للراحلين جروح تبقى مع الوقت
/ ولا فيهم اللي رغم جرحه ذبحني ..

انا ذبحني شخص فاقده لا ضقت
/ اللي رحل عني وهو ما جرحني ..

قال : الفراق ، وقلت : ابشر وفارقت
/ ما طعت قلبي يوم قلبي نصحني ..

غرّب وأخذ معه السعاده ، وشرّقت
/ ليته بعد ما اقفت ركابه لمحني ..

وشلون اخايل يمته كل ما اشتقت
/ كثر إلتفاتي بـ القرايب فضحني ..

ياما حملت من الحزن فوق ما طقت
/ واضحك بوجه المقبل اللي نطحني ..

قبله : احسب أني قوي قلب صدقت
/ ماعاد يفرق من خسرت وربحني ..

وبعده : عرفت أني من الحب ما فقت
/ أذوب من حر الهوى لا لفحني ..

تدري وش اكثر ما جرحني مع الوقت
/ قصدي ذبحني ، اعتذر ما جرحني ..

أني بصمت اشتقت واشتقت واشتقت
/ كتم المشاعر والمكابر ، ذبحني ..


قصيدة الشاعر ثامر شبيب ..