرمني منك ولايحرمني من
تواجدك يالغاليه

[منو الدوسري]

مآ آجمل الكلمآت حيث يكتبها القلب..

وهنآ حروف عجزت أقتبس منهااا

تعايشتها وعشتها..

غاليتي ..
حروفك بعثرت ابجديتي..
لك تحيه منثورهـ بآآجمل عبير الورود..
وانتظر مزيدك اختياراتك ..

[ms.jasmien]

المشاركة الأصلية كتبت بواسطة منو الدوسري

مآ آجمل الكلمآت حيث يكتبها القلب..


وهنآ حروف عجزت أقتبس منهااا


تعايشتها وعشتها..


غاليتي ..

حروفك بعثرت ابجديتي..
لك تحيه منثورهـ بآآجمل عبير الورود..

وانتظر مزيدك اختياراتك ..

حقيقه
شرفني حضورك الراقي منو
واسعدني جدا جدا جدا
شاكره لك تواجدك بموضوعي غاليتي
وماننحرم من طلتك يارب

لك ودي وتقديري []

[قلبي مجنوونك]

سلمت الانآمل.عزيزتي
اطال الله ب اعمار امهاتنا واسكنهم الجنه
شكرا لكي

[wintr song]

الله مااروع مانقلتي هنا

سلمت اناملك عزيزتي