رواية/ سعدى شقرديه ماتهاب و عربجيه غير عن كل البنات - ملتقى طلاب وطالبات جامعة الملك فيصل,جامعة الدمام

نجد العرب · #1 2010- 8- 29

بعد طول غياب أعود إليكم ولكم مني أجمل التحايا...عدت ومعي روايه جدا جميله للكاتبه ستيفانه الطائيه بحله جديده وإبداع قوي فبعدما لاقت روايتها الأولى((عشق بدوي يابنت ماتفهمينه))أصداء كبيره في جميع المنتديات...ها قد أتحفتنا بجديدها وأرجو أن يعجبكم إختياري ..القصه حمااااااااااس وتفطس ضحك...
وأتمنى ردودكم ...

رواية/ سعدى شقرديه ماتهاب و عربجيه غير عن كل البنات
بقلم الكاتبه/ستيفانه الطائيه
<<<الفــــــــــــصل الأول>>>>>>>

أملك كنوز الأرض بلمسة يديني,,,
لأني قدرت أمسك صلاتي والإيمان,,
وأحكم ملايين البشر في يميني,,
لأني قدرت أملك هوى النفس بإحسان,,
ويملكني اللي بالوفاء يحتويني,,
ويرخص بعيني أقرب الناس لو خان,,
الله خلقني مــالي العـــــــزعيــني ،،
والله أموت ولايجي يوم وأنهان,,,,

سعدى:هالحين وش المطلوب!
حصه:الموضوع جدا عادي بس إنتي ساعديني؟
سعدى:لا ياحصه موب عادي إنتي متوقعه إن السالفة تعدي على جدتي عيده.
حصه:تكفين علشاني.
سعدى:حسبي الله عليك ياحصه كانك ورطتيني.
حصه:والله ما أورطك بس إمشي معي تكفين.
(في غرفةالجدة عيده)
سعدى وتتميلح: جدة عيده يا جعلني ما أنحرم من شوفة درافيلك ولامنك.
الجدة عيده وسمعها على قد حالها:منهو اللي مات.
حصه وقد كتمت الضحكه:محد مات ياجده.
جده عيده:أويلاه ياذيك الأيام يومن كنت أسوي بيديني ذاك الحنيني والمطازيز اللي ريحتها تصك الرأس من زينه.
سعدى بصوت خفيف:أم الزلخ بداء الهياط وحركات نص كم.
الجده عيده:ياوليدي يوم إني كبرك ظفاير شعري تجر بالأرض ويسموني الجادل أم العيون النجل.
حصه فاقعه ضحك:أبو السالفة اللي خشت عرض،سعدى ترى محد قاعد يقط عليك دقات.
سعدى وقد فقدت أعصابها:ياجده عيده عيون نجل وألا خضر،أنتم و ش بلاكم متسلطين على شعري.
(شعر سعدى قصير جدا)
جده عيده:ياوليدي ماتخافين من المناقيد والهرج اللي يوجع الكبد.
سعدى وبنبرة متضايقه: والله محد دابل كبدي غيرك، أقول ورى ماتصكين ذا الموضوع،ماغير لاشفتك ذبحتيني هو أحد مسلطك على شعري.
حصه وهي متسدحه ضحك: سعدى والله لا تنشب لك إلين تفطسين بس إلبسي قدامها باروكه وإرتاحي من غثا البال.
سعدى وهي مطنقره: لا بعد أحسن قولي ألبس مخنق بدو وأتلفع بالشيله،،إنطقي بس.
الجده عيده : وش تهرجن فيه، وش علمي ما أفهم هرجكن.
سعدى وبصوت هامس: بلاه موب منك من فورمات رأسك المنتهيه صلاحيتها.
حصه: وجع تمص عروق رأسك عيب جدتك.
سعدى وبصقعه موجهه إلى رأس حصه: إهجدي وخلينا نخلص سالفتنا مع هالعجوز.
الجده عيده:وعزاه على أيام أول اللي أسمع السالفه على بعد كيلو.
سعدى وبإستغراب:إخس يالصواريخ،لابعد أعطينا وحده ثانيه.
حصه:هههه يقطع شرك ياسعدى.
سعدى وبجديه: ألا أقول ياعيده حنا جايين لك بإستفسار وبننقلع.
(خوووش إحترام)
جده عيده وبحسره:حسبي الله على عدوك وش هالتربيه ياسعدى محد عمره ناداني بإسمي،حتى المرحوم كان يناديني ياطخمةالعربان(صفه تستخدم لدلالةعلى الجمال الساحر)
سعدى:أما عاد مره وحده طخمة العربان،والله لو شافك هالحين لا يغير رأيه ويسميك برميل الحاره.
حصه وهي فاطسة ضحك:سعدى حرام عليك خلي المره بلحالها وخلينا نخلص سالفتنا.
سعدى وبدهاء:إلا أقول ياأم الشباب بغيت اسألك،ولدكم اللي إسمه منصور هو صحيح خاطب هاجروه.
(حصه وحاطه يدينها على قلبها وخايفه من رد جده عيده)
الجده عيده وهي منزله نظارتها وتخز في سعدى وبضحكة مكر:والله لو إن شعرك طويل كان من زمان خطبتك لوليدي منصور جعل ربي يحفظه ويحفظ أبوه الغالي اللي من ريحة الغالي.
سعدى وبهمس:هذه اللي تبيني أقوم أكفخها،هالحين أنا بوادي وهي بوادي.
حصه تحاول تهدئي سعدى:سعدى الله يخليك لاتسوين مصايب اسأليها وخلصينا ترى قلبي على أعصابه.
سعدى:خلاص إسكتي لاتصيحين علينا أوف.
حصه:بسرعه.
سعدى:جده عيده تراني أتكلم جد، حفيدك المبجل منصوروه يبي يعرس و ألا لا؟
جده عيده:ورى ماتعلمين الذرابه،وش علمك ماتستحين،أول يوم إننا كبرك نستحي من هالسوالف،ماندري إلا وحنا بذمة رجل.
سعدى وبصوت منخفض:ههههه قابليني وتقولن تستحن، أمحق من حياء أصلن أنتن أهم حاجه رجل يقضي الحاجه اللي خبري خبرك وخلصنا.
حصه وبوجه مصفوق:سعدى إنطقي وخلينا نطلع وإستحي على دم وجهك.
سعدى :أقول أنا مخربتها مع هالعجوز،مدري وش تحس فيه،آخ بس لو الواحد يقدر يتجرد من الرحمه كان حذفتها بأقرب شارع تفحيط.
حصه وبعيونها دمعه:سعدى مالي خاطر عندك،الله يخليك خلينا نطلع بنتيجه.
سعدى:والله لولا غلاتك كان سحبت عليها جلنط، أنا بس أبي أفهم أمي وش لون طلعت من بطن هالآدميه.
حصه زهقانه:روحي طلعي أمك من قبرها واسأليها.
سعدى:ههههه يختي من عذر أمي إنها ماتت دام عيده هي اللي جابتها أكيد تبي تفطس.
جده عيده خاشه عرض:منصور والله إن منصور خوش ولد.
سعدى وبإستغراب:أويلاه والله إنها فاصله.
حصه وبتردد:جده عيده صحيح إن منصور خطب هاجر بنت عمي خالد.
سعدى وبصوت منخفض:حبتين أخيرا هرجتي.
جده عيده:يازين صوتك ياحصه لاتكلمتي أبرك من صوت هالمرجوجه اللي ماتركد.
سعدى وبنرفزه:أبي أفهم من اللي داعي علي وصرتي جدتي ياشين قرادة الحظ شيناه.
حصه بإنفعال:أيوه ياجده ماجاوبتي.
جده عيده:والله وأنا أمك يابنتي سعد أبو منصور جاني يشاورني في هاجر وأنا مدحتها،خبري فيها مزيوينه.
سعدى وبإندفاع:خبرك فيها قديم يالحبيبه،هالحين صارت زي خدامتنا المفعوصه.
حصه وبحسره:يعني خلاص بيتزوجها.
الجده عيده وهي تحاول تجميع الأحداث:والله اللي سمعت إنه منصور ما بغاها وقايل والله لأذبح نفسي إن زوجتوني هاجر.
حصه وبفرحه غامره:يالبيييه يامنصور.
سعدى وبضحكه هستيريه:إخس والله وطلع لك حس ياحصوه،وألا حنا محد يلبينا أول.
حصه وقد شعرت بالإحراج: موب عن شي بس كذا الرجوله محد يغصب أحد على شي.
جده عيده:لا والله شباب هالوقت الله يكفينا الشر ماعندهم سالفة إلا بذبح نفسي ،ضاعت علوم الرجال آه يامرارتي اللي تبي تنفقع من بلاويكم.
سعدى وبتهكم:والله مافقع مرارتي غيرك،مدري وش فيك كلما شفتيني إستنزلتي علي،كأنك شايفه جني بوجهي.
جده عيده:أنا جني يااللي ماتستحين قومي إطلعي ياجعل ماتربحين.
سعدى وبعصبيه:موب من زين القعده عندك،الشكوى لله ذليت نفسي وجيتك وألا إنتي خابرتني ما أواطن خشتك.
حصه:الله يهديك يابنت الحلال خلاص إمشي هذا موب وقت هواش،يعني أنا جايبتك تسألينها وألا ترفعين ضغطها.
سعدى: أقول خبر منصور بجيبه لك يعني بجيبه وخلينا نطلع من غرفة هالعجوز قبل لايطق فيني عرق.
(طلعت حصه مع سعدى من غرفة جده عيده والخيبه تجر أذيالها)

