ملتقى طلاب وطالبات جامعة الملك فيصل,جامعة الدمام - عرض مشاركة واحدة

ميمي السنافيه · #1 2015- 6- 22

العام يا ام سعود كان الحزن ضيف
واليوم دق اوتاده الحزن فينا ..

الحزن غيمة غيبت نجمة الصيف
وبااسباب جوره ياجواهر شكينا ..

غاب الحبيب ولا بقى للهنا طيف
والاه يانوره تهاوت علينا ..

كن الظهر ياسعود فيه انغمد سيف
والصدر صار لكل الاوجاع مينا ..

اقول يا محمد متى فارق وكيف
واصيح ياسارة متى هو بيجينا ..

يانوف من عقبه ترى بسمتي زيف
جف الفرح من حولنا وانطفينا ..

أبوك يانواف ماله تواصيف
وانشد مشاعل كان مثله لقينا ..

والكون ياهيفا بلا ظله مخيف
واعذر بكانا يافهد لو بكينا ..

كان القمر كان البحر والمجاديف
كان الحنان اللي بحضنه دفينا ..

وكان الملاذ لشاكي الضيم والحيف
كم شال عنا كم خذا عن يدينا ..

عاش ورحل كله مهابة وتشريف
جار الحرم فوق الحكي وان حكينا ..

والله لو كان المقدر على الكيف
ماغبت يا نايف ولا احنا ظمينا ..

كل مارخيت الجفن جدت عواصيف
والشوق ثار وفارقتني السكينة ..

وشفتك مثل شمس بروس المشاريف
نورك يناديني وانا اقول وينه؟ ..

والقاك واصحى والمحك راقي النيف
حي ولو صلت عليك المدينة ..

أحسك بجنبي ماهي تخاريف
ياساكن عيون المهاة الحزينة ..

في ذا جلسنا بين صمت وسواليف
وفي ذا الممر اثنينا كم مشينا ..

وفي هالزوايا كم جمعنا مواليف
وياما على ذيك المرايا ضوينا ..

عشرة عمر ماتنتهي بالصواديف
وذكرى تبي تحيا ولو مابقينا ..

الموت يانايف كتاب وتصاريف
وحنا بحكم اللي خلقنا رضينا ..

---------------------------------------------
المرثيه قالتها الاميره مها السديري بزوجها صاحب السمو الملكي الامير نايف طيب الله ثراه وغفر له وموتى المسلمين
اعجبتني بما تحمله من وفاء لامير شهم احبه الجميع لا مست مشاعري فاحببت نقلها