طاح العتب .. ما هيـب لحيـة مشاريـه
خل الكـلام .. و حبـل الأعـذار طـوه

ماراح اقول أشلون أو كيف .. أو ليه
تـرى السـؤال بـدون أجابـه .. مـشـوه

العذر ماات .. و مـات همـه و راعيـه
و الجرح جف .. و جـف غيمـه ونـوه

صاحبك ضاع الهـرج مـن بيـن أشافيـه
مـا كنـه اللـي كـان قبلـك .. مـفـوه

يجمع لـك مِـن الشعـر فاخـر معانيـه
و يمـوت عنـدك قبـل فـيـها يتـفـوه

ليـه أنصـدم . و تخـون قلبـي هقاويـه
و يطيح نجمـي .. و أنخـذل فـي علـوه

أصدق مع الواحـد و احبـه .. و اثاريـه
طـوول الليـالـي معتبـرنـي .. عــدوه

لايـا بعدهـم .. و أول الغيـث تالـيـه
و أنت اتعرف قلبي .. و خيـره وسـوّه

يمكن لو انك قلت غلطـان .. قلـت ايـه
مير البـلا انـك قلـت .. ناقـص مـرّوه

قل لي متى شحيـت فـي شـي أعطيـه
و قل لي متى صـارت محبتـك .. خـوّه

يصعـب علـى الرجـال يثبـت مباديـه
و ان كانه اثبـت .. كيـف يثبـت سمـوّه

الله يبيحـك عــن خـطـاك و تمـاديـه
و يبيـح قلبـك عـن خـطـاه وغـلـوّه

مادام حبـك خالطـه شـك .. مـا بيـه
حب العتب و الشك .. مـاعيـش جـوه

ماكنّـي اللـي كـل مـا تلمـس ايديـه
يغمـرك بأحسـاس و حـنـان الأبــوه

وما كنـي اللـي كـل مـا مـر طاريـه
ضج الفضـا باسمـه .. و عكـر هـدوه

يـامرحبـا بالـجـرح .. و الله يحيـيـه
لا صـار مـن يمنـاك و الجـرح تــوه

بعض الجروح ان صابـت القلـب تنهيـه
و بعض الجروح .. تـزود القلـب قـوه



الله كتب.. و القـوس فـي كـف باريـه
و اللي تشوفه يا أبيـض الوجـه .. سـوه