نجد العرب · 2010- 8- 29

< الفصل الثاني>
حصه تؤامي وهي الإنسانه الوحيده اللي فاهمتني ،أبيع الدنيا علشانها،صديقتي وأختي اللي ماجابتها أمي،حصه هي جوي الرايق،وأغلى إنسانه ممكن أضحي لعيونها,,صداقتنا من زمان أيام الإبتدائي وللحين حتى عقب ما تخرجنا من الكليه<<العام حصه وسعدى تخرجو>>,,،حصه موقعها من العائله تصير بنت عم أبوي ،لكن للأسف إرتباطات العائله بعض الأحيان تفرض علينا إننا نفترق ،مثل اللي صار لنا بإجازة هالصيف،قرر أبوي إن خوالنا لهم حق منا ولازم نقضي ولو صيفيه وحده عندهم ينقالك من باب الوصل=>(إيه هين ولاجينا الصدق ماعنده سالفه)
المهم أنا مره تضايقت إنه حصه موب معي واللي قهرني بزيادة وقلب وناستي إنه جدتي عيده نشبت تبي تروح معنا،تبي تشوف عيالها وبناتها اللي يصيرون خوالي وخالاتي=>(أنا اللي مالي دخل أحسها نشبه)
حصه:ياسعدى تحمليها صحيح لسانها طويل بس قلبها طيب.
سعدى:والله ما مصبرني غيرك هالحين إنتي موب معي وهي تبي تلزق فيني.
حصه:امممم طيب عندي لك خبر يمكن يخليك تتحملينها شوي.
سعدى وحاطه رجوله فوق الكنب:أقول هذه مايريحني منها غير ربي.
حصه:أبوي وافق إننا نكمل نص الإجازه عندكم هناك بالقصيم.
سعدى نطت من الوناسه:قولي قسم.
حصه:والله أبوي وعدنا نص الإجازه هنا وآخرها هناك .
سعدى:لا صاير بالدنيا شي أبوك ذا الطعس المحجر غير رأيه غريبه.
حصه وبضحكه:لاتصكينه عين هذه من المعجزات بس شكله ناوي يشتري عقار هناك.
سعدى:إيه قولي كذا من أول،أبوك ماخشته خشة وصل رحم.
حصه وبإبتسامه:ماعلينا ،تكفين لا تنسين موضوع منصور.
سعدى: لاحول ياليتني منصور.
حصه:يخسي إنتي أغلى منه،لكن خبرك القلب شوي يميل له.
سعدى وبنظرات تشكك:هههه إذا كل هذا شوي أجل الكبير وش يطلع.
حصه:ياعساني ما إنحرم منك ياسعدى والله مدري كيف أقضي الأيام بدونك.
سعدى:عادي نامي وقومي وإرجعي نامي وفجأه تلقين الأيام قضت.
حصه:يصير خير،بنشوف من اللي يصبر عن الثاني.
سعدى :طيب نشوف.
حصه:إلا تعالي خلاص جهزتي نفسك.
سعدى:وش أجهز نفسي فيه كلها كم بنطلون وبلوزه وخلصنا.
حصه وبإستغراب:بناطيل وعند خوالك والله لا يخلونك ماتسوين قرش.
سعدى وببرودة أعصاب:بالطقاق مايهمني.
حصه:تكفين ما أوصيك ماله داعي طولة لسان ومشاكل مع خلق الله.
سعدى:شوفي أنا بجنب المشاكل لكن قسم بالله اللي يتحرش فيني لا ألعن خيره.
حصه:محد جايك لكن دخيلك خلي إجازتك تعدي على خير.
سعدى وبتهكم: إيه يصير خير.
حصه:وش قصدك.
سعدى:والله ياحصه إنتي أدرى المشاكل تبلاني بلوى وتحاذف من كل صوب،تعودت على الوضع وصار موب غريب.
حصه وتحاول تلطف الجو:أهم شي لاتسوين فيلم هندي وتسوين قصة حب مع عيال خوالك.
سعدى وبنظرات خز:حصه عن السوالف وهالخرابيط.
حصه :يممماه خلاص أعوذ بالله حتى مايمزح معك الواحد.
سعدى:الزبدة قولي لأبوك هالطعس إنك بتنامين عندي الليله.
حصه:صعبه والله ما أقدر تعرفين أبوي.
سعدى:ياليل البعارين والله لو إنه أبوي كان من زمان قضيت عليه.
حصه:هههههه ترى أبوي حبيب بس هالسوالف ماتمشي عنده.
سعدى:الله وأكبر اللي يسمعك يقول نايمه بالشارع،حاولي فيه علشاني.
حصه وبنذاله:يعني لهدرجه ودك أقعد عندك.
سعدى وبربشه:مالت عليك إنتي وأبوك،تبين تنامين تعالي ،ماتبين فارقي.
حصه وبضحكه:والله أدري إنك ميته تبيني أنام عندك بس خلاص عقب هرجك موب قاعده عندك.
سعدى وبكبرياء:كيفك بس أنا ودي إنك تغيرين جو وبعدين ياحصه أعرفك ماتقدرين تستغنين عني عشان كذا قلت أهجدي عندنا.
حصه:سعدى ربي يخليك ياأغلى أخت بالدنيا أموت حتى على كبرياءك.
سعدى:ولامنك يالغاليه.
حصه:إيه صح بعطيك شي.
سعدى وهي ناطه من الوناسه:الله وشو؟
حصه:ورى ماتقضبين القاع،إصبري.
(طلعت حصه من شنطتها عطر مس ديور ونزلته قدام سعدى)
سعدى وهي منصدمه وبشهقه: ياه ياحصه وش علمك علي الليله تقلبين المواجع.
حصه:يختي ودي تأخذين شي معك يذكرك بمواقفنا الهبلا.
سعدى متأثره:ياليتني أقدر أنساك عشان أذكرك،يارب ياحصوص يحقق لك كل اللي تبين ويزوجك صرصوره قصدي منصوروه.
حصه:لاتغلطين عليه مسكين ما يستاهل.
سعدى:آه والله لو لا إختلاف الأذواق كان ماصار لمنصور سوق والا من زين هالحلايا.
حصه:والله لو تشوفينه يطيح الطير من السماء.
سعدى:ربي راحمني إني ماشفته.
حصه:سعدى بتصل في أبوي أقنعه أنام عندك قبل لاتسافرين.
سعدى نطت من الفرحه:بسرعه تكفين.
(حصه إتصلت على أبوها وإستأذنت منه إنها تنام عندي،،وافق أبوها بعد مانشف ريقنا، كانت أجمل لحظات حياتي حصوه تنام عندي)

نجد العرب · 2010- 8- 29

(( الفصــل الثالث.))

ياهوووووه ياعالم إخلصوا،يا سعدى، يافوزيه،إخلصوا ،،ياخاله عيده ترى موعد الإقلاع قرب.
سعدى:يبه والله إني من البارح وأنا قاضيه شغلي بس عيدوه للحين ماقضت.
أبوسعدى:عيب إستحي يابنت إحترمي جدتك.
(سعدى قامت تركض ووقفت عند الدرج،عيده ياعيدوه ياجده بسرعه إخلصي والله لو فات موعد الرحله والله لاتصير علوم وسوالف)
الجده عيده:وماحي يمحى العدو من على وجه الأرض،إسكتي خبصتينن.
سعدى:ياجده تكفين بسرعه.
الجده عيده وتمشي بتثاقل:هذاني جيت ياعل العدو مايجي هاك إقضبي كيسي.
سعدى وهي حاطه يدها على خشمها:ووووع وش هالزباله اللي معك.
الجده عيده:وش زبالته،الشرهه موب عليك على اللي ماعلمك أدويتنا.
سعدى وهي مخنوقه من قوة الرائحه:ياعيده تكفين وشو هذا؟
الجده عيده:هذا وأنا أمك مره وحلتيته عن البرد،وعنزروت يعطي مناعه وشوي رشاد.
سعدى وبصراخ:الله يرحم أبوك وأمك اللي في قبورهم لاتفضحيننا.
الجده عيده:وراه.
سعدى:إنتي ناويه العالم تهج،،تكفين والله لأشتري لك من مصروفي الخاص وأوديك لأحسن عطار بس فكينا من هالقرف.
الجده عيده:حسبي الله ونعم الوكيل وش عرفك بهالأدويه،هذه بإذن الله تحمينا من كل مرض.
سعدى وبنفاذ صبر:ياجعلني أموت بس لاتأخذين هالكيس وتفشلينا.
أبوسعدى داخل طاير:إخلصوا بسرعه ترى والله لا أحرك،مابقى على الإقلاع شي.
الجده عيده:إسكت جينا أعوذ بالله من شرك إنت وبنتك.
(سعدى وقد أخذت كيس الأدويه وحذفته بأقرب زباله بالبيت،والجده عيده ماغير تدعي عليها)
(هههه بعذرها تدعي عليها ماتنلام المسكينه أخذت أعز شي عندها)
((( بالطيــــــــــــــاره))
من قرادة حظي اللي ملاحقتني بكل مكان أبوي وجدتي على نفس المقاعد،وأنا وأختي فوزيه مع بعض..بيني وبين مقعد أبوي وجدتي يمكن مقعدين وطبعا استأنست بالحيل إني خلاص بفتك من إزعاجها لو ساعه على الأقل.
فجأه أسمع صراخ ماهوب غريب،،
(الجده عيده تنادي سعدى على بعد كرسيين) :يا سعدى تعالي وديني الحمام.
سعدى ومن هول الصدمه:أويلاه فضحتنا عجوز الخيش.
فوزيه ميته ضحك:عادي هو فيه أحد يعرفنا هنا مامن خلاف.
سعدى والشياطين ركبتها:ذا اللي جنبها وراه ساكت ورى مايوديها للحمام.
فوزيه فقعت ضحك:أبوي خلف الله عليه مستانس عليها.
سعدى وقد قامت من كرسيها بسيل عارم من الغضب: يستانس مع نفسه موب يفضحوننا،الطياره كلهم عرفوني سعدى ورايحه للقصيم.
الجده عيده بصراخ:ياسعدى وين الحمام.
سعدى:خلاص إهجدي بوديك للحمام وبقعدك فيه إلين ماننزل.
الجده عيده:وخزياه وش أعمل بالحمام .
سعدى فاقده أعصابها:وش دراني عنك ،يارب صبرني.
(مواقف جدتي عيده بالطياره تفشل وأحمد ربي إني متغطيه وألا كان مت من القهر والفشيله،،والموقف اللي مستحيل أنساه وبغيت أصيح من الصدمه،،،قبل ننزل من الطياره أصرت جدتي عيده إلاتشوف كابتن الطياره،،حاولنا نقنعها إن هالشي صعب لكنها عندت ومارضت إلا تبي تشوف الطيار وقعدت تصارخ،،طبعا الكابتن ماقصر من سمع صراخها جاء،،أثريها كانت تبي تعطيه فلوس خدمة التوصيل على بالها إن الطياره زي التاكسي=>قسم إنها حوطيه.
أنا هنا دوروني طحت بهدومي من الفشيله،نزلت على وجهي مدري وين الله قاطني بس ما أبي أحد يشوفها جنبي.
وصلنا مطار القصيم ،وقعدنا بصالة الإنتظار نحتري أي واحد من عيال خوالي يجي ويأخذنا، أثناء الإنتظار قعدنا نسولف أنا وأختي فوزيه.
فوزيه:سعدى توقعين بنات خوالي شينات.
سعدى:إحلفي بالله عليك تستهبلين وأنا وش دراني علمي علمك.
فوزيه وبتنهيده:إيه والله صح خبرنا فيهم أيام المتوسط يوم إن أمي معانا.
سعدى وبعد صمت طويل:شوفي فوزيه أنا ماراح أهرج معاهن،،وأبي أسوي حزب لحالي،ياويلهن إن قربن صوبي والله لا أترفس في بطونهن.
فوزيه وبإستغراب:ما أسرع ماطلعت اللهجه أمدانا.
سعدى وبتفكير:لا جد فوزيه أنا مالي خلق نظرات مالها داعي.
فوزيه:موب قايله لك طولي شعرك وخففي من هالزحف اللي عندك شوي.
سعدى:شوفي عاد لا أسمع طاري هالموضوع وصكيه،كم مره تناقشنا بهالشي،لوعتي كبدي زي عيدوه.
فوزيه: هههه إنتبهي لألفاظك ماله داعي مطبات.
سعدى:اللي عاجبه خير وبركه واللي موب عاجبه يختار أي جدار يصقع رأسه فيه.
فوزيه فجأه نطت من كرسيها: أويلاه وش هالزين اللي يسلم على أبوي.
سعدى وبلا مبالاة: أي زين ما أشوف قدامي إلا بس مطاعم.
فوزيه:حرام عليك كل هالزين وآخرتها بس مطاعم،والله ماتشوفين يالخبله.
جده عيده بصالة الإنتظار وبصوت جهور:يا الله إنك تحفظك يالغالي، يازين القمر اللي لفانا.
سعدى وبداخل نفسها:لا وبعد ويقولون من وين جبت العربجه والله إني أجسد النعومه قدام عيدوه هي وصوتها اللي كأنه مكبرات مسرح.
فوزيه بلقافه:جده من هذا؟
جده عيده وهي تناظر لسعدى بمكر:إيه هذا الغالي منصور ياعلني ماخلا من شوفته.
(منصور شاب وسيم،ومن كثر ماهو جميل تشك إنه بنت لابس عقال وشماغ،أبيض البشره متوسط الطول، وعيونه وساع)
سعدى وبصدمه:هذا منصوروه.
جده عيده وبدهاء:إيه والله لو إنك بنت سنعه كان خطبتك له من زمان.،،منصور كل بنت تتمنى شوفته.
سعدى وقد فقدت أعصابها:مالت عليه وعلى اللي جابه ذا هو ووجه موب من زينه.
فوزيه:قصري صوتك فضحتينا.
سعدى وبداخلها: هالحين هذا اللي صجتنا فيه حصه،،ورجال ومدري وش وآخرتها بشرته أنعم من بشرتي.

