يقول ..

ودي أنسى عذابي وأذكر أني جريـح
كل ماجيت أبنسى طاولتنـي جـروح




ياحبيبً عشقته كان تبغى الصحيـح
أنت نبض المشاعر وأنت للشعر روح





كل عرقً بصدري لا ذكرتـك يصيـح
وكل هـمً بقلبـي لا لقيتـك يـروح





ليه كل مارميتـك بالقصايـد تطيـح
ليه كل مانسيتك قـام طيفـك يلـوح





بين نفسي وبينـي والكـلام المليـح
المشاعر فراشك بالزعـل والمـزوح





أنت ضيف المحاني والمعـزب فليـح
ياكرّم ضيوف قلبي حالـفً ماتـروح





لا تشك أبوفـاي ولا تزعّـزك ريـح
أنت آمر تكلم وأكسر الصمـت بـوح





من عرفتك عرفت أنك صديق ونطيح
كثر مازعّلك وأزعل بس قلبي نصوح






ياكريم العطايا صار وصلـك شحيـح

كان مدك جزيل وكان جزرك شحـوح






من فقدتك شعرت بغلطتـي يامليـح
لعنبوها خطايـا والزمـان اللحـوح





كل ماجيت أبامشي درب هين مريـح
آه من جرحك اللي لا ذكرتـك يفـوح





وكل ماقلت هانت من عنا الوقت أطيح
بين قلبً عطوف وبين نفسً شفـوح





آه من كل معنى يرفضونـه صريـح
آه من وقت مابه للخطايـا سمـوح





آه من كل دمعه من عيونـي تطيـح
وآه من كل صرخة بالخفايـا تنـوح





أثري الوقت مابه من يريد الصحيـح
وأكثر الناس غامض مايحب الوضوح