الوالدة تدور من جهة و خواتي من جهة .. و دخلنا .. دوامة بس داومة حلوة بيني و بينكم ... المهم ما أبي اطول عليكم <<<< يا خوي خذ راحتك وش ورانا
طيب إن شاء الله ..
بصراحة أجمل شيئ كان توصيف الخوات الله يحفظهم ...

زينب ( أختي الكبيرة) : و الله صديقتي في الكلية شعرها ناعم مرة و بيضاء و طويلة و مؤدبة و بنت ناس .
-
فاطمة (اكبر مني بسنة) : في زواج ولد عمنا شفتلك بنت تطيح الطير من السماء كنت قاعدة بس أطالعها طول الحفلة و سئلت عليها قالوا لي هذي منى بنت .... أيش رأيك نروح نخطبها لك.
الوالدة : لا يا وليدي حلات الثوب رقعته منه و فيه (مثل سعودي صناعة حساويه) ما لك ألا بنت خالتك سعاد قمر الله يسلمها طالعة على أختي .

بيني و بينكم كان ودي أسئل عن كل شيئ كبير و صغير عن حبيبة المسقبل بس ماش .. الواحد ذابح أمه هالحيا ( شدة الحياء)
-
بعد أخذ و رد رسينا على قمر .. أحم أحم ... أقصد على بنت نخطبها .. في ذاك اليوم شفت العم (أخو أبوي) ...
-
عمي : شف يا ولد أخوي لا تخلي هالحريم يقصون (يضحكون) عليك قلهم أبي (أريد) أشوفها .. لا يكون يعطونك جيكرة و لا شيئ . << جيكرة حسب قاموس لسان العرب هي القبيحة في العرف الحساوي و الخليجي و الاسكندنافي .
المهم ...
-
أنا : و الله ودي بس تتوقع يرضون .
عمي : و هو بكيفهم .. لازم تشوفها .. يعني تتزوج على عماها ... ما يصير .
أنا : طيب كيف أقولهم .. يعني كيف أفاتحهم .
عمي : عادي قل لهم أبي اشوفها نظرة شرعية .. و ما فيها شيئ هذا بنتي لما جات تتزوج طلب زوجها يشوفها صحيح أني رفضت بس يمكن غيري يوافق <<< العم بدأ يخوره تراه d:

بعد هالمحاضرة المكثفة و النصايح الدسمة رجعت البيت علشأن افاتح الوالدة في الموضوع .. قصدي الشوفه .. أو النظرة الشرعية مثل ما قال العم .. بس المشكلة هالحيا إللي رابط اللسان الواحد ...
أنا : يمه أنا ....
الوالدة : خير يمه ...
أنا : أنا .......
الوالدة : قول خير ..
أنا : ترا مو أنا إللي قايل بس عمي يقول لازم تشوفها .
الوالدة : من هي ذي ؟؟؟
أنا : ها ..... (طقني عقر بقر و لا أني عارف أقول شيئ)
الوالدة : أييييه تقصد منى .... أي ما يخالف حقك بكلم أمها اليوم و بشوف موعد معها و ما اعتقد ان عندهم مانع .

في يوم ثاني و كان يوم أثنين الوالدة قالت لي تقول أمها تعالى ****ر (غداً) بعد صلاة المغرب. <<< ما صدقت عن الله يالشين
طبعاً ما أقولكم ذيك العصرية مرت علي مثل سنة و في الليل رحت الاستراحة و سهرت لين أذان الفجر ... علشان بس أنام ما أصحى ألا استوى المغرب .. عدت ذيك الساعات ..

رحت بيت منى .. يا ربي يا زين هالأسم يسرسح على القلب ههههه
طقيت الباب و طلع أبوها .. و أبوها الله يوفقه أول مرة يتشرف بخشتي فما عرفني :

أنا : السلام عليكم .
الأب : و عليكم السلام .. أمر ؟؟
أنا : أمي قالت أنو أروح <<<< تروح وين ؟؟؟؟
الأب : أيييه أنت الخطيب .. حياك يابوك حياك ..

قلطني (دخلني) المجلس و جلست اسكب الغترة و العقال و شبجت الكبك و رتبت أموري <<<< يا شيخ على الكشخات

كنت جالس و منزل راسي الأرض يعني أسم مؤدب ...
كان المجلس له بابين باب يطل على الباب الخارجي و باب يطل على داخل البيت .... أنا من طبيعتي إذا صرت متوتر او مستحي أقعد العب في الغترة ما أقدر اترك طرف الغترة و صدقوني الغترة صارت هريسة من كثر التوتر ...
-
فجأة لقيت المجلس نور و دخلت .. سبحان الله على ذاك الجمال أنا إلى ذاك الوقت مستحيل أصدق ان القمر ممكن ينزل على الأرض .. بس ذاك اليوم شفته نزل و جلس معي في ذاك المجلس ... كان ودي أنزل رأسي بس صدقوني ما قدرت اشيل عيني عليها <<< طبيعي ما ذقت الذوق بتعلمني عنك عارفك

أبوها : ها .. شفتها
أنا : ها ...
أبوها : أقول شفتها
أنا : سم عمي <<<< الرجال ضايع لا تلومونه ما شاف جمال من قبل ..
-
أبوها : أقول شفتها
أنا : .. أيييه عمي ... << ما اسرع ما صار عمك يالعيار

منى .. كانت جالسة و امن الحيا مو عارفة شتسوي فديتها و أنا طبعاً غضيت عيني <<< و ربي أنك نصاب .. غضيت عينك ها .. غضيت عينك و ألا سويت لها أسكان من فوق لتحت .
أنا إللي أعرفه أن معدل دقات القلب الطبيعي 60 – 100 في الدقيقة بس صدقوني يمكن قلبي ضرب 3435 دقة في الدقيقة .. ما أدري ليش <<< يا عم أطلع من دول بأئه مش عارف ليه .