(سعدى،،،سعدى،،يا أبوي وين وصلتي)
سعدى:هلا هلا سم ياعيونها.
أبوسعدى:وين وصلتي خلينا نسري خوالك يحتروننا.
سعدى:يله قدام.
أبوسعدى:سعدى ياأبوي عن بعض الهرج اللي ماله سنع.
سعدى:لا حول وش قلت خلاص لا أحد يكلمني.
(كملنا طريقنا بسيارة منصور وأنا ساكتة طول الوقت أفكر بالناس اللي خبري فيهم من زمان تغيروا وألا هم على خبري،كيف بتعامل معاهم،لا وزودن على هذا أخيرا شفت منصوراللي ميته عليه حصيص)
طرآآآآخ>>صوت باب السياره مصفوق،
جده عيده: واه ياحر تسبدي على ديرتي.(باللهجةالنجديه وتعني كبدي) .
فوزيه:ياجده هذا وإنتي كل سنة منقعه هنا ياكافي.
منصور وبلقافه:إلا وش رأيك ياسعدى بديرتنا؟
(سعدى تناظر لمنصور بتعجب ودارت ظهرها ماردت عليه،هنا منصور إنحرج بقوة وصار وجهه كأنه طماطه)
فوزيه:سعدى ورى مارديتي عليه موب عيب عليك.
سعدى وبإنفعال:موب قايله لكم لا أحد يهرج معي،،خير هو وجهه ناوي يقط الميانه من أولها.
فوزيه وبتنهيده:وه بس يازين ميانة هالزين يازينها،أحد يحصل له هالقمر يهرج معاه.
سعدى:هيه بنت عن ملاغةالكلام وياويلك إن حطيتي منصور برأسك.
فوزيه :سلامات الظاهر إنتي ناويه عليه.
سعدى وبنرفزه:فوزيه إنتي أختي وتدرين ماعندي هالخرابيط وآخر واحد ممكن أفكر فيه منصور.
فوزيه:ليش طيب.
سعدى وخربتها:فوزيه تذكرين منصور اللي دايم حصه تسولف عنه قدامنا.
فوزيه:إيه وش به؟؟.
سعدى:هذا هو منصور اللي تحبه حصه،خلاص إرتحتي.
فوزيه وبصدمه:قولي قسم.
سعدى:إحلفي ياشيخه ،كبرك أنا أمزح معك.
فوزيه:من عذر البنت لو إنهبلت ياويل قلبي يجنن.
سعدى:أقول إهجدي وخلينا ندخل نسلم ونفتك.

نجد العرب · 2010- 8- 29

<< الفصل الرابع>>

<في مجلس خالتي رقيه>
ياهو مجلس كبير،تحس كأنك قاعد بقاعة مؤتمرات موب مجلس،،طبعا خالتي رقيه هي أكبر خالاتي ودايم بالصيفيه العالم تجتمع عندها لأن بيتها مره كبير وغرف إستقبال الضيوف واجد.
بعد ماخلصنا حركات السلام والأشياءات اللي مالها داعي قعدت اتأمل خالاتي وبنات خالاتي،،الحريم الكبار كانوا قاعدين بصدارةالمجلس والبنات بالطرف،،وبصراحه قهروني بنات خالاتي من جينا وهم بس يضحكون لدرجة إني شكيت بنفسي مدري وش بلاهم،،حقدت عليهم بزيادة وقررت إني أسحب عليهم سيفون وخل وحده تهرج معي.
شوي وتجي بنت خالتي إسمها سديم أقبلت لمي أنا وفوزيه،،وأنا بداخل نفسي أقول يالليل النشبات وش تبي ذي بعد.
(سديم هي العضو الفعال بقروب البنات،والعقل المدبر ،جرئيه وتقريبا أكثر وحده تشبه تصرفاتي،حلوه وموب مره بيضا،جسمها متناسق وجذابه)
سديم:يا الله إنك تحيي من جانا.
<سعدى ببرود طنشت سديم وقامت تلعب بجوالها>
فوزيه وبإسفهلال:هلابك زود.
سديم:عسى ماتعبتوا.
<سعدى وبداخل نفسها إلا بغينا ننجلط من عيدوه فضحتنا>
فوزيه وبسخريه:لا الحمدالله كل شي تمام خاصه كابتن الطياره.
سديم قامت تضحك:وش معنى يعني.
سعدى خزت فوزيه:أقول إنطقي ولاتجيبين سيرة الموضوع.
سديم:بنات وش رأيكم نروح للشله وأعرفكم عليهم.
فوزيه بحماس:يله.
سعدى:والله اللي يبيني يجيني.
(سديم وفوزيه يناظرون لسعدى بإستغراب ،،فجأه بصراخ فجر كل الهدو قامت سديم تنادي بنات خالاتي يجون،بصراحه إستغربت من موقفها وإستغربت إنها ماتنرفزت من إسلوبي،أعجبتني حركتها،،بإشاره من سديم جاء الشعب كله ،،بنات خالاتي جو يركضون ماصدقوا على الله أحد يناديهم.
قامت كل وحده تعطيني تقرير كامل عن حياتها،،ياربيييه فيهم لقافه تطلع الجن من مكانه.
<هيه هيه سعدى،فوزيه ماتخبروني أن معالي اللي بس بالشوارع مسنتره 24 ساعه.>
فوزيه تضحك:ما أخبر إلا كشتك اللي كأنها نعيميه.
(سعدى طول الوقت ساكته وتناظر لهم بإستغراب تحسهم مهابيل)
معالي:يقطع شرك يافوزيه،الزبده تدرسون ماتدرسون،أعرستوا ما أعرستوا وش الدنيا بكم؟
<سعدى وبداخل نفسها:يلعن أم اللقافه اللي عليهم>
فوزيه:أنا ثالث كليه وسعدى تخرجت العام.
معالي:وناسه أجل أنا وإنتي ربع،أنا بعد ثالث لكن لاجينا الصدق أمغط السنه بسنتين.
(معالي هي ملح الجلسه، والمساعد الأول للعمليات النتفيذيه،جسمها مليان لكنها موب سمينه،تموت على القز وتخق على الكلام الحلو)
فوزيه:يعني إنتي من جنبها.
<ضحكوا البنات>
أنا إستغربت منهم على كل شي يضحكون لو تقولين السلام عليكم تسدحوا ضحك.
سديم:سعدى،فوزيه بعرفكم على البنات.
هذه هبوب بنت خالتي نوره متخرجه من سنتين<هبوب فيها سمار وملح يضيع علوم الواحد،شعرها موب مره طويل لونه أسود فاحم،محد يمل لاناظر لها جذابه بمعنى الكلمه>
اللي جنبها لابسه أورنج بنت أختها وإسمها أسماء وهذه خكرية العائله وتدرس بأول كليه<يممماه نعومةهالبنت تقطع بعض،،ودلوعه ترفع الضغط ،تسحب الكلام سحب بغنج،،بصراحه يحق لها لأنها حلوه ونعومه بقوة>
أما الثنتين اللي ناشبين في بعض أروى وحمده يدرسون بثالث ثانوي واللي قاعده يسارهم ولابسه تفاحي هذه فيلسوف الشله بشرى برابع كليه،،و كادي اللي على الطرف.
معالي:لا والله وإنتي الصادقه لحوج وتجمعنا.
(سعدى تناظر للبنات وتحكي مع نفسها: إخس والله إنهم زاحفين)
بشرى:إلا يا سعدى ورى ماتهرجين معنا.
سعدى:إنتم أكلتوا الواحد بقشوره حتى مايدري وش يقول.
كادي:هههههه إذا تحترين دورك ما يمديك مانعطي مجال.
معالي:إيه والله حنا مصرقعين وتعودنا على الصرقعه.
أسماء وبدلع:رجاء خاص كل واحد يتكلم عن نفسه.
سديم:ياليل تكلمت خكريتنا.
أروى:أسماء ترى ما أداني صوتك ياكرهي للغنج الزايد.
سعدى وهي كاتمه الضحكه: مثلي ما أحب هالأشكال.
أروى:بنات وش رأيكم نرقص!
(هنا أنا فقعت ضحك،البنات رجه ومصرقعات بشكل موب طبيعي)
حمده:أيوه ورى ورى تنكس،فيكم طرب أيوه،فيكم وناسه أيوه.
(حمده رقاصة العايله،شوي دبدوبه وبيضاء،تعشق الرقص وطموحها تصير مدربة رقص)
سعدى وبصوت عالي:هههههههه قسم بالله إنكم زجفيشن.
(البنات قعدوا يناظرون لسعدى مستغربين أخيرا ضحكت،، يوم شافوها كذا فقعوا ضحك)
سعدى:يله بنات خلونا نهيص.
رحنا للغرفه الثانيه وإستهبلنا إستهبال بحياتي ماسويته،،ماتوقعتهم كذا،،المهم مر على قعدتنا إسبوع ونص،،البنات بصراحه دخلوا مزاجي،،وجوهم صار جوي،،
،حبيتهم وحبوني،،حسيت كأني عايشه معاهم من سنين،، طول وقتنا روقان في روقان ،،وشعارنا الدائم طنش تعش وشوف كيف راح تنتعش،،
كل شي غير مع هالبنات
،إحساس ثاني،صدق وطهاره بقلوبهم وأحلى حاجه قبلوني كما أنا بستايلي وشكلي وتصرفاتي.
أطرف موقف مر علينا ومستحيل أتصور بلحظه إني فعلا قدرت أسوي هالشي،،موقفنا مع المطعم بذيك الليله المنحوسه.

نجد العرب · 2010- 8- 29

ونكمل الجزء الخامس..........

