مساء الخير, مساء التوفيق من رب العالمين

طبعاً اللي حضر المحاضرة المسجله لهذي المحاضرات

بيلقى الدكتور مأكد إن احنا نطبق السبع خطوات و و و و

راح أسردها لكم تحت بعض بثلاثة عناوين رئيسية,,


قبل كذا بقول لكم إن:

المعين: العلاقه

المعين المزدوج: علاقة التعريف

الخط: هو اللي يربط الكيان

الخط المزدوج: إشتراك كلي

المستطيل: كيان

المستطيل المزدوج: كيان ضعيف

البيضاوي: صفة للكيان

البيضاوي المنقط: صفه مشتقه

البيضاوي المزدوج: صفه متعدده القيم

البيضاوي اللي متفرعه منه بيضاويات: صفه مركبه





1) تحويل الكيانات العادية,

نحولها إلى جداول,

الكينونه المستطيله هي بتكون إسم الجدول

والصفات المتفرعه منها البيضاويه بتكون هي الحقول أعمدة الجدول,

جدا سهله هالخطوه, تحط كل الموجود بالبيضاويات داخل هالجدول بإسم الكينونه المستطيل

بإستثناء البيضاوي المنقط (المشتق) مانحتاجه أبد لأنه مشتق

وبإستثناء (المركبه) اللي بيضاويه متفرعه منها كم فرع,, نشيل البيضاويه الاساسيه ونحط فروعها بسس

وبإستثناء البيضاوي المزدوج (متعدد القيم)
هذا بيصير له جدول لحاله بنفس الكينونه اللي هو عليها
لكن بس أحط بهالجدول المفتاح الرئيسي والصفه المتعدده اللي داخل البيضاوي المزدوج,,

2) تحويل الكيانات الضعيفة,

نسوي جدول عادي نفس اللي قبل شوي بإسم الكيان الضعيف
نضيف فيه جميع صفاته اللي بالبيضاوي
ومفتاحه الأجنبي > اللي تحته نقط, يصير رئيسي
ونزيد عليه المفتاح الرئيسي المرتبط بالكينونه الثانيه عن طريق المعين المزدوج (علاقه التعريف) ,

3) تحويل العلاقات,

في تحويل العلاقات, بكل الحالات الثلاث بنلاحظ إنه بالجدول اللي بنسويه نظيف الصفه اللي طالعه على المعين اللي نسميه (العلاقه) اللي نشتغل عليها بس

أ) تحويل علاقة واحد إلى واحد,

نشوف المعين اللي يمينه 1 ويساره 1
ونشوف اللي مرتبط بخط مزدوج هذا نسميه اشتراك كلي.
الكينونه اللي عندها الاشتراك الكلي تعتبر العجوز الثقيله اللي ماتتحرك
إذا نحترمها ونجيب لها المفتاح الرئيسي اللي من الكينونه الثانيه

نحط اسم الكينونه اللي عندها اشتراك كلي

ونحط صفاتها بالاضافه للمفتاح الرئيسي اللي جبناه من الكينونه الثانيه

بس تصير مفتاح أجنبي في هذا الجدول ,,

وطبعا إذا كان بالعلاقه صفه طالعه نزيدها بعد على هالجدول,,

ب) تحويل علاقة واحد إلى كثير

نسوي نفس قبل شوي.. قبل شوي اللي عندها الاشتراك الكلي قلنا العجوز الماتتحرك نجيب لها المفتاح الرئيسي

الحين العجوز بهالحاله اللي عندها علاقة كثير بتشوفها بالرسم البياني حرف n

نجيب لها المفتاح الرئيسي ونسوي الجدول بإسم الكينونه اللي عندها حرف إن

ونظيف المفتاح الرئيسي حق الكينونه المقابله ويصبح مفتاح أجنبي

ونظيف أيضا صفة العلافه البيضاوي اللي طالع بالمعين

ج) تحويل كثير إلى كثير

في هذي مختلفه لان كلهم تساوو مافيه اشتراك كلي ولا فيه أحد قليل واحد كثير كلهم عجز هالمره

لازم نسوي لهم ديوانيه يتكّون فيها كل وحده ماتبي تسويه ببيتها

الجدول بيكون غير

بيصير بإسم العلاقه اللي هم عليها المعين

والحقول حقته الصفات كل المفاتيح الرئيسيه لكل الكيانين اللي تحتها خط متصل,

بالإضافه للصفات اللي على العلاقه اللي طالعه على المعين,,


وووبس

يارب أكون وفقت بتوصيل المعلومه بشكل أسهل ما أكون صعبتها عليكم

وبالتوفيق يارب كلكم تطلعون مثل هالفيس