فــَــــرِّحــُـــــونـَـــــــــا ..

البارحه نمت متأخر .. قعدت سهران وأفكر وأحاتي ,

لو إختبار نهائي يمكن ما سهرت ولا حاتيته مثل ما حاتيت ليلة البارحة ..!!

حتى النـوم ما نمت عدل , تقلبت وتقلبت وتقلبت , الفراش إعتفس من كثر ما تقلبت ..

و السبـب كله مبـاراة اليوم المصيريـة بـالنسبة للبلـوز تشلسي ,

أحيانا بعض الحب والعشق يخليك مثل المجنون ,

و اللي يشوفك ما يدري أنت صاحي , و إلا مصرقع , وإلا عليك من الله ظلال ,

و أصعب عشق .. لما تعشق شيء بعيد عنك , لا تقدر توصله , ولا تقدر تساعده لما يكون في حاجتك ,

اليوم .. وبكل آسف .. كل شيء ضد تشلسي ,

المباراة خارج أرضه ,

و الفريق خسران مباراة الذهاب ,

و يقابل فريق يعتبر أكبر فريق محظوظ يلعب كرة قدم في العالم , يا كبر حظهم كبراااااااااه ,, يهبووووو ..

و التوقعات كلها تقول أن تشلسي خارج البطولة لا محالة ,

لأنه على أرضه وبين جماهيره ما فاز , شلون راح يفوز خارج أرضه وبعيد عن جماهيره ؟!!

في الحقيقه لا أعطي تشلسي إلا 1 % ولكن رغم كل سـ أتفاءل ,

لعل وعسى يتحقق الصعب , ويتم لجم الشياطين في أرضهـا ,

وقديما قالوا : ( لولا الأمـل لمات الفقير ) , والأمل بـإذن الله موجود ,

وثقتي بــ الله كبيرة وأنه قادر على كل شيء ,

ومن ثم ثقتي في لاعبي تشلسي أنهم لن يخذلوا أنفسهم ولن يخذلوا جماهيرهم .

دعواتكم وأمنياتكم ..

إحــــبــــــــــــــــــــــــــاط ..

شعور الإحباط قاتـل ,

يحسسك إن الدنيـا سكرت في وجهك ,

وكل الأبـواب أمامك تقفلت ,

وتجد نفسك ترزح تحت وطـأة الحزن ,

والضيق يحيط بك من كل صوب وحدب ..!!

هي صحيح مبـاراة كرة قدم ,

وقد تكون تافهه ولا تحمل أي قيمة عند البعض

لأنها مجرد قطعة جلد تتراكلهـا الأقدام ,

ولكنها أحيانا تكون ذات معنى كبير في نفوس عشـّاقها ومحبيهـا ..!!

لا تلوموا العاشق فيمـا يعشق , ولا المحـب فيما يحـب ,

فـ للعاشقين مذاهب , لا يعلمهـا إلا أمثالهم من العاشقيـن ,

تشلسي خسـر , و خرج من البطولـة العنيـدة والمتعجرفـه ,

7 سنـوات وسيناريو مراراة الخسارة والخروج يتكرر ..

ونفس الـليلة الحزينة تتكرر هي الآخرى ..

أمر محبط أليس كذلك ؟!!

حاولت أنام مثل ما كنت أسوي في آخر 3 سنـوات ولكني ما قدرت ,

قلت أجي المـدونة وأفضفض شويء .

وإن شـاءالله الغـد يكون أجمل , و يحمل معه بعض ما يسرّ وما يفـرح .

One Life .. One Love .. One Club .. Chelsea

ســـبـــحــــــــــــــان الله ..

[BIMG]http://www.almadar-kw.com/ArticleImages/T_16564431-3fe2-4a67-9caf-92bdef3ef1fcKHIMDSOVDQDXLHVMKXSUPCBC.jpg[/BIMG]

الحمدلله ..

البارحه نمت نومه حلـوة ..