نجد العرب · 2010- 8- 29

0 <<الفصل الخامس.>>
بذيك الليله كنا سهرانين سديم وهبوب وأسما ومعالي والمصرقعات حمده وأروى وكادي وبشرى،،ومع أختي فوزيه،،قعدنا نستهبل ونرقص وفطسنا من الجوع،،يعني حياتنا حياة عزابيه والله ما كأننا بنات،،هبوب وأسماء قعدوا يحوسون يدورون شي بالمطبخ ماحصلوا شي ،،والمصيبه كلنا دلوخ ولا وحده لها خلق تصير مره سنعه وتطبخ لنا شي،،قعدنا نفكر و نحوس بالدروج كأننا فيران مخازن وماحصلنا حاجه سريعة التحضير،،أخيرا وصلنا لفكره،جمعنا قطيه اللي معها ريالين واللي معها خمسه واللي مطفره على الحديده إلين وصلت القطيه 25 ريال.
<أمحق من قطيه هههههه>
هذا كان على وجه الفجر ويمكن باقي على أذآن الفجر ساعتين،،دقت معالي على مطعم الشاميات،،طبعا معالي تخق على الصوت لو كان صوت دجاجه مفغوصه ،،المهم رد عليها واحد لبناني،
طوط_طوط_طوط

معالي:ألو
المطعم:أهلين وسهلين شو محلا هالصبحيه.
معالي بربكه:ممكن لو سمحت نطلب.
المطعم:تكرم عيونك الحلوين.
معالي أبعدت السماعه عنها وبشهقه:أويلاه يابنات يقول عيوني حلوه.
سعدى خشت عرض:أقول لايهايط واجد إخلصو علينا.
معالي:لو سمحت نبي لبنه بالزيتون.
المطعم:كرمال عيونك بصير لك لبنه ياأحلى زيتونه.
معالي وبربكه أكثر من اللي قبل:يمه يمه ياحرارة تسبدي يازين هرجك يمه ياقلبي.
(سعدى هنا طنقرت وسحبت التيلفون من معالي)
سعدى وبهواش:إسمع هات جبن و...
المطعم:ولك العمى شو هالصوت اللي عم يهز البدن.
سعدى:عمى تعمي عيونك.
المطعم:يا آنسه شو بنا؟
سعدى وقافله معها الأخلاق: بنا وألا هدم ماهيب شغلتك،،تبي تسجل وألا إنقلع.
المطعم:شو عم تحكي،،بليز بدي أحكي مع الآنسه اللي من شوي.
سعدى وبنرفزه: شين وقواية عين،ياجعل لسانك للحارق والساحق الماحق اللي يسحقك ويخليك زعتر مطحون.
المطعم:ضبي لسانك ياآنسه.
سعدى وبصراخ:ضب يأكل لسانك قل آمين.
طرآآآآآخ
(صكت سعدى بوجه الزلمه،،يستاهل ماجاه أحسن)
معالي:حرام وش هالجلافه مع الآدمي.
سعدى:لعنبو دارك إنتي وياه ماتستحون .
سديم:وش دعوة سعدى تراه ماقال شي هذا هو إسلوبهم متعودين عليهم.
سعدى:شوفي إنتي متعوده هذا شي راجع لك،لكن أنا ما أرضى أشوف الغلط وأسكت.
هبوب:أي غلط لا تكبرين السالفه.
سعدى وقد فقدت أعصابها:خير إنشاءالله يعني حلال عليهم حرام على عيالنا.
هبوب طنقرت:وش قصدك.
سعدى:يعني لو هالكلام قاله سعودي وش تسوين؟
هبوب:أكيد أمسح فيه البلاط.
سعدى:اجل ليش هذا نعديها له.
سديم:ياقلبي ياسعدى هم هاللون هرجهم.
سعدى:معصي الرجل رجل سعودي ,,شامي وألا هندي.
هبوب:سعدى تعلمي السنع شوي.
بشرى خاشه عرض بفلسفتها المعتاده:سعدى لازم نحترم ثقافات الغير،،يعني هم كذا ودايم كلامهم معسول ليه مكبره السالفه.
سعدى فجرت الدنيا بصراخها: شوفي عاد إنتي وهي ،أنا ما أفهم هرجكن،،كل اللي أفهمه شي واحد طول ما أنا بينكن ولا وحده تتجاوز حدودها مع سعودي،،شامي وألا سيلاني.
معالي:حسبي الله على عدوك ياسعدى،،حرمتيني الكلام الزين اللي ينقط لبنه بالعسل وحرمتيني الأكل.
سعدى:بدال المطعم عشره، إتصلوا على مطعم ثاني.
أروى وبتنهيدة:مالت عليتس وش على بالك مطاعم الشرقيه 24 ساعه مفتوحه.هذا المطعم الوحيد اللي يفتح ذا الوقت.
أسماء:بموت جوع،،سعدى إنتي مالك داعي بالحياة،وع عليك.
حمده رقاصةالعائله:ورى ورى وسرت الليله ومامن عشاء،،هلا هلا وسعدى طيرت عشانا.
معالي:ياسعدى تكفين خليني أدق مره ثانيه والله إن عصافير بطني توطوط من الجوع.
كادي ودايم صاقعه فهاوه:يابنات وش رأيكن بتمرتين برحي ولبن غنم من شبك جدتي وقضينا.
سديم:هذه والله اللي يبغالها أحد يشوتها ويعدل رأسها.
سعدى وبضحكه:أقول ورى ياكادي ماتروحين لفراشك وألا أقول روحي لجده عيده وأحلبوا الغنم بلحالكم.
أسماء:جيعانه أبي أكل.

نجد العرب · 2010- 8- 29

سعدى:إنطقي ما أداني أسمع حسك بنوكلك بس لاتهرجين، ،ياشين الدلع الزايد.
سديم:بنات أنا عندي فكره لكن ما أبغى حركات صراخ وتسوون زحمه على الفاضي.
(البنات بصوت واحد قولي بس أهم شي نبلع)
(سديم هي العقل المدبر وأنا المنفذ،،تعجبني بأفكارها وجرأتها)
سديم:إسمعوا يابنات ،،الشباب وينهم؟؟
معالي بصرقعه:بقلبي قصدي أي شباب!
سديم:أخوانكم وعيال خالاتي يالدلوخ وينهم.
هبوب:خبري إنهم مأجرين إستراحه بالرياض يغيرون جو ثمن بيرجعون للقصيم بعد يومين.
سديم وبإنبساط:حلو يعني القروب الخائب كلهم رايحين.
معالي وبقلب محطم:حسافه مافيه أحد نقزقزه.
سعدى والأمبير صاقع معها:إنتي ورى ماتهجدين شياطينك اللي راكبين فوق رأسك اليوم.
أروى:هالحين حنا فاطسين جوع وهي تبي تقزقز.
سديم:بنات إسمعوا وركزوا معي زين.
بشرى:يا ساتر هاتي وش عندك!!
سديم:شوفو باقي على صلاةالفجر ساعتين،،ومحطةالبنزين بالحاره الثانيه ودايم مفتوحه.
فوزيه:طيب المطلوب.
سديم وبحماس شديد: لا أحد يقاطع إلين ما أخلص.
هبوب:كملي تحمست.
سديم:إذا رحنا مشي تأخذ ربع ساعه وإن رحنا بسياره تأخذ عشر دقايق.
أروى:ههههه ياخال أبوي تعال حك ظهري،نفس اللي فسر الماء بالماء وحده أصعب من الثانيه.
سديم وبهدؤ:مافيه شي صعب على سديم،الطريقه الثانيه أسهل،،نسرق سيارة خالي.
سعدى:يالبييييه قدام يسعد قلبك قدام.
كادي وبصرخه:يازينك ياغنم جده عيده أروح أبرك من خبالكم.
هبوب وبصدمه:إركدوا يامجانين.
بشرى:لالا السهر أثر عليكم هذا مفعول المواصل.
معالي: لا والله سعدى وسديم إستلجوا من الجوع.
حمده وطربانه:تنكس وقولو بسم الله على أفكار سدومه وقولوا بسم الله هلا هلا أعطينا وحده ثانيه.
سديم:بنات أنا وسعدى قد هالمغامره.
سعدى وهي ميته وناسه:أنا اللي أسوق وإزهليها.
(البنات قاموا يصارخون وإحتجاجات،،أسماء قعدت تصيح خايفه علينا،،بعد ماطلعت أرواحنا قدرنا نقنعهم،، وطلبنا منهم أهم شي يسلكون لنا السالفه،،لو قعد أحد من أهلنا خاصه جده عيده)
سديم:كادي بسرعه هاتي من غرفة ماجد ثوبين وشماغين.
سعدى وهي بحماس:ههههه سديم وراك نسيتي سروال السنه والفنيله.
سديم وبإستغراب:موب لازم.
معالي وبصوت عالي:هههه يالهبلا راح يبين كل شي.
بشرى:مجانين وما أنتم بصاحين.
أسماء:وه مالت عليكم ما أحبكم ياشريرات.
سعدى:لا أسمع صوتك يا أسماء لا أقطع أوتارك الصوتيه.
سديم:تكفون بسرعه ماعندنا وقت.
سعدى:تعالي وش هي سيارة خالك.
سديم:شاص ماعليك أعرف أسوقها.
سعدى وبحماس:لا هذه سواقتها أسهل شي مايبغالها.
(البنات قعدوا لآخر لحظه يترجون فينا مانسوي هالمغامره المجنونه ،، الموضوع كان عادي لأن المحطه موب بعيده،،أول حاجه سويناها حطينا السياره على الفاضي ودفيناها بعيد شوي عن البيت عشان لا شغلناها يطلع الصوت بعيد عن البيت،،
المهم ركبنا وبدأت أعطي سديم شروطي)
سعدى وبجديه:إسمعي سديم إنتي عارفه إني أثق فيك.
سديم وهي طاقه الصدر:أبشري بعزك.
سعدى:شوفي ياسديم من هاللحظه أنا إسمي سعود.
سديم وبصدمه:نعم وش تهرجين.
سعدى وبإصرار:الواحد مايدري وش يصادف لكن أوعديني قبل لا نمشي لايزل لسانك وتناديني بإسمي ترى السالفه كايده والديره صغيره.
سديم وتحاول تستوعب:مدري ياسعدى ما أوعدك لكن إنشاءالله دقايق وراجعين ماله داعي هالخرابيط.
سعدى وبتحدي:إذا إنتي موب قدها إنزلي من هالحين.
سديم:وش دعوة لو موب قدها كان ما سويتها معك.
سعدى:أجل أوعديني ماتناديني غير سعود.
سديم وبإستغراب:ماطلبت شي يا سعود.
سعدى وبإبتسامه: ياجعلني ما أذوق يومك.

