على ميعادنا وقـّع فراش وطار عصفورين
... وانا قلبي "غصن"ماله ثمر في شجـْرة الحرمان

نواياي الطباشير ان تفتت فالوهم تخمين
... ونواياك الكحل لاصرت اشوف اني بقايا انسان

هلابك لو غيابك مر لحظة من بعد عامين
... تراحيبي حضور ٍ في غيابـك وانشد النسيان!

اسولف بك علي ولاقدرت اسكت الى هالحين
... جميل انك تسولف وانت تصغي للحديث آذان !

وانا ماكنت اقول انك سكنت عيوني الثنتين
... مادام انك ورى حدب الضلوع تفتّح البيـبان

حبيبي قسمّو قلبي رفاقي وانقسم قسمين
... وجيت آدوّر اللي يجمعه في سكة الأحزان ..