من زمان ما نمت نومة طويلة و متصله و بدون فواصل ,

وسبحان الله القادر على كل شيء ,

اليوم الجو عندنـا بالكويت غبـار , ومجال الرؤيـة قليل حييييل ,

اليوم عطلوا المدارس وقالوا للطلبة إرجعوا لـ بيوتكم , حفاظا على صحتهم من أي شيء ممكن يتعرضون له ,

وقبل فترة لـلآسف يمكن البعض سمع عن أمنيات ودعوات إن الجو يصير غبار , وتضربنا العاصفة الترابية مره ثانيه !

وكل هذا علشان يعطلون المدراس والدوامات وما يصير فيه دوام ولا دراسه ولا مراجعات ..!!

يا سبحان الله .. شلون الإنسان يتمنى الشيء اللي مو زين علشان بس يرتاح له كم ساعه ,

الناس تدعي الله بـ الصحه , بـ العافيه , بـ الأمن , بـ الستـر , بـ المطر , بـ الربيع ,

وفيه ناس عقولها صغيره وتفكيرها محدود , تتمنى المضرة علشان منفعه دنيويـة زائلـه ..!!

فيه ناس صدورهـا ما تتحمل الغبـار , واللي فيه ربـو , واللي فيه تنك ,

وهذولا ندعي لهم اللي يشفيهم ويعافيـهم , وما يشوفون شر في هالجو ,

بعد شويء .. بعد صلاة العصر .. عندي كذا شغله ضرورية ولازم أخلصهم , يعني طالع طالع لو شنو يصير ,

إذا ما رجعت لكم في الـليل معناها ترى صاير لي شيء ,

والله يحفظنـا ويحفظكم من كل شر ومن كل مكروه يا رب .

شـنـــــــــو ؟! مــا هــــــــذا ؟!

قبل دقايـق تفاجـأت في شغلتيـن صاروا بالمنتدى ..

الأولى / إني صرت عضو مميـز !!!!

وصار نكي داخل إطـار وردي !!

مع إني كنت أحب يكون داخل إطار أزرق , عـ الأقل يراعون إني ولد مو بنـت ,

مدري شنو أقول بـصراحه ..

فـ المفاجآه والصدمة الجميله أحيانا تجعلك تتوه ولا تعرف كيف تعبـر ,

ولكني أشكر شكرا جزيلا من رشحني وإختارني , وعساني أكون أستحق هذا الإختيار ,

أقول من رشحني ولم يشرحني .. إنتبهـوا , و ركزوا .

____ هـَــــمـْـــــسْ ______مـُـــدونــّـــات الأعــضـــــــاء______ الـحـُــــروف ْ ____

و الشغله الثانيه /

إن عدّاد الرسايل زاد عندي !!

و بدال ما كان أقصى حد له 100 رساله .. صار الحين 500 رساله !!

مدري هل هذا علشان صرت عضو مميز ؟!!

أو إن الإدارة تفهمت طلبي في زيادة مساحة الرسائل و زدات العدد للجميـع ؟!!

بـصراحه أتمنى تكون الثانيـة .. علشان تعم المصلحه والفايدة جميع أعضاء المنتدى .

تــســـلـــــــمـــــــــووووون ..

الله يبـارك فيكم , ولا يحرمني منكم ولا من تواصلكم الطيـب , والفـال لكم يا رب ,

أقولهـا لكل من بارك لي وهنـّاني في دخولي لـ الإطار الوردي ,

الشيء الجميـل إن التميز نسَّـاني مرارة الخسارة اللي أمـس ,

سبحان الله شلون تنقلب أمورنـا وأحوالنـا من حزن إلى سعادة في لحظات معدودة ,

يقول الشافعـي :

ولا حـزن يـدوم ولا ســرور ..--.. ولا بـؤس عليـك ولا رخــاء

شكـرا , وتسلمـون , وبارك الله فيكم كلكم , حتى الغائبيـن منكم .

الــحــريــــــــم و الـــســـــــــــــوق ..