نجد العرب · 2010- 8- 29

سديم:رغم إني موب فاهمه وش الطبخه بس بألتزم على شرط يا سعود.
سعدى:ياروح سعود آمري.
سديم وبلهجه حازمه:إنه من نرجع من المحطه وندخل البيت ماعاد تطرين إسم سعود وتنسين هالإسم خير شر.
سعدى وبضحكه ساخره:ليش عقلي برجولي عشان أستخدمه.
سديم وبتشكك:متأكده.
سعدى وبفخر:أنا سعدى من صلايب وقادة النار،،راعين المراجل مبهرين الهيل،ما أسمي نفسي بغير ما سماني أبوي.
سديم وبفرح:يازين هالهرج،مشينا.
سعدى:ترى ما أدل شي إنتي وريني الطريق.
سديم:أوكيشن.
(مشينا وكان كل شي تمام،، وصلنا المحطه،،بدأت أرتبك شوي لأن المحطه زحمه وسيارات وشباب وعالم داخله طالعه،،بهذيك اللحظه جاني شعور غريب ،،مدري ليش ترددت أنزل،،ما إنتبهت إلا على صوت سديم تنادي)
سديم وبربكه:سعدى وش رأيك نرجع؟
سعدى تحاول تمسك أعصابها: بدأنا شي نكمله يعني نكمله موب سعود اللي يتراجع..
سديم بضحكه واحد مخروش:يوه قسم بالله هالإسم موب لايق عليك.
سعدى:جعل عمره مالاق،خلينا نخلص شغلنا ونمشي.
سديم وبتنهيده: يارب تعدي هالدقايق على خير.
سعدى:بسرعه خلينا ننزل.
سديم:شوفي نبي نأخذ الأغراض بسرعه،،الجبن والخبز عليك وأنا الشيبسات والعصيرات.
سعدى وبحذر:سديم يرحم والديك خليك واثقه لاتجيبين لنا الشبهه.
سديم:بحاول.
سعدى:عادي أهم شي لاتناظرين لأحد.
(قدام سديم أحاول أمسك نفسي وأنا قلبي يرقع من الخوف، أول مره أحس إني أواجه خوفي بهالطريقه،، ماتعودت على جرأه من هالنوع، وقعدت أفكر وش الشي اللي يسوى عشان أجازف كل هالمجازفه ،، تمالكت أعصابي ودخلنا سوبرماركت المحطه،، ياوجع قلبي يوم دخلت ،، مركز كبير ومزحوم ،، من كثر ماكنت أرجف تخيلت إن كل الناس يطالعون.
(هههه هذا اللي على رأسه بطحاء>
حاولت أكابر قدام سديم إني مسيطره على الموقف،، بحركه سريعه جمعنا أغراضنا ووقفنا عند الكاشير،، وحنا ننتظر دورنا أطالع لسديم مدري وش فيها كان وجهها مصفوق وخنقتها العبره،، مدري وش فيها،، دقيتها مع كتفها اسألها وش فيها ماردت،، أنا هنا وقف قلبي ودعيت ربي يستر علينا لا ننفضح،
سعدى:هيه وش بك.
سديم وبكلمات متقاطعه:
س ع و د
سعدى وبربكه: تكفين إمسكي أعصابك إلين مانطلع.
سديم وبوجه قالب عشر ألوان: طالع اللي واقف وراي بالضبط.
سعدى: من ما أعرف أحد.
سديم: هذا مصعب.
سعدى وبإستغراب:وش يطلع هذا بعد.
سديم وبصوت مخنوق:بسرعه خلنا نطلع إدفع الحساب تكفى يا سعود.
سعدى مستعجله:طيب طيب.
(فعلا إقتحمت الناس بدون شعور وقطيت الحساب ومشينا وقعدنا نركض بطريقه بغينا نفضح أنفسنا،، ركبنا بسرعه وسحبت جلنط قوي لدرجة إن الناس قعدوا يطالعون.
سديم بصراخ: تكفين بسرعه قبل لايطلع مصعب.
سعدى بتوتر:خلاص لاتصارخين ترى رأسي منفك.
(هذا الموقف حقيقي وقد حدث لفتاتين خرجتا من قريتهما إلى المدينه والتي تبعد 50كم وتكللت مهمتهما بالنجاح)
سديم قعدت تشرب من الماء بطريقه هستيريه وحاولت أهديها.
سعدى: وش بلاك يامال الخرعه اللي تخرع العدو.
سديم:تدرين من هذا؟
سعدى:وش دراني!
سديم:هذا مصعب زوج أمي،، وهو موب عايش معانا،، عايش مع زوجته وعياله،،ياسعدى هذا وكالة الأنباء بديرتنا ولو شاف شاص خالي لا يقعد يستنزل علينا ويسوي مسح شامل إلين ماينكبنا.
سعدى:هههه ورى مايشغلونه بالمباحث.
سديم وبنفس عميق: ههههه أصلا المباحث تبرأت منه، فضيحه هالآدمي بشكل موب طبيعي.
سعدى:حرام عليك وقفتي قلبي لو أدري إن السالفه كذا كان ماتعجلت.
سديم:أقول إحمدي ربك اللي فكنا من شره.
(كملنا طريقنا وحنا نمشي شهقت سديم ،،لعنبو دارها شهقاتها تجلط القلب.)
سعدى: وجع توجع قلبتس إنتي وهالشهقه اللي تمصع العروق.
سديم وبربكه: سعود مدري سعدى وش هالطريق اللي حنا فيه.
سعدى وبإستغراب:خير وش تقولين، موب ذا الشارع اللي جينا منه.
سديم وقد لطمت وجهها: حسبي الله على العدو، هذا شارع حارة السلام.
سعدى وبفهاوه:السلام والا الحرب ماعلينا أهم شي يودينا لبيتنا.

نجد العرب · 2010- 8- 29

سديم:ياجعل رأسك يدور ولا يقعد، هذا يطلعنا على الشارع العام.
سعدى وببرود: طيب ونروح مع الشارع العام وين المشكله.
سديم وهي معصبه: إنتي هبلا وألا تستهبلين، الشارع العام أمة محمد هناك وإحتمال يكون فيه دوريه مناوبه والله لا نأكل تبن.
سعدى ورايقه: أما دوريه يلعن أم الشربكه ، تخيلي إننا موقفين بالسجن ههههه.
سديم:أكرمينا بسكوتك،وفكري من وين نطلع.
سعدى وبإنبساط:طيب ورى ماندخل مع ذاك الشارع الفرعي يمكن يرجعنا لطريقنا.
سديم وبتردد:بس أنا ما أدل مع طرق فرعيه.
سعدى وبسخريه:وش ورانا ندخل ونجرب وإن ما ضبط الحظ معنا مسكنا خط ثاني.
سديم:سعدى لاترفعين ضغطي موب وقت دلاخه وإستخفاف دم.
سعدى:وش تبين أسوي أقعد أصيح وألا نوقف نص الطريق، هالحين حنا ضايعين،،وقدامنا خيارين تبغينهم وألا إنطقي.
(سديم وقد إعتلاها الصمت والخوف)
سعدى وبإصرار:شوفي يابنت الأجواد،،يا نمسك الطريق العام ويصيدوننا الدوريه ونكمل سهرتنا عندهم بالجناح الفخم أو نمسك أي شارع فرعي،،ترى ما معنا وقت ماعاد باقي على صلاة الفجر إلا ساعه،، هاه وش قولتك؟
سديم وبيأس: اللي تبين سوي.
(وقتها ماكان قدامنا أي خيار إلا إننا نمسك الطريق الفرعي،، وهذا الشارع يدخلنا بالحواري،،دخلنا مع طريق فرعي وكان شوي مظلم مافيه إلا أضواء صفرا خفيفه،،نشبنا بهالحاره وإضطريت إني أوقف عشان سديم تحاول تتعرف على هالحاره،،وحنا وين؟!!
بس المصيبه الجو ما يساعد والإضاءه موب عاليه،،فجأه وحنا واقفين،،، طق قزاز السياره اللي من جهة سديم،، يا إن الدم وقف بوسط عروقي،، أول ماناظرنا على الدريشه إلا فيه واحد قاعد يطق،، يمممماه ياشكله كأنه شيطان مقعد،،أسنان منكسره وملابسه راااااايحه فيها،، طلع أبو الشباب سكران،،كسر الدريشه وهو يطق علينا،،
بدون شعور قعدت أضحك بهستره،، هذه أول مره بحياتي أشوف سكران بعمري كلها ماشفت أحد مسبك دايم أسمع عن خششهم ولا قد شفتهم،، سديم قامت تناظر له وتصيح،، أول ماسمعت صياح سديم إستوعت إن الموضوع موب هالبساطه ،، هذه سديم وتصيح مصيبه وطامه ،،حطيت يديني على الدريكسون وأسحب ذاك الجلنط.
(مقرود هالكفر اللي طاح بين يدينك ياسعدى)
وصلنا إلى مسجد كبير مرتبط بشارع فرعي ثاني.
أول مادخلنا حول المسجد قامت سديم تصارخ.
سعدى وبحسره:كم مره قلت لتس يامال الصمخ لاتصارخين.
سديم:تكفى ياسعود شفت ذاك البيت البيج.
سعدى:وش فيه؟!
سديم وبفرحه غامره:روح من ورى المسجد وأمسك نفس الشارع إلين مانوقف بالحاره الثانيه.
سعدى:وراه.
سديم:ياغبي قصدي ياغبيه بيتنا بنهاية هذا الشارع.
(من قالت كذا سديم وأنا أدعس البنزين وأجي طايره،، أويلاه يافرحة قلبي يوم شفت بيت خوالي،، كأني رجعت للحياة من جديد،، وقفنا السياره قدام باب الحريم ونسينا أصلن إن خالي دايم يوقفها عند باب الرجال،، دخلنا بسرعه والبنات كلهم قاعدين بالحوش يحتروننا ،، أنا وسديم رمينا الأغراض عليهم وركضنا للغرفه،،البنات ورانا يبون يعرفون وش صار معنا ،،لكن أنا وسديم ماأعطيناهم وجه ،،ودخلنا الغرفه ومن زود الإرهاق والخوف كل وحده قطتها نفسها على فراشها ونامت،،
،
،
>تقريبا في حزةالظهر من بكرا>
دف،،دف،،دف
الجده عيده:سعدى ياعل من لامني فيك يبتلى بك قولي آمين.
(سعدى غاطه بسابع نومه)
جده عيده:قومي قامت شياطينك حتى الصلاة ياكافي ماتصلين.
سعدى وهي تغطي رأسها: عيدوه يرحم أمك وخري قسم إني منتهي وميت تعب.
<ههههه الظاهرللحين عايشه دور سعود>
جده عيده وبصراخ:وش تهرجين الله لايخزينا إيه أدري فيتس تبين تصير ولد وعيباه،،قومي نومة النهار ماتجيب إلا الكوابيس.
سعدى وهي فيها نوم تتوسل: جده الله يخليك لو تركتيني أكمل نومتي قسم لأصير خويتك إلين مايسدحونك بالقبر.
جده عيده: سدحوك إنتي واللي جنبك ،،،يارب تجيرنا من عذاب القبر قومي صلي يا عوبا.
سديم وهي ميته تعب:جده حنا صلينا.
جده عيده: أويلاه ياكذوبات،، قدامي بعد،، ماتخافن من ربكن.
سديم وبيأس: سعدوه شوفي حل مع جدتك.
سعدى وقد غشاها النوم: يوم النحس يوم إنها صارت جدتي .
(إختفى صوت جده عيده وماندري وين راحت،،وإستغربت موب من عوايدها تتنازل بسرعه ،،معقوله رحمتنا وخلتنا نكمل نومتنا ياالله مره إنبسطت،، يالبيييه ياعيدوه وأخيرن سويتي موقف حلو أذكرك فيه،، غطيت رأسي بالبطانيه وأنا موب مصدقه وناسه،، لكن للأسف دقيقتين بالضبط إلا وذاك اللي سحب البطانيه وجرها من رأسي جر،،وما دريت إلا طاسة ماء إنكبت فوق وجهي)
سعدى:وجع توجع العدو الظالم.
الجده عيده: تستاهلين ،،كل شي عندي ولا الصلاة،،إذا الواحد نسى الصلاة هو والحمار واحد.
سعدى وبعصبيه:حمار يرفس العدو ،،عيدوه والله لأردها لك.
الجده عيده وبضحكه:وش بتسوين ياوجه القاري.
سعدى:شوفي يامره لو ماطلعتي هالحين ترى ماتلومين إلا نفسك.

