كل القصايد تنحني عند رجليك
واجيبها لك يا بعد كل عالي
احيا على قربك وصوتك وطاريك
ودي بشوفك كل لحظة قبالي
والله أحبك حب يا قلب مغليك
ويزود حبك مع مرور الليالي
احلف برب البيت مانيب بناسيك
وشلون ابنسى دنيتي ورأس مالي
ودي احطك في عيوني واغطيك
ودي انا اللي بس اشوفك لحالي
وما ودي عيون الخلايق تراعيك
أخاف تلقى لك حبيب بدالي
حتى الهوا لا مر من بين ايديك
أقول هذا وش يبي بحلالي
أنا بمنامي يا هوى القلب أناديك
صورتك دايم ما تفارق خيالي
إن غبت عن عيني بقلبي الاقيك
وإن رحت عن قلبي فيا عزتا لي
تبي الصراحة ما أقدر أبعد وأخليك
ينساني الله لا نسيتك يا غالي