لما كنت أدرس درسنا أن السبب في المد و الجزر هو جاذبية القمر و كنت استغرب كيف يصير هالشيئ ... بس لما شفت هالقمر اللي قدامي تأكد لي أن القمر مو بس يقدر يسبب المد و الجزر بس .... بل يسبب الفيضانات و الزلازل و البراكين و كل شيئ


كان ابوها يطالعني كأنه صقر بيهجم على فريسته و توه بيقول لـ منى قومي دخلي داخل ... فجأة طررررررررررخ (صوت حادث) .. اشوي و دخل اخوها محمد

محمد : يبه قوم بسرعة ، اخوي احمد (10 سنوات) شغل السيارة و صقع سيارة الشيخ إللي يصلي في المسجد إللي جنبنا .
أبوها : ايش ( وقام بسرعة يركض يشوف المصيبة إللي صارت) <<< صحيح حظ الكافر وافر ..

أنا طبعاً ما صدقت عن الله .. . و مثل ما قلت لكم طبعاً أنا كنت منزل رأسي في الأرض و مستحي <<< يا عم اكفايه بكش بائه .. هو احنا تايهين عنك ..ئول ئول
الوضع كان حرج و الواحد بدأ يتصبب عرق كان النشاف (مناديل) قريب يم منى فقمت علشأن بأخذ نشاف ، البنيه مسكينه لم شافتني جاي جهتها أختبصت و ما تدري شتسوي ... ألا بدخلت اخوها خالد شافني رايح لها ..
-
خالد : شبتسوي ؟؟؟
أنا : لا .. انا صراحة .. بأخذ نشاف بس
خالد : و أين ابوي .. ليش تارككم الحالكم .. وين راح ؟؟
أنا : الحمدلله اصدموا سيارته و راح ..
خالد : إيش ؟؟ !!
أنا : لا .. قصدي الحمدلله أنها سلامات ما جاء أحد شيئ بس انصدمت سيارته.
خالد : طيب طيب .. أقعد محلك و لا تتحرك لين اجي .
أنا : أن شاء الله .. أن شاء الله <<< أقول قطو طقوه بمصير -


كانت منى فديت عمرها جالسة و ما تدري شتسوي تظل .. تقوم .. تدخل داخل ... الخجل و التوتر مدودهها (محيرها) ، و طبعاً ودي أقوم بس أمي قالت روح شوفها و ما حددت كم وقت الشوفه ساعة .. يوم .. سنــتـين ، و تدرون بي على نياتي <<<< يممه بتطيح السماء علينا أنت على نياتك .... يا شيخ خاف ربك بس ، خاف ربك.
-
ظليت بعد ما طلع أبوها تقريباً نص ساعة و أنا بموت من الحيا و الخجل حتى أني ندمت إني طلبت أشوفها <<< عيني في عينك ... ندمت و لا ودك تنام عندهم هههههه
بعدها دخل أبوها ، و تفاجأ لم شافني جالس معها ...

-
أبوها : و انت للحين جالس .
أنا : ها
أبوها (ألتفت على منى) : أيه انت قومي دخلي داخل .

قامت المسكينة و بقت تطيح و هي تمشي و أدخلت داخل البيت ... أحرجها أبوها <<< أبوها إللي أحرجها و ألا أنت يا اللزقه .. ما صارت نظرة شرعية ساعة متنصب قدام هالمسكينه.
-
بعدين أبوها طلع من المجلس و غاب أشوي و لقيت دخل مع الشيخ اللي أصدموا سيارته ، و هو يقول له و لا يهمك شيخنا ترى ما جاك بوجهي و السيارة بدخلها الورشة و أنا مستعد لتصليحها من الريال إلى الألف .
-
أنا في الحقيقة سمعت عن شلل نصفي و شلل أطفال بس عمري ما سمعت عن شيئ أسمه شلل خطوبة ، أرجولي رافضة تمشي.. و لأني قادر اطلع من هالبيت سبحان الله بيت نفسياً أرتحت له << < أرتحت للبيت ها .. ماشي أعديها لك هالمرة كمّـل .
-
أبوها (ألتفت لي) : أتعشى معنا يا ولدي ، ترى العشاء استوى .
أنا : أنعم الله عليكم و كثر خيرك عمي .. أنا صراحة ودي أقول شيئ ما دام الشيخ الله يحفظه موجود .. إذا تسمح لي .
أبوها (ينتظر ما أقول ) : .........
أنا : الله يطول عمرك يا عم إذا ممكن يعني و ما عندكم مانع .. ......
أبوها : خير يا ولدي شتبي تقول ؟؟؟
أنا : أنا أقول خير البر عاجله .. و إذا البنيه موافقة .. يعني بعد أذنك ممكن نعقد القرأن الحين و خاصة الشيخ موجود و الشهود موجودين ؟
أبوها : ... أنتظر لحظة أشاور البنيه ...

قام أبوها و دخل عند الحريم و بعد أشوي رجع .