نجد العرب · 2010- 8- 29

الجده عيده وببرودة أعصاب: بنات هالجيل فاصخات الحياء.
(خرجت الجده عيده وما كأنها سوت شي)
سديم فاطسه ضحك:سعود قصدي سعدى الظاهر يومك أقشر من بدايته.
سعدى:والله ما أخليها وما أكون سعدى لو ما رديتها لعجوز الخيش.
سديم:أقول قومي خلينا نصلي شكر لله على إننا إنسترنا البارح.
سعدى وهي على فراشها تناظر للسقف:تصدقين سديم للحين موب مصدقه إني سويتها.
سديم:ههههه والله إننا خبول ومهابيل.
سعدى وبإبتسامه:ما عاد أسويها ياسديم مره ثانيه لو على جثتي.
سديم:ههههه أنا بنسى كل شي ولاعاد أمسك دريكسون أبد.

2010- 8- 29	#2
نجد العرب أكـاديـمـي نــشـط الملف الشخصي: رقم العضوية : 51212 تاريخ التسجيل: Mon Apr 2010 المشاركات: 140 الـجنــس : أنـثـى عدد الـنقـاط : 93 مؤشر المستوى: 58 بيانات الطالب: الكلية: كلية التربيه (الشرقيه) الدراسة: انتظام التخصص: إبتعاث إلى المجهول!!! المستوى: المستوى الثامن	رد: رواية/ سعدى شقرديه ماتهاب و عربجيه غير عن كل البنات < الفصل الثاني> حصه تؤامي وهي الإنسانه الوحيده اللي فاهمتني ،أبيع الدنيا علشانها،صديقتي وأختي اللي ماجابتها أمي،حصه هي جوي الرايق،وأغلى إنسانه ممكن أضحي لعيونها,,صداقتنا من زمان أيام الإبتدائي وللحين حتى عقب ما تخرجنا من الكليه<<العام حصه وسعدى تخرجو>>,,،حصه موقعها من العائله تصير بنت عم أبوي ،لكن للأسف إرتباطات العائله بعض الأحيان تفرض علينا إننا نفترق ،مثل اللي صار لنا بإجازة هالصيف،قرر أبوي إن خوالنا لهم حق منا ولازم نقضي ولو صيفيه وحده عندهم ينقالك من باب الوصل=>(إيه هين ولاجينا الصدق ماعنده سالفه) المهم أنا مره تضايقت إنه حصه موب معي واللي قهرني بزيادة وقلب وناستي إنه جدتي عيده نشبت تبي تروح معنا،تبي تشوف عيالها وبناتها اللي يصيرون خوالي وخالاتي=>(أنا اللي مالي دخل أحسها نشبه) حصه:ياسعدى تحمليها صحيح لسانها طويل بس قلبها طيب. سعدى:والله ما مصبرني غيرك هالحين إنتي موب معي وهي تبي تلزق فيني. حصه:امممم طيب عندي لك خبر يمكن يخليك تتحملينها شوي. سعدى وحاطه رجوله فوق الكنب:أقول هذه مايريحني منها غير ربي. حصه:أبوي وافق إننا نكمل نص الإجازه عندكم هناك بالقصيم. سعدى نطت من الوناسه:قولي قسم. حصه:والله أبوي وعدنا نص الإجازه هنا وآخرها هناك . سعدى:لا صاير بالدنيا شي أبوك ذا الطعس المحجر غير رأيه غريبه. حصه وبضحكه:لاتصكينه عين هذه من المعجزات بس شكله ناوي يشتري عقار هناك. سعدى:إيه قولي كذا من أول،أبوك ماخشته خشة وصل رحم. حصه وبإبتسامه:ماعلينا ،تكفين لا تنسين موضوع منصور. سعدى: لاحول ياليتني منصور. حصه:يخسي إنتي أغلى منه،لكن خبرك القلب شوي يميل له. سعدى وبنظرات تشكك:هههه إذا كل هذا شوي أجل الكبير وش يطلع. حصه:ياعساني ما إنحرم منك ياسعدى والله مدري كيف أقضي الأيام بدونك. سعدى:عادي نامي وقومي وإرجعي نامي وفجأه تلقين الأيام قضت. حصه:يصير خير،بنشوف من اللي يصبر عن الثاني. سعدى :طيب نشوف. حصه:إلا تعالي خلاص جهزتي نفسك. سعدى:وش أجهز نفسي فيه كلها كم بنطلون وبلوزه وخلصنا. حصه وبإستغراب:بناطيل وعند خوالك والله لا يخلونك ماتسوين قرش. سعدى وببرودة أعصاب:بالطقاق مايهمني. حصه:تكفين ما أوصيك ماله داعي طولة لسان ومشاكل مع خلق الله. سعدى:شوفي أنا بجنب المشاكل لكن قسم بالله اللي يتحرش فيني لا ألعن خيره. حصه:محد جايك لكن دخيلك خلي إجازتك تعدي على خير. سعدى وبتهكم: إيه يصير خير. حصه:وش قصدك. سعدى:والله ياحصه إنتي أدرى المشاكل تبلاني بلوى وتحاذف من كل صوب،تعودت على الوضع وصار موب غريب. حصه وتحاول تلطف الجو:أهم شي لاتسوين فيلم هندي وتسوين قصة حب مع عيال خوالك. سعدى وبنظرات خز:حصه عن السوالف وهالخرابيط. حصه :يممماه خلاص أعوذ بالله حتى مايمزح معك الواحد. سعدى:الزبدة قولي لأبوك هالطعس إنك بتنامين عندي الليله. حصه:صعبه والله ما أقدر تعرفين أبوي. سعدى:ياليل البعارين والله لو إنه أبوي كان من زمان قضيت عليه. حصه:هههههه ترى أبوي حبيب بس هالسوالف ماتمشي عنده. سعدى:الله وأكبر اللي يسمعك يقول نايمه بالشارع،حاولي فيه علشاني. حصه وبنذاله:يعني لهدرجه ودك أقعد عندك. سعدى وبربشه:مالت عليك إنتي وأبوك،تبين تنامين تعالي ،ماتبين فارقي. حصه وبضحكه:والله أدري إنك ميته تبيني أنام عندك بس خلاص عقب هرجك موب قاعده عندك. سعدى وبكبرياء:كيفك بس أنا ودي إنك تغيرين جو وبعدين ياحصه أعرفك ماتقدرين تستغنين عني عشان كذا قلت أهجدي عندنا. حصه:سعدى ربي يخليك ياأغلى أخت بالدنيا أموت حتى على كبرياءك. سعدى:ولامنك يالغاليه. حصه:إيه صح بعطيك شي. سعدى وهي ناطه من الوناسه:الله وشو؟ حصه:ورى ماتقضبين القاع،إصبري. (طلعت حصه من شنطتها عطر مس ديور ونزلته قدام سعدى) سعدى وهي منصدمه وبشهقه: ياه ياحصه وش علمك علي الليله تقلبين المواجع. حصه:يختي ودي تأخذين شي معك يذكرك بمواقفنا الهبلا. سعدى متأثره:ياليتني أقدر أنساك عشان أذكرك،يارب ياحصوص يحقق لك كل اللي تبين ويزوجك صرصوره قصدي منصوروه. حصه:لاتغلطين عليه مسكين ما يستاهل. سعدى:آه والله لو لا إختلاف الأذواق كان ماصار لمنصور سوق والا من زين هالحلايا. حصه:والله لو تشوفينه يطيح الطير من السماء. سعدى:ربي راحمني إني ماشفته. حصه:سعدى بتصل في أبوي أقنعه أنام عندك قبل لاتسافرين. سعدى نطت من الفرحه:بسرعه تكفين. (حصه إتصلت على أبوها وإستأذنت منه إنها تنام عندي،،وافق أبوها بعد مانشف ريقنا، كانت أجمل لحظات حياتي حصوه تنام عندي)

