يوم ضاقت ..

قلت وينك يـ الفرج ..؟

قال : جيت ..

وشفت حولك ألف صاحب

وخفت أسبّب لك حرج !!

إرتكيت ..

بس وين إللي يشيل الحمل وينه ..

وين ذاك اللي ذخرته للظما قطرات وينه ؟

وين أبو الفزعات عني ..

ما قدرت ألقاه وينه !!

من لمحني فوق كفّ الموج .. فضّ

وكسّر ألواح الرجا بيني وبينه !!

حزّ نفسي ..

غصّ في حلقي ورضّ ..

كل ضلع لي معاه .. وغضّ عينه!!

يحسب إني مِت همّ ..

ولا درى إني حيْ لكن ..

مِت من خنقة يدينه!!


يـ الفرج

صاحبي ما شفت زوله..

من فقدته يوم شدّه ..

بس لو جاني على قلعة عيوني ..

حالف إني ما أرده


والمودّه يـ الفرج هيّ المودّه

صاحبي .. مالي بصدّه

صاحبي روحي عرينه ..

ولو نصاني والنّواصي عشب قبري ..

والله إني .. غصب لـ أحيا ..

ثم أعـينه


إرتكيت

وطحت

( والجــلمود ) نـآآخ

آآآه يا كِذب الليالي البيض

آآآه يا ظُلم السباخ ؟!

من مشاها ..

ولا وراه زنود تبري الكبد .. داخ

يا كثر ما خيّبت ظن اللبيب

ويا كثر ما غيّبت وجه قريب

ويا كثر ما شاف منها ..

أبيض النية وشاخ ؟


إرتكيت ..

وأثر ظلّي ما يمون ..

وأثرني كومة طعون

من غلاة أصحابها ..

ما قدرت أقول : آخ

لي مبادي ..

وصاحبي لو جار منْه الجور عادي

وصاحبي لو هو خذل رجواي عادي

وصاحبي لو هو بخل برضاي عادي

وصاحبي لو هو قتل ذكراي عادي

وصاحبي ..

يبقى العزيز الناصع إللي له ودادي

ودام أنا ستره وثوبه

صاحبي ما أقول عنْه أبداً وتوبه

يا هلا به

وبـعـيوبه

وبـذنـوبه

يا هلا

إن وصلني يا هلا ..

وإن قطعني يا هلا ..

صاحبي وإلا فلا ..

والغلا نعمة كريم وساقها لكل الملا


يا الفرج : حاول تــب

دام لـ أهل الأرض رب ..

ولو تشوف أصحاب واجد حول قلبي

.. لا تعاند

السواعد من سراب ..
والحصايد من يباب
والشِعر كذاب .. ؟

خل فتّال الشوارب خاذلينك ..

ولا تخاف من الحرج .. لو قيل وينك ؟

كلهم مثلي تراهم بالنهاية طالبينك ..

طالبينك يالفرج ..

ويوم ضاقت ..

قلت : وينك يالفرج ..؟!

قال : جيت ..

وشفت حولك ألف صاحب

وخفت أسبّب لك حرج

صالح الشادي