يامكثرين الهرج لااسمـع ولااجيـب " "تريحوا من فضلكـم واسمحـوا لـي

تريحـوا لاتلحـقـون المشاهـيـب " "على الردى مانـي شفـوق عجولـي

بالعقل والصبر ادّب النفـس تأديـب " "وألا لهـا مـده تصـول وتجـولـي

خلج ترازم فـي سيـاج المحاديـب " "مافيهـن اللـي بالعقـال معقـولـي

اشد وطية زور مـن شمّـخ النيـب " "لا ضاع مفعول الحيـل والحلولـي

انـا لا قلـت ارتـب القـول ترتيـب" "حتى يجـي كـيّن علـى فـك قولـي

إليا ارسلت لاأفكار القريحـه مناديـب" "ترايعن مـن عقـب ماهـن جفولـي

لكن مالـي مـن وراهـا مكاسيـب " "لو كان عشاق القشـر صفقـوا لـي

ما مستفيـد الا العـدو والاجانـيـب " "ولانـي مطيـع مقرقعيـن الطبولـي

خليتهـا تعطـي فجـوج مجاديـب " "جربا تجـوّد فـي رسنهـا مهبـــولـي

والله لا اجنـب دام لـي درب تجنيـب " "من شرهة حشام الرفاقـه خجولـي

لـو انهـا بيـن النحـر والتلابيـب " "من الحيا وجهـي مهـوب مغسولـي

طبـعن لنـا نشـب عليـه ونشيـب " "وطبيـعـةٍ لعـلـهـا مـاتــــزولـي

على الجماعه للجماعـه مواجيـب " "الا جهلـوا قـدر الرفيـق الهتولـي

ماني على ربعي قريّـب محاضيـب " "ادنـاة مايخلينـي اسـرج خيـولـي

ان جات من طيب شقاها على الطيب " "لو انها اعوج مـن رقبـة الذلولـي

وان جات من مسكين منطق واساليب " "حطيتهـا بيـن الثـرى والنعـولـي

لاحركـت شعـره ولاطلعـت شيـب " "ولاضيّقت صـدري ولاطـق جولـي

وان كان في صبري على ميلهم عيب" " العيب تفتيـش الصـرر والحثولـي

لاقمت تذكر فـي رفيقـك عذاريـب " "وتبيـن عيوبـه لذولا وذولــي

صبرك على ربعك عـلاج وتطابيـب " "يقصـر حبـال السالفـه لاتطـولـي

حتى مايلقا فـي طرفهـا مقاضيـب " "كـرّاه خيـر وللمشاكـل ميـولـي

واليا بليـت بتايـهن شـره وصعيـب " "يقول انا العـراف وانـت الجهولـي

قـل الله الله ياحصـان الاطالـيـب " "يالفاهـم العالـم عظيم الفعولـي

هذا الكلام اللي مافي صحتـه ريـب " "لانيـب لاحولـك ولانتب حـولـي

حصان وبن حصان طيـب مجاذيـب " "وبالمعرفـه رجـل محلـي ودولـي

خله يروّح يخطي الـدرب ويصيـب " "يقول مابالنـاس عرضـي وطولـي

والفرق ماهو باللحـى والاشانيـب " "الفرق بين النـاس فـرق العقولـي

كم واحد تحسن بـه الظـن ويخيـب " "السـنّ يضحـك والفـؤاد معلولـي

واللي غدت به كلمة مالهـا غيـب " "ماهو من اطيب ربعي اللي غدو لـي

يالله عساها صيحة فـي قفـا ذيـب " "وقلـع النيـا بينـي وبينـه يحولـي

الرجل مايغصب على الطيب تغصيـب " "اليا صار ماهو دلّ ضمـن الدلولـي

ومن عادة اللي طيبه يحضر ويغيـب " "لاطالـت الرفقـة زهـوق ملـولـي

واليا بلنّـك غبـر الايـام بصحيـب " "في مستوى طيبـه صعـود ونزولـي

اعرف ترى الدنيا دروس وتجاريـب " "والكامـل الله والنـقـا للرسـولـي

لاتصير مشـذاب يقـص العراقيـب " "خلـه وراع الأولــه وش يقـولـي

اخذت حكمه مـن كـلام اللواعيـب " "للطيـب نـاس وللعـذارى فحولـي




للشاعر / لافي الغيداني


تحياتي