2010- 8- 29	#3
نجد العرب أكـاديـمـي نــشـط الملف الشخصي: رقم العضوية : 51212 تاريخ التسجيل: Mon Apr 2010 المشاركات: 140 الـجنــس : أنـثـى عدد الـنقـاط : 93 مؤشر المستوى: 58 بيانات الطالب: الكلية: كلية التربيه (الشرقيه) الدراسة: انتظام التخصص: إبتعاث إلى المجهول!!! المستوى: المستوى الثامن	رد: رواية/ سعدى شقرديه ماتهاب و عربجيه غير عن كل البنات (( الفصــل الثالث.)) ياهوووووه ياعالم إخلصوا،يا سعدى، يافوزيه،إخلصوا ،،ياخاله عيده ترى موعد الإقلاع قرب. سعدى:يبه والله إني من البارح وأنا قاضيه شغلي بس عيدوه للحين ماقضت. أبوسعدى:عيب إستحي يابنت إحترمي جدتك. (سعدى قامت تركض ووقفت عند الدرج،عيده ياعيدوه ياجده بسرعه إخلصي والله لو فات موعد الرحله والله لاتصير علوم وسوالف) الجده عيده:وماحي يمحى العدو من على وجه الأرض،إسكتي خبصتينن. سعدى:ياجده تكفين بسرعه. الجده عيده وتمشي بتثاقل:هذاني جيت ياعل العدو مايجي هاك إقضبي كيسي. سعدى وهي حاطه يدها على خشمها:ووووع وش هالزباله اللي معك. الجده عيده:وش زبالته،الشرهه موب عليك على اللي ماعلمك أدويتنا. سعدى وهي مخنوقه من قوة الرائحه:ياعيده تكفين وشو هذا؟ الجده عيده:هذا وأنا أمك مره وحلتيته عن البرد،وعنزروت يعطي مناعه وشوي رشاد. سعدى وبصراخ:الله يرحم أبوك وأمك اللي في قبورهم لاتفضحيننا. الجده عيده:وراه. سعدى:إنتي ناويه العالم تهج،،تكفين والله لأشتري لك من مصروفي الخاص وأوديك لأحسن عطار بس فكينا من هالقرف. الجده عيده:حسبي الله ونعم الوكيل وش عرفك بهالأدويه،هذه بإذن الله تحمينا من كل مرض. سعدى وبنفاذ صبر:ياجعلني أموت بس لاتأخذين هالكيس وتفشلينا. أبوسعدى داخل طاير:إخلصوا بسرعه ترى والله لا أحرك،مابقى على الإقلاع شي. الجده عيده:إسكت جينا أعوذ بالله من شرك إنت وبنتك. (سعدى وقد أخذت كيس الأدويه وحذفته بأقرب زباله بالبيت،والجده عيده ماغير تدعي عليها) (هههه بعذرها تدعي عليها ماتنلام المسكينه أخذت أعز شي عندها) ((( بالطيــــــــــــــاره)) من قرادة حظي اللي ملاحقتني بكل مكان أبوي وجدتي على نفس المقاعد،وأنا وأختي فوزيه مع بعض..بيني وبين مقعد أبوي وجدتي يمكن مقعدين وطبعا استأنست بالحيل إني خلاص بفتك من إزعاجها لو ساعه على الأقل. فجأه أسمع صراخ ماهوب غريب،، (الجده عيده تنادي سعدى على بعد كرسيين) :يا سعدى تعالي وديني الحمام. سعدى ومن هول الصدمه:أويلاه فضحتنا عجوز الخيش. فوزيه ميته ضحك:عادي هو فيه أحد يعرفنا هنا مامن خلاف. سعدى والشياطين ركبتها:ذا اللي جنبها وراه ساكت ورى مايوديها للحمام. فوزيه فقعت ضحك:أبوي خلف الله عليه مستانس عليها. سعدى وقد قامت من كرسيها بسيل عارم من الغضب: يستانس مع نفسه موب يفضحوننا،الطياره كلهم عرفوني سعدى ورايحه للقصيم. الجده عيده بصراخ:ياسعدى وين الحمام. سعدى:خلاص إهجدي بوديك للحمام وبقعدك فيه إلين ماننزل. الجده عيده:وخزياه وش أعمل بالحمام . سعدى فاقده أعصابها:وش دراني عنك ،يارب صبرني. (مواقف جدتي عيده بالطياره تفشل وأحمد ربي إني متغطيه وألا كان مت من القهر والفشيله،،والموقف اللي مستحيل أنساه وبغيت أصيح من الصدمه،،،قبل ننزل من الطياره أصرت جدتي عيده إلاتشوف كابتن الطياره،،حاولنا نقنعها إن هالشي صعب لكنها عندت ومارضت إلا تبي تشوف الطيار وقعدت تصارخ،،طبعا الكابتن ماقصر من سمع صراخها جاء،،أثريها كانت تبي تعطيه فلوس خدمة التوصيل على بالها إن الطياره زي التاكسي=>قسم إنها حوطيه. أنا هنا دوروني طحت بهدومي من الفشيله،نزلت على وجهي مدري وين الله قاطني بس ما أبي أحد يشوفها جنبي. وصلنا مطار القصيم ،وقعدنا بصالة الإنتظار نحتري أي واحد من عيال خوالي يجي ويأخذنا، أثناء الإنتظار قعدنا نسولف أنا وأختي فوزيه. فوزيه:سعدى توقعين بنات خوالي شينات. سعدى:إحلفي بالله عليك تستهبلين وأنا وش دراني علمي علمك. فوزيه وبتنهيده:إيه والله صح خبرنا فيهم أيام المتوسط يوم إن أمي معانا. سعدى وبعد صمت طويل:شوفي فوزيه أنا ماراح أهرج معاهن،،وأبي أسوي حزب لحالي،ياويلهن إن قربن صوبي والله لا أترفس في بطونهن. فوزيه وبإستغراب:ما أسرع ماطلعت اللهجه أمدانا. سعدى وبتفكير:لا جد فوزيه أنا مالي خلق نظرات مالها داعي. فوزيه:موب قايله لك طولي شعرك وخففي من هالزحف اللي عندك شوي. سعدى:شوفي عاد لا أسمع طاري هالموضوع وصكيه،كم مره تناقشنا بهالشي،لوعتي كبدي زي عيدوه. فوزيه: هههه إنتبهي لألفاظك ماله داعي مطبات. سعدى:اللي عاجبه خير وبركه واللي موب عاجبه يختار أي جدار يصقع رأسه فيه. فوزيه فجأه نطت من كرسيها: أويلاه وش هالزين اللي يسلم على أبوي. سعدى وبلا مبالاة: أي زين ما أشوف قدامي إلا بس مطاعم. فوزيه:حرام عليك كل هالزين وآخرتها بس مطاعم،والله ماتشوفين يالخبله. جده عيده بصالة الإنتظار وبصوت جهور:يا الله إنك تحفظك يالغالي، يازين القمر اللي لفانا. سعدى وبداخل نفسها:لا وبعد ويقولون من وين جبت العربجه والله إني أجسد النعومه قدام عيدوه هي وصوتها اللي كأنه مكبرات مسرح. فوزيه بلقافه:جده من هذا؟ جده عيده وهي تناظر لسعدى بمكر:إيه هذا الغالي منصور ياعلني ماخلا من شوفته. (منصور شاب وسيم،ومن كثر ماهو جميل تشك إنه بنت لابس عقال وشماغ،أبيض البشره متوسط الطول، وعيونه وساع) سعدى وبصدمه:هذا منصوروه. جده عيده وبدهاء:إيه والله لو إنك بنت سنعه كان خطبتك له من زمان.،،منصور كل بنت تتمنى شوفته. سعدى وقد فقدت أعصابها:مالت عليه وعلى اللي جابه ذا هو ووجه موب من زينه. فوزيه:قصري صوتك فضحتينا. سعدى وبداخلها: هالحين هذا اللي صجتنا فيه حصه،،ورجال ومدري وش وآخرتها بشرته أنعم من بشرتي. (سعدى،،،سعدى،،يا أبوي وين وصلتي) سعدى:هلا هلا سم ياعيونها. أبوسعدى:وين وصلتي خلينا نسري خوالك يحتروننا. سعدى:يله قدام. أبوسعدى:سعدى ياأبوي عن بعض الهرج اللي ماله سنع. سعدى:لا حول وش قلت خلاص لا أحد يكلمني. (كملنا طريقنا بسيارة منصور وأنا ساكتة طول الوقت أفكر بالناس اللي خبري فيهم من زمان تغيروا وألا هم على خبري،كيف بتعامل معاهم،لا وزودن على هذا أخيرا شفت منصوراللي ميته عليه حصيص) طرآآآآخ>>صوت باب السياره مصفوق، جده عيده: واه ياحر تسبدي على ديرتي.(باللهجةالنجديه وتعني كبدي) . فوزيه:ياجده هذا وإنتي كل سنة منقعه هنا ياكافي. منصور وبلقافه:إلا وش رأيك ياسعدى بديرتنا؟ (سعدى تناظر لمنصور بتعجب ودارت ظهرها ماردت عليه،هنا منصور إنحرج بقوة وصار وجهه كأنه طماطه) فوزيه:سعدى ورى مارديتي عليه موب عيب عليك. سعدى وبإنفعال:موب قايله لكم لا أحد يهرج معي،،خير هو وجهه ناوي يقط الميانه من أولها. فوزيه وبتنهيده:وه بس يازين ميانة هالزين يازينها،أحد يحصل له هالقمر يهرج معاه. سعدى:هيه بنت عن ملاغةالكلام وياويلك إن حطيتي منصور برأسك. فوزيه :سلامات الظاهر إنتي ناويه عليه. سعدى وبنرفزه:فوزيه إنتي أختي وتدرين ماعندي هالخرابيط وآخر واحد ممكن أفكر فيه منصور. فوزيه:ليش طيب. سعدى وخربتها:فوزيه تذكرين منصور اللي دايم حصه تسولف عنه قدامنا. فوزيه:إيه وش به؟؟. سعدى:هذا هو منصور اللي تحبه حصه،خلاص إرتحتي. فوزيه وبصدمه:قولي قسم. سعدى:إحلفي ياشيخه ،كبرك أنا أمزح معك. فوزيه:من عذر البنت لو إنهبلت ياويل قلبي يجنن. سعدى:أقول إهجدي وخلينا ندخل نسلم ونفتك.

