مســــــــــــــــــــــــــــــــالخييييييييير بنات كيفنا اخبارنا؟
المووووهم ندخول في الموضوع
إلى متى !!
جد جد الى متى يعني !!
وبعدين وبعدين يعني !!
الى متى اروح السوق وأمنية حياتي ألبس مقاس 8 والا 10
الى متى بقعد آكل فاست فوود وسيي فود <<<تسمع بالسيي فوود
الى متى وانا كل يوم يزيد وزني الى متى !!
الى متى وانا احلم يصير وزني 52 الى متى!!
الى متى اقول بسوي رجيم يوم السبت ويجي يوم السبت ويروح سبت وانا مابديت !!
الين متى وامي تززززن فوق راسي: لاتاكلي لاتاكلي لاتاكلي
والين متى اشوف امي تقفل المطبخ في آخر الليل علشان مااكل .. <<< حشى ماصارت أم
وين وين حنان الأم !! <<وش عندها اوبرا
خلاص اسكتي لاتروحي لموضوع الحنان والامومه <<<<<<<
--------------------------------------------------------------------------------------
هذي مقدمه ونص الكلام نصب
تخيلوا امي تقفل المطبخ !! <<<يمكن تسويها بس من الفشله تسوين نفسك تنصبين
ماعليكم مني هذا انا وظميري
ظميري بالـ ض والا بالـ ظ !!
مـــــــــــــن اليـــوم لاحد يقول لي سبت وخرابيط
لألأ مو من اليوم علشان نبدأ كلنا مع بعض <<<ياخوفي بس انا اللي ابغى اسوي رجيم
مـــن يوم الثلاثاء <<<<وش معنى الثلاثاء يعني!!
بسسس كذا من يوم الثلاثاء نبدأ رجــــيم ابغى اكســـر قاعدة يوم السسسسسبت
--------------------------------------------------------
يالله اللي تبي تشارك معانا أو معي
تجي هونا وتقول لنا اسمها وعنوان بيتهم ووزنها وعمرها <<<< وش تبين انتي!!
امزح امزح
---------------------------------------------------------------
تقول لنا كم تبغى تنقص <<<<<<<انا عن نفسي ابغى انقص خمصعشر ستطعشر كيلو
تقول لنا وش أكلت في هذا اليوم !!
وتسوي رياضه والا لاع !!
وكم كيلو نقصت بالاسبوع !!
لألألأ مو بالاسبوع
كل يوم تكتب كم نقصت
حتى لو مانقصت شي تكتب مانقصت شي
لأن اصلاً اصلاً هالشي يشجع الوحده تستمر
وبعدين نحـن يامعشـر البنات" ملاقيف "يعني كل يوم بنراقب وزننا زاد والا نقص
--------------------------------------------------------------------------------------
نصائحي للرجيم <<<<<<انصحي نفسك اول
1_ نامي بدري وقومي بدري
2_ اشربي مويه كثير قد ماتقدري <<< وياحبذا الصباح تكون مويه فاتره طبعاً مو بارده.
3_لاتاكلي نشويات وخبز كثير مره وياحبذا شوي شوي تقطعيه
4_ تحركي كثير لأن الحركه تفيد وكل حركه تحرقين فيها سعرات حراريه
5_ مسموح لكي بشرب علبتين ببسي دايت في اليوم <<<<هذي نصيحه بس لي
6_لاتاكلي بالليل يعني وقفي اكل الساعه 8 ونامي وانتي ميته جوع احسن <<<اذا حسيتي نفسك بتموتي كولي بس اذا وضعك اوكي لاتاكلي احسن.
7_اذا انتي جوعانه حطي بفمك اي شي غير الاكل
8_اذا انتي تسوي رياضه فأنصصصصصصصحك تسويها وانتي مو ماكله شي لأنك كذا بتحرقي سعرات حراريه اكثر
9_ خلاص تعبت وانا اكتب.
---------------------------------------------------------------------------------
وانا اقترح علشان نشجع بعض اكثر .. ياحبذا تكون فيه جوائز للي تنحف اكثر من ثلاثه كيلو بالاسبوع .. . <<< وش تبين انتي!!