معلـش يا بنات .. بس تحملوني شويء ,

أدري إبتلشتم فيني وفي مدونتي .. كل شويء ناط لكم ومتكلم عنكم ,

بس والله من اللي أشوفـه , والمشكله إنه حدث عام , ومو منحصر في بيئة و دولة معينة .

طبعـا الحريم والسوق حدّث ولا حـرج ..

لما يقولون نبي نروح علشان محل واحد ونشتري منه شغلنا ونرجع .. تأكد إنهم يكذبون , إلا من رحم الله ,

99% من الحريم في السوق ينسون نفسهم , والشغله الوحده فـجأه وبـقدرة قادر تصير 10 شغلات ..!!

اليوم العصر وديت أمي للسـوق علشان تشتري لهـا شغله , لأن يوم الجمعـه عندنا عشاء خاص للحريم ,

راح أقولكم عنه يوم الجمعـه وعن مناسبتـه إذا الله أحيانـا ..

المهـمـ ..

قبل لا نروح قلت لهـا ترى معاج للمغرب .. لأن عندي شغل ضروري وما أقدر أتأخر عليه ..

قالت لي أمي : إن شـاءالله قبل المغرب خالصيـن و راجعين للبيت ,

لما وصلنـا السوق وشرينـا حاجة أمي اللي رحنا علشانهـا ,

قالت لي أمي نبي نمر محل المواعيـن .. بـصراحه إنصدمت , وما توقعت هالطلب المفاجيء ..!!

عندي إستعداد أدخل إختبار نحـو عند المصاروة بدون لا أذاكر ,

ولا إني أدخل مع أمي محل المواعين و الأواني المنزليـة ,

أغلب الحريم مدري شنو يصير فيهم إذا دخلوا هالمحلات بالذات ؟؟

عندهم عشق لا متناهي للمواعين ,

والمشكله لما يكون المحل فيه زحمة حريم , بعضهن تمشي وتصطدم اللي قدامها وهي ما تدري ,

يجبهم بلاء يا دافـع البلاء هالحريم في محلات المواعيـن ,

ينسون نفسهن و عيالهن إذا شافوا مطارة جديدة أو مفرش جديد ,

وأشـوا إننا ما طولنـا بالمحل وطلعنا .. لأن المحل كان زحمه , وما يصلح للتسوق في وقتها .

وجـــــــــــــــع الــشــــــــــــــوق ..

أعظم وجـع بــ الحب لا صرت تشتاق ,,

لـ اللي تحب و لا أنت قـادر تشوفه \/\/

يكويـك جمـر ٍ داخـل القلب حـرّاق ,,

زود ٍ على نــاره ,, تهـدّك طيوفــه \/\/

لا مـرّ بعيـونك كمـا نـوض بـرّاق ,,

مـالك مجــال إلاّ تســاير ظروفــه \/\/

أثْــر المحبـة نبضهــا دوم سـرّاق ,,

دمي وهـو دمـي بجسمـي تحوفــه \/\/

يا جامـع ٍ حنيّـة الكـون بــ أخلاق ,,

معـذور قلبـي لـو يضمـك بجوفـة \/\/

جــُــمــعــــــة مــُــبــاركــــة ..

الـلهم أنت أحـق من ذكـر ,

و أحـق من عـُـبـد

و أنصـر من إبتغـى ,

و أرأف من ملـك ,

و أجـود من سئـل ,

و أوسـع من أعطـى ,

أنت الملـك لا شريـك لك ,

و الفـرد لا نـد لـك ,

كل شـيء هالك إلا وجهـك ,

لـن تـُـطـاع إلا بـإذنك ,

و لن تـُـعـْـصى إلا بـعلمك ,

تـُـطـاع فــ تشكـر ,

وتـُـعـصى فــ تغفـر ,

فــ إغفر لنـا يا غفـور ,

و إرحمنـا يا رحيـم ,

و إرزقنـا من فضلك و جودك و كرمـك .

يـــســعـــــد صــبـــاحــكـــــــــــــم ..

.