2010- 8- 29	#4
نجد العرب أكـاديـمـي نــشـط الملف الشخصي: رقم العضوية : 51212 تاريخ التسجيل: Mon Apr 2010 المشاركات: 140 الـجنــس : أنـثـى عدد الـنقـاط : 93 مؤشر المستوى: 58 بيانات الطالب: الكلية: كلية التربيه (الشرقيه) الدراسة: انتظام التخصص: إبتعاث إلى المجهول!!! المستوى: المستوى الثامن	رد: رواية/ سعدى شقرديه ماتهاب و عربجيه غير عن كل البنات << الفصل الرابع>> <في مجلس خالتي رقيه> ياهو مجلس كبير،تحس كأنك قاعد بقاعة مؤتمرات موب مجلس،،طبعا خالتي رقيه هي أكبر خالاتي ودايم بالصيفيه العالم تجتمع عندها لأن بيتها مره كبير وغرف إستقبال الضيوف واجد. بعد ماخلصنا حركات السلام والأشياءات اللي مالها داعي قعدت اتأمل خالاتي وبنات خالاتي،،الحريم الكبار كانوا قاعدين بصدارةالمجلس والبنات بالطرف،،وبصراحه قهروني بنات خالاتي من جينا وهم بس يضحكون لدرجة إني شكيت بنفسي مدري وش بلاهم،،حقدت عليهم بزيادة وقررت إني أسحب عليهم سيفون وخل وحده تهرج معي. شوي وتجي بنت خالتي إسمها سديم أقبلت لمي أنا وفوزيه،،وأنا بداخل نفسي أقول يالليل النشبات وش تبي ذي بعد. (سديم هي العضو الفعال بقروب البنات،والعقل المدبر ،جرئيه وتقريبا أكثر وحده تشبه تصرفاتي،حلوه وموب مره بيضا،جسمها متناسق وجذابه) سديم:يا الله إنك تحيي من جانا. <سعدى ببرود طنشت سديم وقامت تلعب بجوالها> فوزيه وبإسفهلال:هلابك زود. سديم:عسى ماتعبتوا. <سعدى وبداخل نفسها إلا بغينا ننجلط من عيدوه فضحتنا> فوزيه وبسخريه:لا الحمدالله كل شي تمام خاصه كابتن الطياره. سديم قامت تضحك:وش معنى يعني. سعدى خزت فوزيه:أقول إنطقي ولاتجيبين سيرة الموضوع. سديم:بنات وش رأيكم نروح للشله وأعرفكم عليهم. فوزيه بحماس:يله. سعدى:والله اللي يبيني يجيني. (سديم وفوزيه يناظرون لسعدى بإستغراب ،،فجأه بصراخ فجر كل الهدو قامت سديم تنادي بنات خالاتي يجون،بصراحه إستغربت من موقفها وإستغربت إنها ماتنرفزت من إسلوبي،أعجبتني حركتها،،بإشاره من سديم جاء الشعب كله ،،بنات خالاتي جو يركضون ماصدقوا على الله أحد يناديهم. قامت كل وحده تعطيني تقرير كامل عن حياتها،،ياربيييه فيهم لقافه تطلع الجن من مكانه. <هيه هيه سعدى،فوزيه ماتخبروني أن معالي اللي بس بالشوارع مسنتره 24 ساعه.> فوزيه تضحك:ما أخبر إلا كشتك اللي كأنها نعيميه. (سعدى طول الوقت ساكته وتناظر لهم بإستغراب تحسهم مهابيل) معالي:يقطع شرك يافوزيه،الزبده تدرسون ماتدرسون،أعرستوا ما أعرستوا وش الدنيا بكم؟ <سعدى وبداخل نفسها:يلعن أم اللقافه اللي عليهم> فوزيه:أنا ثالث كليه وسعدى تخرجت العام. معالي:وناسه أجل أنا وإنتي ربع،أنا بعد ثالث لكن لاجينا الصدق أمغط السنه بسنتين. (معالي هي ملح الجلسه، والمساعد الأول للعمليات النتفيذيه،جسمها مليان لكنها موب سمينه،تموت على القز وتخق على الكلام الحلو) فوزيه:يعني إنتي من جنبها. <ضحكوا البنات> أنا إستغربت منهم على كل شي يضحكون لو تقولين السلام عليكم تسدحوا ضحك. سديم:سعدى،فوزيه بعرفكم على البنات. هذه هبوب بنت خالتي نوره متخرجه من سنتين<هبوب فيها سمار وملح يضيع علوم الواحد،شعرها موب مره طويل لونه أسود فاحم،محد يمل لاناظر لها جذابه بمعنى الكلمه> اللي جنبها لابسه أورنج بنت أختها وإسمها أسماء وهذه خكرية العائله وتدرس بأول كليه<يممماه نعومةهالبنت تقطع بعض،،ودلوعه ترفع الضغط ،تسحب الكلام سحب بغنج،،بصراحه يحق لها لأنها حلوه ونعومه بقوة> أما الثنتين اللي ناشبين في بعض أروى وحمده يدرسون بثالث ثانوي واللي قاعده يسارهم ولابسه تفاحي هذه فيلسوف الشله بشرى برابع كليه،،و كادي اللي على الطرف. معالي:لا والله وإنتي الصادقه لحوج وتجمعنا. (سعدى تناظر للبنات وتحكي مع نفسها: إخس والله إنهم زاحفين) بشرى:إلا يا سعدى ورى ماتهرجين معنا. سعدى:إنتم أكلتوا الواحد بقشوره حتى مايدري وش يقول. كادي:هههههه إذا تحترين دورك ما يمديك مانعطي مجال. معالي:إيه والله حنا مصرقعين وتعودنا على الصرقعه. أسماء وبدلع:رجاء خاص كل واحد يتكلم عن نفسه. سديم:ياليل تكلمت خكريتنا. أروى:أسماء ترى ما أداني صوتك ياكرهي للغنج الزايد. سعدى وهي كاتمه الضحكه: مثلي ما أحب هالأشكال. أروى:بنات وش رأيكم نرقص! (هنا أنا فقعت ضحك،البنات رجه ومصرقعات بشكل موب طبيعي) حمده:أيوه ورى ورى تنكس،فيكم طرب أيوه،فيكم وناسه أيوه. (حمده رقاصة العايله،شوي دبدوبه وبيضاء،تعشق الرقص وطموحها تصير مدربة رقص) سعدى وبصوت عالي:هههههههه قسم بالله إنكم زجفيشن. (البنات قعدوا يناظرون لسعدى مستغربين أخيرا ضحكت،، يوم شافوها كذا فقعوا ضحك) سعدى:يله بنات خلونا نهيص. رحنا للغرفه الثانيه وإستهبلنا إستهبال بحياتي ماسويته،،ماتوقعتهم كذا،،المهم مر على قعدتنا إسبوع ونص،،البنات بصراحه دخلوا مزاجي،،وجوهم صار جوي،، ،حبيتهم وحبوني،،حسيت كأني عايشه معاهم من سنين،، طول وقتنا روقان في روقان ،،وشعارنا الدائم طنش تعش وشوف كيف راح تنتعش،، كل شي غير مع هالبنات ،إحساس ثاني،صدق وطهاره بقلوبهم وأحلى حاجه قبلوني كما أنا بستايلي وشكلي وتصرفاتي. أطرف موقف مر علينا ومستحيل أتصور بلحظه إني فعلا قدرت أسوي هالشي،،موقفنا مع المطعم بذيك الليله المنحوسه.

2010- 8- 29	#5
نجد العرب أكـاديـمـي نــشـط الملف الشخصي: رقم العضوية : 51212 تاريخ التسجيل: Mon Apr 2010 المشاركات: 140 الـجنــس : أنـثـى عدد الـنقـاط : 93 مؤشر المستوى: 58 بيانات الطالب: الكلية: كلية التربيه (الشرقيه) الدراسة: انتظام التخصص: إبتعاث إلى المجهول!!! المستوى: المستوى الثامن	رد: رواية/ سعدى شقرديه ماتهاب و عربجيه غير عن كل البنات ونكمل الجزء الخامس..........

2010- 8- 29	#6
نجد العرب أكـاديـمـي نــشـط الملف الشخصي: رقم العضوية : 51212 تاريخ التسجيل: Mon Apr 2010 المشاركات: 140 الـجنــس : أنـثـى عدد الـنقـاط : 93 مؤشر المستوى: 58 بيانات الطالب: الكلية: كلية التربيه (الشرقيه) الدراسة: انتظام التخصص: إبتعاث إلى المجهول!!! المستوى: المستوى الثامن	رد: رواية/ سعدى شقرديه ماتهاب و عربجيه غير عن كل البنات 0 <<الفصل الخامس.>> بذيك الليله كنا سهرانين سديم وهبوب وأسما ومعالي والمصرقعات حمده وأروى وكادي وبشرى،،ومع أختي فوزيه،،قعدنا نستهبل ونرقص وفطسنا من الجوع،،يعني حياتنا حياة عزابيه والله ما كأننا بنات،،هبوب وأسماء قعدوا يحوسون يدورون شي بالمطبخ ماحصلوا شي ،،والمصيبه كلنا دلوخ ولا وحده لها خلق تصير مره سنعه وتطبخ لنا شي،،قعدنا نفكر و نحوس بالدروج كأننا فيران مخازن وماحصلنا حاجه سريعة التحضير،،أخيرا وصلنا لفكره،جمعنا قطيه اللي معها ريالين واللي معها خمسه واللي مطفره على الحديده إلين وصلت القطيه 25 ريال. <أمحق من قطيه هههههه> هذا كان على وجه الفجر ويمكن باقي على أذآن الفجر ساعتين،،دقت معالي على مطعم الشاميات،،طبعا معالي تخق على الصوت لو كان صوت دجاجه مفغوصه ،،المهم رد عليها واحد لبناني، طوط_طوط_طوط معالي:ألو المطعم:أهلين وسهلين شو محلا هالصبحيه. معالي بربكه:ممكن لو سمحت نطلب. المطعم:تكرم عيونك الحلوين. معالي أبعدت السماعه عنها وبشهقه:أويلاه يابنات يقول عيوني حلوه. سعدى خشت عرض:أقول لايهايط واجد إخلصو علينا. معالي:لو سمحت نبي لبنه بالزيتون. المطعم:كرمال عيونك بصير لك لبنه ياأحلى زيتونه. معالي وبربكه أكثر من اللي قبل:يمه يمه ياحرارة تسبدي يازين هرجك يمه ياقلبي. (سعدى هنا طنقرت وسحبت التيلفون من معالي) سعدى وبهواش:إسمع هات جبن و... المطعم:ولك العمى شو هالصوت اللي عم يهز البدن. سعدى:عمى تعمي عيونك. المطعم:يا آنسه شو بنا؟ سعدى وقافله معها الأخلاق: بنا وألا هدم ماهيب شغلتك،،تبي تسجل وألا إنقلع. المطعم:شو عم تحكي،،بليز بدي أحكي مع الآنسه اللي من شوي. سعدى وبنرفزه: شين وقواية عين،ياجعل لسانك للحارق والساحق الماحق اللي يسحقك ويخليك زعتر مطحون. المطعم:ضبي لسانك ياآنسه. سعدى وبصراخ:ضب يأكل لسانك قل آمين. طرآآآآآخ (صكت سعدى بوجه الزلمه،،يستاهل ماجاه أحسن) معالي:حرام وش هالجلافه مع الآدمي. سعدى:لعنبو دارك إنتي وياه ماتستحون . سديم:وش دعوة سعدى تراه ماقال شي هذا هو إسلوبهم متعودين عليهم. سعدى:شوفي إنتي متعوده هذا شي راجع لك،لكن أنا ما أرضى أشوف الغلط وأسكت. هبوب:أي غلط لا تكبرين السالفه. سعدى وقد فقدت أعصابها:خير إنشاءالله يعني حلال عليهم حرام على عيالنا. هبوب طنقرت:وش قصدك. سعدى:يعني لو هالكلام قاله سعودي وش تسوين؟ هبوب:أكيد أمسح فيه البلاط. سعدى:اجل ليش هذا نعديها له. سديم:ياقلبي ياسعدى هم هاللون هرجهم. سعدى:معصي الرجل رجل سعودي ,,شامي وألا هندي. هبوب:سعدى تعلمي السنع شوي. بشرى خاشه عرض بفلسفتها المعتاده:سعدى لازم نحترم ثقافات الغير،،يعني هم كذا ودايم كلامهم معسول ليه مكبره السالفه. سعدى فجرت الدنيا بصراخها: شوفي عاد إنتي وهي ،أنا ما أفهم هرجكن،،كل اللي أفهمه شي واحد طول ما أنا بينكن ولا وحده تتجاوز حدودها مع سعودي،،شامي وألا سيلاني. معالي:حسبي الله على عدوك ياسعدى،،حرمتيني الكلام الزين اللي ينقط لبنه بالعسل وحرمتيني الأكل. سعدى:بدال المطعم عشره، إتصلوا على مطعم ثاني. أروى وبتنهيدة:مالت عليتس وش على بالك مطاعم الشرقيه 24 ساعه مفتوحه.هذا المطعم الوحيد اللي يفتح ذا الوقت. أسماء:بموت جوع،،سعدى إنتي مالك داعي بالحياة،وع عليك. حمده رقاصةالعائله:ورى ورى وسرت الليله ومامن عشاء،،هلا هلا وسعدى طيرت عشانا. معالي:ياسعدى تكفين خليني أدق مره ثانيه والله إن عصافير بطني توطوط من الجوع. كادي ودايم صاقعه فهاوه:يابنات وش رأيكن بتمرتين برحي ولبن غنم من شبك جدتي وقضينا. سديم:هذه والله اللي يبغالها أحد يشوتها ويعدل رأسها. سعدى وبضحكه:أقول ورى ياكادي ماتروحين لفراشك وألا أقول روحي لجده عيده وأحلبوا الغنم بلحالكم. أسماء:جيعانه أبي أكل.

الذين يشاهدون محتوى الموضوع الآن : 1 ( الأعضاء 0 والزوار 1)

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
آخر أخبار القبول في الجامعات و الكليات !	بـــو أحــمــد	ملتقى المواضيع العامة	96	2013- 8- 28 01:08 AM
روايه همس .. قلبي بعد كل هذا الحـبـ ,, الماضي لايعود > حزيينه وطويله	اخت البطه	ملتقى الفنون الأدبية	133	2010- 10- 18 05:43 PM