يكبـر قسـى جـرح السنيـن ويعنـي
رجل الحزين اللي علـى حـد الإدراك

..

هذا أنـا.. يـوم أخلـف الوقـت ظنـي
الحـزن حزنـي.. والسوايـا سوايـاك

..

بكيـت.. وأبكيـت العـيـون وبكـنـي
تعال شفنـي كـل مـا حـان ذكـراك

..

كـم واحـدٍ جانـي بعـدك وسألنـي
شخبار من حبيـت وأقفـى وخـلاك؟

..

وأصـد والحـزن الخفـي ممتحـنـي
وأن قلت منهو .. قيـل ماهـوب يخفـاك

..

قيل العوض قلت العوض مـا شحنـي
والله لا هــــــذا.. ولا ذا.. ولا ذاك

..

يـا مـا بعضهـم مرنـي مـا فتنـي
يا جعل ماهم بالعـوض فـي محيـاك

..

الله لا يجبـر عـزا مــن عذلـنـي
ما جاه ما جاني.. ولا جـاه مـا جـاك

..

واللي عذل ويقول لـو .. و لـو أنـي
جعل يعشـق لـه واحـدٍ كنـه إيـاك

..

مـا فيـه شـيٍ فـي حياتـي غبنـي
الا نهار أقفيـت.. وأنـا أسمـع إبكـاك

..

الله مــن جــرحٍ قـديـمٍ مكـنـي
أمداك نزفـه لكـن .. ادواه مـا أمـداك

..

علـيّ كـم جـار الزمـان.. وطعـنـي
أسمع صدى صوت المعاليـق تنخـاك

..

وين أنت ..؟ ياللي كـل مـا غبـت كنـي
واقف علـى بـاب الأمـل وأتحـــراك

..

ليتـك تعـرف تخـون ... وأقـول خنـي
علـى الأقـل القـى سبـب وأتنسـاك !

..

وليت الزمـن فمحبتـك.. مـا خذلنـي
وليت الهجر ..من طيب خاطرك ورضاك

..

لـو أن قربـك والوصـل .. بالتمـنـي
ما غبت عن عيني كثـر مـا اتمنـاك

..

خايـف يطـول البعـد وتسـج منـي
وياخذ مكانك شخص ماهوب يسـواك

..

وش عاد أسوي يومـك أقفيـت عنـي
لا أنا أتبع المقفـي ..ولا أحـب فرقـاك





اتمنى ان تنال اعجابكم